Vuosttaš Mosesgirji

Adama sohkalogahallan

¹ Dát lea Adama sohkalogahallan. Go Ipmil sivdnidii olbmo, de dagai su Ipmila govvan. ² Olmmájin ja nissonin son sivdnidii sudno. Son buressivdnidii sudno ja bijai sudno namman olmmoš dalle go sivdnidii sudno.

³ Go Adam lei eallán čuođigolbmalogi jagi, de sutnje riegádii bárdni gii lei su láhkásaš, su govva, ja son bijai su namman Set. ⁴ Seta riegádeami maŋŋil Adam elii vel gávccičuođi jagi, ja sutnje riegádedje bártnit ja nieiddat. ⁵ Adama oppa eallináigi lei ovccičuođi golbmalogi jagi; de son jámii.

⁶ Go Set lei eallán čuođivihtta jagi, de sutnje riegádii Enoš. ⁷ Enoša riegádeami maŋŋil Set elii vel gávccičuođičieža jagi, ja sutnje riegádedje bártnit ja nieiddat. ⁸ Seta oppa eallináigi lei ovccičuođi guoktenuppelohkái jagi; de son jámii.

⁹ Go Enoš lei eallán ovccilogi jagi, de sutnje riegádii Kenan. ¹⁰ Kenana riegádeami maŋŋil Enoš elii vel gávccičuođi vihttanuppelohkái jagi, ja sutnje riegádedje bártnit ja nieiddat. ¹¹ Enoša oppa eallináigi lei ovccičuođivihtta jagi; de son jámii.

¹² Go Kenan lei eallán čiežalogi jagi, de sutnje riegádii Mahalalel. ¹³ Mahalalela riegádeami maŋŋil Kenan elii vel gávccičuođi njealljelogi jagi, ja sutnje riegádedje bártnit ja nieiddat. ¹⁴ Kenana oppa eallináigi lei ovccičuođilogi jagi; de son jámii.

¹⁵ Go Mahalalel lei eallán guhttalogivihtta jagi, de sutnje riegádii Jered. ¹⁶ Jereda riegádeami maŋŋil Mahalalel elii vel gávccičuođi golbmalogi jagi, ja sutnje riegádedje bártnit ja nieiddat. ¹⁷ Mahalalela oppa eallináigi lei gávccičuođi ovccilogivihtta jagi; de son jámii.

¹⁸ Go Jered lei eallán čuođiguhttalogiguokte jagi, de sutnje riegádii Henok. ¹⁹ Henoka riegádeami maŋŋil Jered elii vel gávccičuođi jagi, ja sutnje riegádedje bártnit ja nieiddat. ²⁰ Jereda oppa eallináigi lei ovccičuođi guhttalogiguokte jagi; de son jámii.

²¹ Go Henok lei eallán guhttalogivihtta jagi, de sutnje riegádii Metušelah. ²² Henok vádjolii Ipmiliin Metušelaha riegádeami maŋŋil vel golbmačuođi jagi, ja sutnje riegádedje bártnit ja nieiddat. ²³ Henoka oppa eallináigi lei golbmačuođi guhttalogivihtta jagi. ²⁴ Henok vádjolii Ipmiliin. Dasto son ii lean šat, dasgo Ipmil válddii su lusas.

²⁵ Go Metušelah lei eallán čuođigávccilogičieža jagi, de sutnje riegádii Lamek. ²⁶ Lameka riegádeami maŋŋil Metušelah elii vel čiežačuođi gávccilogiguokte jagi, ja sutnje riegádedje bártnit ja nieiddat. ²⁷ Metušelaha oppa eallináigi lei ovccičuođi guhttalogiovcci jagi; de son jámii.

²⁸ Go Lamek lei eallán čuođigávccilogiguokte jagi, de sutnje riegádii bárdni. ²⁹ Son bijai su namman Noa ja dajai: “Dát bárdni addá geahpádusa go mii bargat ja rahčat eatnamis maid Hearrá lea garuhan.” ³⁰ Lamek elii Noa riegádeami maŋŋil vel vihttačuođi ovccilogivihtta jagi, ja sutnje riegádedje bártnit ja nieiddat. ³¹ Lameka oppa eallináigi lei čiežačuođi čiežalogičieža jagi; de son jámii.

³² Go Noa lei eallán vihttačuođi jagi, de sutnje riegádedje bártnit Sem, Ham ja Jafet.