Vuosttaš Mosesgirji

Bahávuohta lassána eatnama alde

¹ Go olbmot lassánišgohte eatnama alde, ja sidjiide riegádedje nieiddat, ² de ipmiliid bártnit oidne ahte olbmuid nieiddat ledje čábbát, ja sii válde sis áhkkán daid geaid atne buoremussan. ³ Hearrá celkkii: “Mu eallinvuoigŋa ii oro olbmos agálaččat, dasgo son lea oažži. Lehkos su eallináigi čuođiguoktelogi jagi.”

⁴ Daid beivviid ja vel maŋŋilge ledje stuorra gievrrat eatnama alde, danin go ipmiliid bártnit elle olbmuid nieiddaiguin, ja sii riegádahtte sidjiide mánáid. Sii ledje dološ áiggi sáŋgárat, beakkálmas olbmát. ⁵ Hearrá oinnii ahte olbmo bahávuohta lei stuoris eatnama alde ja ahte su váimmu hutkkit ja jurdagat ledje álo ja ovtto bahát. ⁶ Dalle Hearrá gáđai bahččagit ahte lei dahkan olbmo eatnama ala. ⁷ Ja Hearrá celkkii: “Mun duššadan eatnama alde olbmuid geaid lean sivdnidan, ja oktan singuin buot šibihiid ja njoammuid ja almmi lottiid. Dasgo mun gáđan go lean dahkan daid.” ⁸ Muhto Noa gávnnai árpmu Hearrá čalmmiin.

Noa árka

⁹ Dát lea Noa ja su soga muitalus. Noa lei vuoigatlaš ja láitemeahttun iežas buolvva gaskkas, ja son vádjolii Ipmiliin. ¹⁰ Noai riegádedje golbma bártni: Sem, Ham ja Jafet. ¹¹ Eanan billašuvai ain eambbo Ipmila čalmmiid vuolde ja veahkaváldi devddii eatnama. ¹² Go Ipmil geahčadii eatnama, de son oinnii ahte oppa eanan lei billašuvvan, danin go olbmot golahedje eallimeaset bahávuođas. ¹³ Ipmil celkkii Noai: “Mun lean mearridan duššadit buot mii eallá, danne go olbmot leat deavdán eatnama veahkaválddiin. Mun áiggun duššadit sin oktan eatnamiin. ¹⁴ Hukse alccesat árkka gofermuoras, daga dasa lanjaid ja bihkkat dan siskkil ja olggul. ¹⁵ Hukse árkka ná: Dan guhkkodat galgá leat golbmačuođi állana, govdodat vihttalogi állana ja allodat golbmalogi állana. ¹⁶ Hukse árkii dáhki ja bija dan állanveardde állut. Hukse árkii golbma gearddi ja bija dan gilgii uvssa. ¹⁷ Mun divttán dulvvi gokčat oppa eatnama ja duššadit buot heakkalaččaid almmi vuolde, buot mas lea eallinvuoigŋa. Buot mii lea eatnama alde, duššá. ¹⁸ Muhto duinna mun dagan lihtu. Don galggat mannat árkii, don ja du bártnit, du áhkká ja du bártniid áhkát oktan duinna. ¹⁹ Váldde buot heakkalaččain árkii guokte juohke šlájas, varrása ja njiŋŋelasa, vai dat bissot heakkas oktan duinna. ²⁰ Lottit, šibihat ja eatnama njoammut, guokte ealli guđege šlájas bohtet du lusa, vai dat bissot heakkas. ²¹ Čohkke fárrui buotlágán borramušaid, vai dutnje ja buot earáide livččii biebmu.” ²² Noa dagai buot aiddo nugo Ipmil lei gohččon su dahkat.