Esekiel

Libanona stuorra muorra

¹ Oktanuppelogát jagi goalmmát mánus, mánu vuosttaš beaivvi munnje bođii dát Hearrá sátni: ² Olmmoš, daja faraoi, Egypta gonagassii, ja su šlámaideaddji jovkui:

Gean láhkásaš don leat

stuorisvuođastat?

³ Don leat dego sypressa,

nugo Libanona seder

man čáppa oavssit

suoivanaste eatnama.

Dat šattai allagin,

dan giera olii balvvaid gaskii.

⁴ Čáhci šaddadii sedera stuorisin,

dat oaččui šaddannávccaid čiekŋalasas

man suorggit golge

dan gilvvasadjái

ja golggahedje jogažiid

buot vuovddi muoraide.

⁵ Danin dat šattai alibun

go eará vuovddi muorat,

danin dan giera šattai suohkadin

ja dan oavssit guhkkin.

Dat oaččui ollu čázi ja stuorui.

⁶ Buot almmi lottit

bessejedje dan gierragis,

dan ovssiid vuolde čivge

buot meahcieallit,

álbmogiid eatnatvuohta

ásai dan suoivanis.

⁷ Dat šattai stuorisin ja čáppisin,

ja dan oavssit ledje guhkit ja lastájat,

danne go dan ruohttasat

olle golgi čáziid rádjái.

⁸ Ii oktage Ipmila gilvvagárddi seder

lean dan veardásaš.

Sypressaid oavssit

eai lean veardideames dan oaksin,

platánaid gierragat

eai lean dan gierraga veardásaččat.

Ii oktage Ipmila gilvvagárddi muorra

lean nu čáppat.

⁹ Mun dahken dan čáppa muorran,

suorgájin ja lastájin.

Buot Edena muorat,

Ipmila gilvvagárddi muorat,

gáđaštedje dan.

¹⁰ Ná cealká Hearrá Ipmil: Danin go dat lea šaddan nu allagin ahte lea faŋuhan gierragis balvvaid gaskii ja lea čevlon iežas allodaga dihte, ¹¹ de mun attán dan álbmogiid oaivámučča gihtii, ja son dahká dasa maid dan ipmilmeahttunvuohta ánssáša. Mun lean dan hilgon. ¹² Nu vierroolbmot, goaves báhkinat, njeide dan ja dikte dan njáŋgát. Dan oavssit gahčče váriide ja buot legiide, dan suorggit doddjojuvvojedje buot jogažiid gáttiide, ja buot eatnama álbmogat vulge dan suoivanis ja guđđe dan njáŋgát.

¹³ Buot almmi lottit seivo

dan gahččan máddaga ala,

buot meahcieallit ohce suoji

dan ovssiid gaskkas.

¹⁴ Eai beasa šat čáhcegátti muorat šaddat allagin eaige faŋuhit gierragiiddiset balvvaid rádjái. Oktage muorra mas lea čáhcevallji, ii beasa šat leat iešbuorre, vaikko dat šattašii man allagin ihkinassii. Dat buot addojuvvojit jápmimii ja bohtet čiekŋalasa eatnamii daid olbmuid bárrii geat leat mannan hávdái.

¹⁵ Ná cealká Hearrá Ipmil: Dan beaivvi go seder njiejai jábmiidáibmui, de mun bidjen čiekŋalasa moraštit ja gokčen dan, mun bissehin rávnnjiid ja doalahin čázi golgamis. Mun gárvvuhin Libanona morašbiktasiidda sedera geažil, ja buot meahci muorat áste. ¹⁶ Álbmogat doarggistedje julkkanasa dihte go dat gahčai, go mun nordadin dan vulos jábmiidáibmui, daid lusa geat leat mannan hávdái. Nu jeađđašuvve buot Edena muorat čiekŋalasa eatnamis, Libanona buoremusat, buot main lei leamaš čáhcevallji. ¹⁷ Oktan sederiin dat ledje njiedjan jábmiidáibmui, daid lusa geat leat goddojuvvon mihkiin. Dat geat ledje ássan dan suoivanis, bieđganadde álbmogiid seahká.

¹⁸ Leigo oktage Edena muorra nu hearvái ja stuoris go don? Dattetge don norddahalat vulos čiekŋalasa eatnamii seammá ládje go Edena muorat. Don njaŋgát birračuohpakeahtes olbmuid gaskkas, mihkiin sorbmejuvvon olbmuid báras.

Nu geavvá faraoi ja oppa su šlámaideaddji jovkui, cealká Hearrá Ipmil.