Dahppojuvvon poarta
1 Olmmái doalvvui mu dasto ruovttoluotta tempela olggut portii, dan portii mii lei nuorttas guvlui, muhto dat lei dahppagasas. 2 Hearrá celkkii munnje: Dát poarta galgá leat dahppagasas. Dan ii oaččo rahpat, iige oktage oaččo johtit dakko. Hearrá, Israela Ipmil, lea boahtán dakko tempelii, ja danin dat galgá leat dahppagasas. 3 Dušše oaivámuš beassá čohkkát poartahuksehussii ja borrat Hearrá muođuid ovddas. Son galgá boahtit tempelii poartaviesu ovdahálla bokte, ja olggos son galgá mannat seammá geainnu.
Báhpat ja levilaččat
4 Olmmái doalvvui mu davvepoartta ráigge tempela ovdii, ja mun oidnen mo Hearrá hearvásvuohta devddii tempela. Mun luoitádin eatnamii muđolassii. 5 Hearrá celkkii munnje: Olmmoš, geahča ja guldal dárkilit, váldde vuhtii buot maid mun sártnun dutnje Hearrá viesu njuolggadusaid birra ja daid lágaid birra mat doppe leat fámus. Váldde vuhtii maid olmmoš galgá dahkat go boahtá bassibáikái ja vuolgá doppe.
6 Daja israellaččaide, dan gážžáris álbmogii: Ná cealká Hearrá Ipmil: Israellaččat, lehkos dal didjiide galle buot din fastivuođain! 7 Dii buvttiidet vierroolbmuid geain lei birračuohpatkeahtes váibmu ja birračuohpatkeahtes oažži, ja suovaidet sin leat mu bassibáikkis. Go dii oaffarušaidet munnje mu biepmu, buoiddi ja vara, de sii eahpebasuhedje mu tempela. Ná dii dagaidet earret buot din eará fastivuođaid ja rihkuidet mu lihtu. 8 Dii ehpet áimmahuššan mu bassi biergasiid, muhto bijaidet iežadet sajis vierroolbmuid doaimmahit bálvalusa mu bassibáikkis. 9 Ná cealká Hearrá Ipmil: Ii oktage vierroolmmoš geas lea birračuohpatkeahtes váibmu ja birračuohpatkeahtes oažži, beasa mu bassibáikái, ii oktage dain vierroolbmuin geat ásset israellaččaid gaskkas.
10 Dat levilaččat geat gáide mu luhtte dalle go Israel čádjidii čuovvut eahpeipmiliiddiset, šaddet gillát vearredaguset čuovvumušaid. 11 Mu bassibáikkis sii šaddet fáktet tempela poarttaid ja bargat bálvaleaddjin tempelis. Sii galget njuovvat boaldinoaffariid ja njuovvanoaffariid álbmoga beales ja leat gárvvisin bálvalit olbmuid. 12 Danin go sii bálvaledje álbmoga dalle go dat oaffarušai eahpeipmiliiddásis ja fillejedje Israela čeardda suddui, de mun bajidan gieđa sin vuostá, cealká Hearrá Ipmil. Sii ožžot ráŋggáštusa. 13 Sii eai oaččo šat boahtit mu lahka doaimmahit báhpabargguid, sii eai oaččo boahtit mu tempelii doaimmahit bassi ja allabassi bálvalusaid. Sii šaddet gillát iežaset fasttes daguid heahpada. 14 Mun bijan sin tempela bálvalanbargguide, buotlágán bargguide mat doppe dahkkojuvvojit.
15 Muhto dat levilaš báhpat geat ledje Sadoka nális, geat bálvaledje mu oskkáldasat tempelis dalle go israellaččat čádjidedje eret mu luhtte, ožžot boahtit mu ovdii ja bálvalit mu. Sii ožžot oaffaruššat munnje buoiddi ja vara, cealká Hearrá Ipmil. 16 Sii ožžot boahtit mu bassibáikái, lahkanit mu beavdái ja bálvalit mu. Sii ožžot bálvalit mu.
17 Go sii bohtet sisa siskkit ovdašilju poarttaid ráigge, de sii galget gárvodit liidnebiktasiid. Sii eai oaččo atnit ullobiktasiid go doaimmahit bálvalusa siskkit ovdašilju poarttain ja tempelis. 18 Sii galget atnit liidneturbána ja liidnebuvssaid, makkárge bivastuhtti gárvvuid sii eai oaččo atnit. 19 Ovdal go sii mannet álbmoga lusa olggut ovdašilljui, de sii galget nuollat daid biktasiid maid atne go doaimmahedje bálvalusa, guođđit daid bassi gámmáriidda ja gárvodit eará biktasiid, amaset dahkat álbmoga bassin biktasiiddisetguin. 20 Sii eai oaččo ráhket oaivvi báljisin eaige diktit vuovttaideaset guhkkut; sii galget čuohpahit vuovttaideaset oanehažžan. 21 Báhpat eai oaččo juhkat viinni dalle go sii galget mannat bálvalit siskkit ovdašilljui. 22 Sii eai oaččo váldit áhkkán leaskka eaige hilgojuvvon nissona, muhto nieidda gii gullá Israela álbmogii, dahje nuppi báhpa leaskka. 23 Báhpat galget máhttáhit mu álbmogii, mii lea bassi ja mii ii leat, ja oahpahit dan dahkat erohusa buhttása ja buhtismeahttuma gaskkas. 24 Diggeáššiin sii galget leat duopmárin ja dubmet mu lágaid mielde. Sii galget atnit fuola das ahte buot mu bassebeaivvit dollojuvvojit mu lágaid ja njuolggadusaid mielde, ja sii galget basuhit mu sabbahiid. 25 Báhppa ii oaččo mannat jábmi lusa, amas šaddat buhtismeahttumin. Dušše dalle go jábmi lea su áhčči dahje eadni, bárdni dahje nieida, viellja dahje náitalkeahtes oabbá, de báhppa oažžu šaddat buhtismeahttumin. 26 Go báhppa lea fas šaddan buhtisin, de son galgá vuordit vel čieža beaivvi. 27 Go son dasto máhccá tempelii ja boahtá siskkit ovdašilljui doaimmahit bálvalusa bassibáikkis, de son galgá oaffaruššat iežas ovddas suddooaffara. Ná cealká Hearrá Ipmil.
28 Báhpain ii oaččo leat árbeeanan, munhan lean sin árbeoassi. Dii ehpet oaččo addit sidjiide opmodaga Israelis, munhan lean sin opmodat. 29 Sii ožžot borrat borramušoaffara, suddooaffara ja vealgeoaffara, ja sidjiide gullá buot mii Israelis lea vihahuvvon Hearrái. 30 Buoremus oassi šattus ja álgošattus ja buot das maid dii addibehtet oaffarattáldahkan, gullá báhpaide. Addet báhpaide vuosttaš láibbiid maid láibubehtet dáiggisteattet, de dalle buressivdnádus lea din viesu badjelis. 31 Báhpat eai oaččo borrat jápmán dahje jámas gaikkoduvvon elliid bierggu, eai lotti eaige ealli bierggu.