Israela báimmanat
1 Munnje bođii dát Hearrá sátni: 2 Olmmoš, gulat duomu Israela báimmaniidda. Gulat duomu, daja daidda álbmoga gehččiide: Ná cealká Hearrá Ipmil: Vuoi din, Israela báimmanat! Dii dikšubehtet dušše iežadet. Eaigo báimmanat galggaše baicce dikšut sávzzaideaset? 3 Dii juhkabehtet mielkki, atnibehtet ulluid biktasiiddádet ja njuovvabehtet buoiddimus sávzzaid, muhto ehpet divššo ealu. 4 Dii ehpet leat veahkehan heajuid, ehpet dálkkastan buhcciid ehpetge čatnan lápmašuvvan juolggi. Dii ehpet leat buktán ruoktot daid mat leat čádjidan ehpetge ohcan daid mat leat láhppon. Dii lehpet meannudan goavit sávzzaideattetguin. 5 Go mu sávzzain ii leat leamaš báimman, de dat leat bieđganan ja šaddan meahcispiriid biebmun. 6 Mu sávzzat čádjádallet buot váriin ja alla dieváin, dat leat bieđganan miehtá oppa eatnama, iige oktage beroš dain iige oza daid. 7 Dan dihte, báimmanat, gullet Hearrá sáni! 8 Ná cealká Hearrá Ipmil: Nu duohta go mun ealán, mu sávzzat leat šaddan meahcispiriid stajideamušin ja sálašin, dainna go dain ii leat leamaš báimman. Mu báimmanat eai leat beroštan mu sávzzain. Sii leat dikšon dušše iežaset, muhto mu ealu sii eai leat áimmahuššan. 9 Dan dihte, báimmanat, gullet Hearrá sáni! 10 Ná cealká Hearrá Ipmil: Mun bijan báimmaniid vástidit, mun gáibidan sis ellon ruoktot. Mun in suova sin šat leat báimmanin, sii eai oaččo šat dikšut iežaset. Mun gájun sávzzaidan sin bániid gaskkas, dat eai šat šatta sin biebmun.
11 Ná cealká Hearrá Ipmil: Mun ieš ozan sávzzaidan ja anán dain fuola. 12 Nugo báimman atná fuola sávzzainis go dat leat bieđganan su luhtte, nu munge anán fuola sávzzainan ja gájun daid dain báikkiin gosa dat leat bieđganan balvvaid ja seavdnjatvuođa beaivvi. 13 Mun vieččan daid vierroálbmogiid gaskkas, mun čohkken daid vieris eatnamiin ja buvttán daid daid iežaset eatnamii. Mun geahčan daid Israela váriin, legiin ja buot báikkiin gos sáhttá ássat. 14 Mun guođohan daid buori guohtunbáikkis, daid giettit leat Israela alla váriin. Doppe hearvás gittiin dat besset livvadit, Israela váriin dat gávdnet buori guohtuma. 15 Mun ieš guođohan sávzzaidan ja doalvvun daid livvadit, cealká Hearrá Ipmil. 16 Mun ozan daid mat leat láhppon, buvttán ruoktot daid mat leat čádjidan, mun čanan lápmašuvvan juolggi, divššun buhcciid ja geahčan vuoimmálaččaid ja gievrraid nugo lea vuoigat.
17 Ja dii, mu sávzzat! Ná cealká Hearrá Ipmil: Mun anán fuola das ahte vuoigatvuohta dáhpáhuvvá sávzzaid, vierccaid ja bohkáid gaskkas. 18 Leago didjiide beare uhccán guohtut buoremus guohtunbáikkis, go dii vel duolbmabehtet bázahasage guohtunbáikkisteattet? Leago didjiide beare uhccán juhkat čielga čázi, go dii vel dahkabehtet bázahasa moivvasin julggiideattetguin? 19 Mu sávzzat šaddet guohtut dakkár guohtunbáikkis maid dii lehpet duolbman ja juhkat čázi maid dii lehpet dahkan moivvasin.
20 Dan dihte cealká Hearrá Ipmil: Mun anán fuola das ahte vuoigatvuohta dáhpáhuvvá buoiddes sávzzaid ja guoira sávzzaid gaskkas. 21 Dii lehpet nordadan gilggain ja čoamohasain heajuid, dii lehpet dorron daid čorvviideattetguin dassážii go lehpet daid biđgen ja ádján eret. 22 Muhto mun gájun sávzzaidan, vai dat eai šat eambbo šatta stajideamušin. Mun anán fuola das ahte vuoigatvuohta dáhpáhuvvá sávzzaid gaskkas.
23 Mun bijan sin geahččin ovtta báimmana, bálvaleaddján Davida. Son áimmahuššá sin, son lea sin báimman. 24 Mun, Hearrá, lean sin Ipmil, ja mu bálvaleaddji David lea sin oaivámuš. Mun, Hearrá, lean sárdnon.
25 Mun dagan singuin ráfilihtu. Mun duššadan eatnamis meahcispiriid, nu ahte olbmot sáhttet oadjebassan ássat meahcis ja oađđit vuovddis. 26 Mun divttán sin ássat mu vári birra. Mun attán sidjiide arvvi rivttes áigái, ja dat lea buressivdnádusa arvi. 27 Muorat šaddadit šaddosiiddiset ja eanan addá šattuidis, ja sii besset eallit oadjebassan iežaset eatnamis. Mun doaján sin geassá ja gájun sin sin šlávvavuođas. Dalle sii ipmirdit ahte mun lean Hearrá. 28 Sii eai šatta šat eará álbmogiid sálašin eaige meahcispiriid biebmun, muhto ásset oadjebassan, iige oktage suorggat sin. 29 Sii besset gilvit šattolaš eatnamiid, iige sin eatnamis oktage šat dárbbaš nealgut jámas. Eará álbmogat eai beasa šat hiddjidit sin. 30 Dalle sii ipmirdit ahte mun, Hearrá, sin Ipmil, lean singuin ja ahte sii, Israel, leat mu álbmot, cealká Hearrá Ipmil. 31 Dii lehpet mu sávzzat, iežan ealu sávzzat, ja mun lean din Ipmil. Ná cealká Hearrá Ipmil.