Gi hjerteStøtt nettbibelen
Gå til forsiden

Esekiel

26

Tyrosa duopmu

1 Oktanuppelogát jagi vuosttaš mánus, mánu vuosttaš beaivvi munnje bođii dát Hearrá sátni: 2 Olmmoš, gula. Tyros lea hiddjidan Jerusalema ja dadjan: “Álbmogiid poarta lea cuvkejuvvon, dat lea šaddan mu háldui. Mun rikkun, go dat lea duššaduvvon.” 3 Dan dihte cealká Hearrá Ipmil: Tyros, mun fallehan du. Mun čuoččáldahttán álbmogiid du vuostá, nugo mearra gearaha báruidis. 4 Dat cuvkejit Tyrosa muvrraid ja njeidet dan toartnaid. Mun suohpalasttán das eret vel muolddage ja dagan dan báljes báktin, 5 bivdofirpmiid lebbensadjin gasku ábi. Mun lean sárdnon, cealká Hearrá Ipmil. Tyros šaddá álbmogiid stajádussan 6 ja dan birasgávpogat mat leat nannámis, hearjiduvvojit mihkiin. Dalle sii ipmirdit ahte mun lean Hearrá.

7 Ná cealká Hearrá Ipmil: Mun divttán Nebukadnesara, Babylonia gonagasa, gonagasaid gonagasa, fallehit Tyrosa davvin. Son buktá heasttaidis, vovnnaidis, vovdnasoahteolbmáidis ja stuorra soahteveagas. 8 Du birasgávpogiid mat leat nannámis, son časká mihkiin. Son ráhkada birastahttinčoma, hukse fallehangorgŋehaga ja cegge galbadáhki du vuostá. 9 Son nordá du muvrraid muvrracuvkejeddjiiguin ja njeaidá du toartnaid ruovdegákkaniiguin. 10 Su heasttaid eatnatvuohta lokte gavjaborgga du badjelii. Heasttaid ja vovnnaid jorriid šlápma doarggistahttá du muvrraid, go son boahtá du poarttaid ráigge nugo vuoiti boahtá váldojuvvon gávpogii. 11 Su heasttaid gaccat dulbmet du gáhtaid cuovkkas, son goddá du álbmoga mihkiin ja du nana báccit gahččet eatnamii. 12 Sii rievidit du dávviriid ja rivvejit du gávpegálvvuid, njeidet eatnamii du muvrraid ja gaikot du hearvás viesuid. Sii suhppot du geđggiid, bielkkaid ja muoldda merrii. 13 Mun jaskkodahtán du lávlagiid šuoŋa, du lyraid jietna ii šat gullo. 14 Mun dagan du báljes báktin. Tyros šaddá bivdofirpmiid lebbensadjin, ii dat šat huksejuvvo. Mun, Hearrá, lean sárdnon. Ná cealká Hearrá Ipmil.

15 Ná cealká Hearrá Ipmil Tyrosii: Riddoeatnamat doarggistit, go don gahčat julkkanasain, go čukkohallan olbmot luibmet ja sorbmi speadjá gávpogis. 16 Buot ábi oaivámuččat njidjet truvnnusteaset, bálkestit gávttiideaset ja nullet hearvabiktasiiddiset. Hirbma sis lea gárvun go sii čohkkájit eatnamis, sii doarggistit geažos áigge go leat nu gáfestuvvan du dihte.

17 Sii lávlugohtet dutnje morašlávlaga:

Vuoi, mo don leat duššan,

mearragávpot,

don máinnolmas gávpot

mii ráđđejit ábi,

gii iežat ássiiguin

gilvet balu nannámii.

18 Riddoeatnamat ballájit

go don gahčat,

meara sullot doarggistit

go du loahppa lea boahtán.


19 Ná cealká Hearrá Ipmil: Go mun lean dahkan du heavahuvvon gávpogin, daid gávpogiid láhkásažžan main ii oktage ása, ja go lean diktán čiekŋalasa njiellat du nu ahte stuorra čázit gokčet du, 20 de dalle mun nordadan du vulos dološ áiggi álbmoga lusa, hávdáduvvon olbmuid bárrii. Dološ viessobázahasaid ládje don njaŋgát čiekŋalasa eatnamis ovttas daiguin geat leat mannan hávdái. Don it goassege šat máhca ealli olbmuid eatnamii. 21 Mun dagan du suorggahussan, don it leat šat. Dat gii ohcá du, ii gávnna du goassege, cealká Hearrá Ipmil.

Les vår personvernserklæring
Skjemaet er beskyttet av reCAPTCHA og Googles Privacy Policy og Terms of Service gjelder.