Esekiel

Israela eahpeipmilbálvalusa ráŋggáštus

¹ Munnje bođii dát Hearrá sátni: ² Olmmoš, jorgal muođuid Israela váriid guvlui ja gulat daidda mu duomu. ³ Cealkke ná: Israela várit, gullet Hearrá Ipmila sáni! Ná cealká Hearrá Ipmil váriide ja dieváide, ájarokkiide ja legiide: Mun vuolggahan miehki din vuostá ja duššadan din oaffarbáikkiid. ⁴ Din oaffaráltárat hearjiduvvojit ja din suovasáltárat skálbmojuvvojit, ja din olbmuid mun gottán ja bálkestan iežadet ipmilgovaid ovdii. ⁵ Mun bálkestan israellaččaid rupmašiid sin ipmilgovaid ovdii ja biđgen sin dávttiid sin áltáriid birra. ⁶ Gos ihkinassii dii ássabehtet, de din gávpogat duššaduvvojit ja din oaffarbáikkit šaddet ávdimin. Din oaffaráltárat hearjiduvvojit ja gahččet geađgelátnan, din ipmilgovat skálbmojuvvojit ja duššaduvvojit, din suovasáltárat cuvkejuvvojit, din duojit jávkaduvvojit, ⁷ ja gottáhallan olbmot njaŋgájit juohke sajis din gaskkas. Dalle dii ipmirdehpet ahte mun lean Hearrá. ⁸ Soapmásiid dis mun divttán báhtarit miehkis ja boahtit eará álbmogiid gaskii ja biđgejuvvot vieris eatnamiidda. ⁹ Dalle sii muitet mu daid álbmogiid gaskkas gos sii leat fáŋgan, mo mun lean cuvken sin oskkáldasmeahttun váimmu mii gáiddai mus, ja sin oskkáldasmeahttun čalmmiid mat hipmošemiin gehčče ipmilgovaide. Sii fasttášit iežaset buot bahás daguideaset dihte ja buot fastivuođaideaset dihte maid leat dahkan. ¹⁰ Dalle sii oidnet ahte mun, Hearrá, in sárdnon guoros sániid, go áiten sin dáinna lihkuhisvuođain.

¹¹ Ná cealká Hearrá Ipmil: Spežže gieđaid, duolmma julggiiguin eatnama ja čuorvvo: “Vuoi!” Váidal buot fasttes ja bahás daguid maid israellaččat leat dahkan ja maid geažil sii gahččet miehkkái, nelgot jámas ja jápmet rohttudávdii. ¹² Dat gii lea guhkkin, jápmá rohttudávdii, dat gii lea lahka, gahččá miehkkái ja dat gii lea báhcán ja bisson heakkas, nealgu jámas. Ná mun gurren iežan moari sidjiide. ¹³ Dalle sii ipmirdit ahte mun lean Hearrá, go sin gottáhallan olbmot njaŋgájit bieđgguid sin ipmilgovaid gaskkas ja sin áltáriid birra, juohke alla dievás ja juohke várrealážis, juohke rudnes muora ja juohke lastás terebintta vuolde, buot dain sajiin gos sii leat oaffaruššan ipmilgovaidasaset oaffariid main lea soažžudeaddji hádja. ¹⁴ Mun bajidan gieđa sin vuostá, ja juohke sajis gos sii ásset, mun dagan eatnama ávdimin ja ruojusin meahci rájes gitta Ribla rádjái. Dalle sii ipmirdit ahte mun lean Hearrá.