Morašlávlla Tyrosii
1 Munnje bođii dát Hearrá sátni: 2 Olmmoš, lávllo morašlávlaga Tyrosii. 3 Daja Tyrosii mii čohkká ábinjálmmis ja gávppaša gáiddus rittuid álbmogiiguin: Ná cealká Hearrá Ipmil:
Tyros, don leat dadjan:
“Mu čábbodat lea ollis.”
4 Don leat gasku ábi,
ja du huksejeaddjit
dahke du čáppisvuođa ollisin.
5 Senira sypressain
sii huksejedje du deahkaid,
njeide Libanonis sedera
dutnje stivlin.
6 Bašana áikkain
sii duddjojedje dutnje áirruid,
du romuid sii duddjojedje
kittelaččaid rittuid sypressain.
7 Du borjjas gorrojuvvui
Egypta girjás beallemasas,
dat šattai du dovdomearkan.
Du beaivvášsuodji lei dahkkojuvvon
Eliša rittuid ruksesalit
ja purpurrukses láđđis.
8 Sidona ja Arvada oaivámuččat
ledje dus suhkkin,
Semera viisát
du matrosan
9 ja Gebala vuorrasat ja viisát
du dáidnádeaddjin.
Buot ábi skiippat ja mearraolbmát
bohte du lusa lonuhit gálvvuid.
10 Persia, Luda ja Puta olbmát
ledje du soahteveagas,
sii ledje dus soahteolmmájin.
Sii heŋgejedje galbbaideaset
ja ruovdegahpiriiddiset du gilggaide
ja dahke du goargadin.
11 Arvada ja Kilikia olbmát ledje miehtá du muvrraid, ja gammadlaččat čužžo du toartnain. Sii heŋgo njuollaskuohpuideaset juohke sadjái miehtá du muvrraid ja dahke du čáppisvuođa ollisin.
12 Taršiš gávppašii duinna, danin go dus ledje buotlágáš gálvvut. Sii mákse gálvvuid silbbain, ruvddiin, daniin ja lajuin. 13 Javan, Tubal ja Mešek gávppašedje duinna ja adde máksun šlávaid ja veaikelihtiid. 14 Bet Togarma olbmot mákse du gálvvuid vovdnaheasttaiguin, riidenheasttaiguin ja mulaiguin. 15 Rhodosa olbmot gávppašedje duinna, ja máŋga eará sullo ledje dus gávpeguoibmin. Sii adde máksun elefántabániid ja ebenmuora. 16 Edom gávppašii duinna, danin go dus ledje ollu gávpegálvvut. Sii mákse du gálvvuid turkosaiguin, purpurrukses ulluin, hervejuvvon láđđiin ja fiidnámus beallemasain, korállaiguin ja rubiinnaiguin. 17 Juda ja Israel gávppašedje duinna ja mákse du gálvvuid Minnita nisuiguin, gáhkuiguin, honnegiin, oljjuin ja balsamiin. 18 Damaskus gávppašii duinna, su geasuhii du buotlágáš gálvvuid eatnatvuohta. Sii mákse daid Helbona viinniin, Sahara ulluin 19 ja Usala viinniin. Don ožžot gálvvuinat maiddái bargojuvvon ruovddi, kassia ja kalmusa. 20 Dedan gávppašii duinna, sii vuvde dovgosiid. 21 Arabia ja buot Kedara oaivámuččat gávppašedje duinna ja bukte dutnje lábbáid, vierccaid ja bohkáid. 22 Saba ja Rama gávpeolbmát gávppašedje duinna ja mákse du gálvvuid buoremus máistagiiguin ja buotlágán divrras geđggiiguin ja golliin. 23 Harran, Kanne, Eden, Assur ja Kilmad gávppašedje duinna. 24 Sii vuvde ávvubiktasiid, oalgebiktasiid mat ledje duddjojuvvon ruksesalit ullus, girjás gággásiid, máŋggaivdnásaš gokčasiid ja nannosit gerdojuvvon báttiid. Dakkáriiguin sii gávppašedje. 25 Taršiša-skiippat suvde du gálvvuid.
Bahkka, lossadin lástejuvvon
don ledjet gasku ábi.
26 Du suhkkit dolvo du stuorra čáziide,
muhto nuortabiegga skálbmii du
gasku ábi.
27 Bođii du heavvaneami beaivi. Don vudjot ábi čiekŋalassii oktan dávviriiddátguin ja buot gálvvuidatguin, mearraolbmáidatguin ja matrosaiddátguin, dáidnádeddjiidatguin, gávppašeddjiidatguin ja buot soahteolbmáidatguin geat ledje duinna.
28 Du matrosaid heahtečuorvasat
doarggistahttet mearragáttiid,
29 ja suhkkit vulget skiippasteaset,
mearraolbmát mannet gáddái,
buot ábi matrosat.
30 Sii bárgot morrašis,
vuobaidit bahččagit du geažil.
Sii botkkuhit muoldda oaivviset ala
ja fieradit gunas.
31 Sii ráhkejit oaivviset báljisin
ja gárvodit horstta,
čirrot bahččagit du
ja luibmet.
32 Morrašis sii lávlugohtet
dutnje morašlávlaga:
“Gii lei Tyrosa veardásaš,
dan ladni mii lei gasku ábi?”
33 Gos du gálvvut bohte gáddái, de álbmogiid dárbbut devdojuvvojedje, buotlágán gálvvuidatguin don riggudit eatnama gonagasaid.
34 Dál don leat skálbmejuvvon merrii,
vudjon ábi čieŋalvuhtii,
du gálvvut ja du veahka
leat vudjon oktan duinna.
35 Riddoeatnamiid ássit
leat gáfestuvvan du vuorbbi dihte,
gonagasat soiget ja gehččet suorganemiin,
sin ámadajut botnjasit balus.
36 Dat geat gávppašit álbmogiiguin,
healkkehit.
Don leat šaddan suorggahussan,
don leat jávkan agibeaivái.