Esekiel

Ammonlaččaid duopmu

¹ Munnje bođii dát Hearrá sátni: ² Olmmoš, jorgal muođuid ammonlaččaid eatnama guvlui ja gulat duomu dan álbmogii. ³ Daja dasa: Gula Hearrá Ipmila sáni! Ná cealká Hearrá Ipmil: Don hiddjidit mu tempela dalle go dat heahppášuhttojuvvui, don hiddjidit Israela eatnama go dat heavahuvvui ja Juda álbmoga go dat dolvojuvvui fáŋgavuhtii. ⁴ Dan dihte mun attán du eatnama nuortti álbmogiid opmodahkan, ja sii dahket siiddaideaset du eatnamii ja ásset dohko, borret du šaddosiid ja juhket du mielkki. ⁵ Mun dagan Rabba kamelaid guohtumin ja oppa Ammona eatnama sávzzaid livvasadjin. Dalle dii ipmirdehpet ahte mun lean Hearrá.

⁶ Ná cealká Hearrá Ipmil: Don spežžot gieđaid, dánsot ja boagustit badjelgeahččalasat Israela eatnama. ⁷ Dan dihte mun bajidan gieđa ja attán du álbmogiid stajádussan, duššadan du álbmogiid gaskkas ja jávkadan du eatnamiid logus. Dalle don ipmirdat ahte mun lean Hearrá.

Moablaččaid duopmu

⁸ Ná cealká Hearrá Ipmil: Moab ja Seir leat dadjan: “Juda álbmot lea eará álbmogiid láhkásaš.” ⁹ Dan dihte mun gaikkodan gávpogiid Moaba várrevilttiin, juohke gávpoga, buot eatnama čiŋaid, Bet-Haješimota, Baal-Meona ja Kirjatajima. ¹⁰ Mun attán Moaba nuortti álbmogiid opmodahkan seammá ládje go ammonlaččaid, geat eai šat lohkkojuvvo álbmogiid lohkui. ¹¹ Mun ollašuhtán moablaččaid duomu, ja dalle sii ipmirdit ahte mun lean Hearrá.

Edomlaččaid duopmu

¹² Ná cealká Hearrá Ipmil: Edom lea mávssahan Juda álbmogii ja nu dahkan iežas sivalažžan. ¹³ Dan dihte, cealká Hearrá Ipmil, mun bajidan gieđa ja duššadan Edoma eatnama ja heavahan das olbmuid ja omiid. Temana rájes gitta Dedana rádjái sii gahččet miehkkái. ¹⁴ Mun bijan iežan álbmoga, israellaččaid, mávssahit Edomii, ja sii dahket Edomii dan maid mu moarri ja suhttu gáibida. Dalle edomlaččat ipmirdit ahte mun lean mávssahan, cealká Hearrá Ipmil.

Filistalaččaid duopmu

¹⁵ Ná cealká Hearrá Ipmil: Filistalaččat ledje mávssahahkkásat, sii mávssahedje badjelgeahččalasat, dáhtto dagahit heavu dološ vašálašvuođaset dihte. ¹⁶ Danin cealká Hearrá Ipmil: Mun bajidan gieđa ja ráŋggáštan filistalaččaid, mun duššadan keretlaččaid ja heavahan daid mearragátti ássiid geat leat báhcán. ¹⁷ Moaris mun mávssahan sidjiide, mun ráŋggáštan sin garrasit. Ja go mu mávssaheapmi deaivá sidjiide, de sii ipmirdit ahte mun lean Hearrá.