Oaffarmearrádusat
1 Ná cealká Hearrá Ipmil: Siskkit ovdašilju poarta mii lea nuorttas guvlui, galgá leat dahppagasas vahku guđa bargobeaivvi áigge, muhto sabbatbeaivvi dat galgá rahppojuvvot, nu maiddái mánočalbmebeaivvi. 2 Oaivámuš galgá boahtit dán portii poartaviesu ovdahálla bokte ja čuoččastit poartta uksabealláid gurrii, dan boddii go báhpat oaffaruššet su boaldinoaffara ja searvevuođaoaffara. Son galgá gopmirdit ja rohkadallat poartta uksalasá alde ja de mannat olggos. Poartta ii oaččo dahppat ovdal eahkeda. 3 Dan poartta uksanjálmmis eatnama olbmot galget rohkadallat Hearrá sabbahiid ja mánočalbmebeivviid.
4 Boaldinoaffarin maid oaivámuš oaffaruššá Hearrái sabbatbeaivvi, galget leat guhtta lábbá mat leat almmá vigi haga, ja vierca mii lea almmá vigi haga. 5 Borramušoaffarin galget leat efa veardde jáffut viercca nammii, ja lábbáid nammii jáffut nu ollu go son suitá, ja daidda lassin ovtta hina veardde olju efa nammii.
6 Mánočalbmebeaivvi oaivámuš galgá oaffaruššat nuorra vuovssá, guhtta lábbá ja ovtta viercca mat buot leat almmá vigi haga. 7 Borramušoaffarin son galgá oaffaruššat efa veardde jáffuid vuovssá nammii, efa veardde jáffuid viercca nammii ja lábbáid nammii nu ollu go son suitá, ja daidda lassin hina veardde oljju efa nammii. 8 Go oaivámuš boahtá, de son galgá boahtit sisa poartta ovdahálla bokte, ja seammá geainnu son galgá mannat olggos.
9 Go eatnama olbmot bohtet Hearrá muođuid ovdii doallat basiid, de dat gii boahtá rohkadallat davvepoarttas, galgá mannat olggos lullepoarttas, ja dat gii boahtá lullepoarttas, galgá mannat olggos davvepoarttas. Ii oktage oaččo máhccat dan poarttas man bokte bođii, muhto son galgá mannat olggos vuostálas poarttas. 10 Oaivámuš galgá boahtit sisa dalle go olbmot bohtet sisa, ja mannat olggos dalle go olbmot mannet olggos.
11 Basiid ja feasttaid áigge borramušoaffarin galget leat efa veardde jáffut vuovssá nammii ja efa veardde viercca nammii, ja lábbáid nammii nu ollu go oaffarušši dáhttu addit, ja de vel hina veardde olju juohke efa nammii. 12 Go oaivámuš addá Hearrái eaktodáhtolaš oaffara, boaldinoaffara dahje searvevuođaoaffara, de sutnje galgá rahpat dan poartta mii lea nuorttas guvlui, nu ahte son sáhttá addit iežas boaldinoaffara ja searvevuođaoaffara seammá vuogi mielde go sabbahiid áigge. Dasto son galgá mannat olggos, ja go son lea mannan, de poarta galgá dahppojuvvot.
13 Juohke beaivvi Hearrái galgá oaffaruššat boaldinoaffarin jahkásaš lábbá mii lea almmá vigi haga. Dan galgá oaffaruššat juohke iđida. 14 Dasa lassin galgá oaffaruššat juohke iđida borramušoaffarin efaguđádasa veardde jáffuid ja hingoalmmádasa veardde oljju jáffuid láktadeami várás. Dát ásahus Hearrá borramušoaffara várás lea agálaš mearrádus. 15 Lábbá, borramušoaffara ja oljju galgá oaffaruššat juohke iđida. Dat lea beaivválaš boaldinoaffar.
Oaivámučča opmodat
16 Ná cealká Hearrá Ipmil: Jos oaivámuš addá oasi iežas opmodagas attáldahkan muhtun bárdnásis, de dat gullá su bártniide su maŋŋil. Sii eaiggáduššet dan, dat lea sin opmodat. 17 Muhto jos oaivámuš addá oasi iežas opmodagas attáldahkan muhtun bálvaleaddjásis, de dat gullá bálvaleaddjái ávvujagi rádjái. Dalle dat máhccá oaivámužžii, danin go dušše su bártnit besset doallat opmodagaset bissovaččat. 18 Oaivámuš ii oaččo váldit maidege mii gullá álbmogii, son ii oaččo ádjit ovttage eret su iežas eatnamis. Oaivámuš galgá addit opmodagaid bártniidasas iežas eatnamis, vai ii oktage mu álbmogis áddjojuvvo eret opmodagastis.
Tempela gievkkanat
19 Olmmái doalvvui mu sisa dan uksaráigge mii lei báhpaid bassi gámmáriid poartta guoras davábealde. Váccahaga don geažes, dan oarjjageahčen, lei latnja. 20 Son dajai munnje: “Dán lanjas báhpat vuššet vealgeoaffara ja suddooaffara ja láibot borramušoaffara, amaset doalvut oaffariid olggut ovdašilljui ja dahkat daiguin álbmoga bassin.” 21 Son doalvvui mu olggut ovdašilljui ja de ain ovdašilju njealji čihkii, ja mun oidnen ahte ovdašilju juohke čiegas lei uhcit šillju. 22 Dat uhcit šiljut ovdašilju njealji čiegas ledje njealljelogi állana guhku ja golbmalogi állana govddu. Buot njealji šiljus ledje ovttahat mihtut. 23 Dan njealji šilju birra lei geađgemuvra, ja muvrra gurrii ledje dahkkojuvvon vuoššansajit. 24 Olmmái dajai munnje: “Dáin gievkkaniin tempelsaji bálvaleaddjit vuššet álbmoga njuovvanoaffariid.”