Esekiel

Tyrosa gonagasa duopmu

¹ Munnje bođii dát Hearrá sátni: ² Olmmoš, daja Tyrosa oaivámužžii: Ná cealká Hearrá Ipmil: Don leat čevlon, don dajat: “Mun lean ipmil, mun čohkkán ipmiliid truvnnus gasku ábi.” Muhto vaikko don anát iežat ipmilin, de don leat olmmoš itge ipmil. ³ Don leat viisát go Daniel, ii mihkkege suollemasaid leat dus čihkkojuvvon. ⁴ Iežat viissisvuođain ja jirpmiin don leat háhkan alccesat opmodaga. Don leat čohkken golli ja silbba dávvirgámmáriiddásat. ⁵ Don leat dahkan buriid gávppiid ja lasihan iežat opmodaga, muhto du riggodat lea dahkan du čeavlájin. ⁶ Dan dihte cealká Hearrá Ipmil: Go don anát iežat ipmilin, ⁷ de mun vuolggahan du vuostá vierrásiid, goaves báhkiniid. Sii fallehit rohttejuvvon miehkki gieđas du hearvás viissisvuođa, duolvadit du goargatvuođa. ⁸ Sii norddastit du hávdái, gasku ábi don goddojuvvot ja jámát. ⁹ Go don čuoččut sorbmejeddjiidat ovddas, de dajatgo ain: “Mun lean ipmil?” Olmmoš don leat, it ipmil, don leat sorbmejeddjiidat gieđas. ¹⁰ Don jámát vierroolbmuid gihtii dego gii beare birračuohpakeahtes olbmuid. Mun lean sárdnon, cealká Hearrá Ipmil.

Morašlávlla Tyrosa gonagasa birra

¹¹ Munnje bođii dát Hearrá sátni: ¹² Olmmoš, lávllo morašlávlaga Tyrosa gonagasa birra, daja sutnje: Ná cealká Hearrá Ipmil:

Don ledjet dego divrras seailasuorpmas, don ledjet mearihis viissis, don ledjet fávru. ¹³ Don ásset Edenis, Ipmila gilvvagárddis. Du gokče buotlágán divrras geađggit, karneolat, topásat ja kalsedonat, krysolihtat, onyksat ja jaspisat, safirat, turkosat ja smarágdat. Du čiŋat ja hearvvat ledje gollis, duddjojuvvon dutnje dan beaivvi go don sivdniduvvojit. ¹⁴ Don ledjet keruba gean mun ledjen vuoidan ja bidjan suodjaleaddjin, don ásset bassi váris, váccašit leađgu geđggiid gaskkas. ¹⁵ Don ledjet láitemeahttun buot das maid dahket, dan beaivvi rájes go sivdniduvvojit gitta dan beaivvi rádjái go dus gávdnojuvvui vearrivuohta. ¹⁶ Don gávppašit juohke bealde, don šaddet veahkaválddálažžan ja jorralit suddui. Dalle mun ádjen du eret bassi váris, mun hoigadin du, suodjaleaddji keruba, eret leađgu geđggiid gaskkas. ¹⁷ Du čábbodat dagai du čeavlájin, ja don duššadit iežat goargatvuođa ja viisodaga. Dalle mun bálkestin du eatnamii, guđđen du eará gonagasaid čalmmiid ovdii bilkiduvvot. ¹⁸ Eatnat suttuidatguin ja vearálaš gávppiidatguin don heahppášuhttet tempeliiddát. Dalle mun dikten dola vuolgit dus, ja dat lovttii du, mun dahken du gutnan ja gavjan buohkaid oaidnut. ¹⁹ Buot álbmogat geat dovde du, gáfestuvve du dihte. Don leat šaddan suorggahussan. Don leat jávkan agibeaivái.

Sidona duopmu

²⁰ Munnje bođii dát Hearrá sátni: ²¹ Olmmoš, jorgal muođuid Sidona guvlui ja gulat dasa duomu. ²² Ná cealká Hearrá Ipmil: Mun fallehan du, Sidon, ja čájehan iežan fámu du siste. Go mun ollašuhtán du duomu, de mun čájehan iežan bassivuođa, ja dalle buohkat ipmirdit ahte mun lean Hearrá. ²³ Mun vuolggahan rohttudávdda du gaskii ja divttán vara golgat du gáhtain. Du olbmát gahččet miehkkái mii falleha du juohke bealde. Dalle buohkat ipmirdit ahte mun lean Hearrá.

²⁴ Badjelgeahččalas ránnjáálbmogiid boaldi gáskálasat ja čuoggu bastilislánját eai šat givssit Israela álbmoga. Dalle dat ipmirdit ahte mun lean Hearrá Ipmil. ²⁵ Ná cealká Hearrá Ipmil: Mun čohkken israellaččaid dain álbmogiin maid gaskii sii ledje biđgejuvvon, sin bokte mun čájehan bassivuohtan buot álbmogiid oaidnut. Israellaččat besset ássat iežaset eatnamis maid mun adden bálvaleaddjásan Jakobii. ²⁶ Doppe sii ásset oadjebassan, huksejit viesuid ja gilvet viidnegárddiid. Sii ellet oadjebassan, go mun lean ollašuhttán sin badjelgeahččalas ránnjáálbmogiid duomu. Dalle sii ipmirdit ahte mun lean Hearrá, sin Ipmil.