Esekiel

Seirvári duopmu

¹ Munnje bođii dát Hearrá sátni: ² Olmmoš, jorgal muođuid Seirvári guvlui ja gulat dasa duomu. ³ Daja: Ná cealká Hearrá Ipmil:

Mun fallehan du, Seirvárri,

mun bajidan gieđa du vuostá

ja dagan du ávdimin ja ruojusin.

⁴ Du gávpogiid mun dagan

čievračopman,

ja don ieš šattat ávdimin.

Dalle don ipmirdat

ahte mun lean Hearrá.

⁵ Don leat álo vašuhan israellaččaid, ja go lihkuhisvuohta deaividii sin, go sin loahpalaš ráŋggáštusa boddu bođii, de don it eahpidan jorgalit miehki sin vuostá. ⁶ Dan dihte cealká Hearrá Ipmil: Nu duohta go mun ealán, mun bijan du vardit, ja varra doarrádallá du. Vara geažil don šaddet sivalažžan, danin varra doarrádallá du. ⁷ Mun dagan Seirvári ávdimin ja ruojusin, mun duššadan buohkaid geat doppe johtet. ⁸ Du vári mun govččan rupmašiiguin, du alážiid, legiid ja ájarokkiid mun deavddán miehkkái gottáhallan olbmuiguin.

⁹ Mun dagan du ávdimin agibeaivái,

ii oktage šat ása du gávpogiin.

Dalle don ipmirdat ahte mun lean Hearrá.

¹⁰ Don leat dadjan: “Dát guokte álbmoga ja guokte eatnama šaddet mu oapmin! Mun válddán daid iežan opmodahkan, vaikko Hearrá lea doppe.” ¹¹ Dan dihte cealká Hearrá Ipmil: Nu duohta go mun ealán, mun mávssahan dutnje dan maid don leat dahkan sidjiide moaris ja gáđašvuođas, danin go don vašuhit sin. Don šattat vel dovdat mu go mun dubmen du. ¹² Dalle don ipmirdat ahte mun, Hearrá, lean gullan mo don leat bilkidan Israela váriid ja dadjan: “Dat leat ávdimat, ii leat eará go njielastit daid!” ¹³ Dii lehpet rámppastaddan ja sárdnon goargadit mu birra, ja mun lean gullan dan.

¹⁴ Ná cealká Hearrá Ipmil: Don illudit dan dihte go eanan šattai ávdimin. Dan dihte mun dagan seammá láhkái dutnje. ¹⁵ Don illudit go Israela eanan šattai ávdimin, ja danin mun dagan seammá láhkái dutnje. Seirvárri ja oppa Edom šaddá ávdimin. Dalle sii ipmirdit ahte mun lean Hearrá.