Vuosttaš Mosesgirji

Ipmil dahká lihtu Noain

¹ Ipmil buressivdnidii Noa ja su bártniid ja celkkii sidjiide: “Lehket šattolaččat, eatnánehket ja devdet eatnama! ² Buot meahcieallit ja almmi lottit, buot eallit mat lihkadit eatnama alde ja buot mearaguolit soiget ja ballet dis; daid mun attán din gihtii. ³ Din biebmun lea buot mii eallá ja lihkada. Buot daid mun attán dál didjiide, seammá láhkái go mun adden didjiide ruonas šattuid. ⁴ Muhto bierggu mas lea heagga, dat lea varra, dii ehpet oaččo borrat. ⁵ Ja din iežadet vara mun gáibidan mávssahuvvot. Mun gáibidan dan mávssahuvvot juohke eallis ja juohke olbmos gii golggaha iežas lagamučča vara.

⁶ Gii golggaha olbmo vara,

su vara galget olbmot golggahit,

dasgo Ipmil dagai olbmo iežas govvan.

⁷ Lehket šattolaččat ja eatnánehket,

eatnánehket ja levvet

miehtá eatnama.”

⁸ Ipmil celkkii Noai ja su bártniide: ⁹ “Mun dagan dál lihtu dinguin ja din náliin ¹⁰ ja buot heakkalaččaiguin mat leat dinguin, lottiiguin, omiiguin ja buot fuođđuiguin, buot daiguin mat vulge árkkas, buot eatnama elliiguin. ¹¹ Mun dagan dinguin lihtu: Ii goassege šat dulvi heavat buot heakkalaččaid, dat ii goassege šat duššat eatnama.”

¹² Ipmil celkkii vel: “Dát lea dan lihtu mearka maid mun dagan dinguin ja buot heakkalaččaiguin mat leat din luhtte, buot boahttevaš buolvvaid rádjái: ¹³ Mun bijan dávgán balvvaide, ja dat lea mearkan dan lihtus maid mun lean dahkan eatnamiin. ¹⁴ Go mun čohkken balvvaid eatnama badjel ja dávgi oidno balvvain, ¹⁵ de mun muitán lihtton dinguin ja buot heakkalaččaiguin: Čázit eai šat goassege šatta dulvin mii heavaha buot heakkalaččaid. ¹⁶ Go dávgi oidno balvvain, de mun oainnán dan ja muitán agálaš lihtu maid lean dahkan buot eatnama heakkalaččaiguin.” ¹⁷ Ja Ipmil celkkii vel Noai: “Dát lea dan lihtu mearka maid mun dagan buot eatnama heakkalaččaiguin.”

Noa ja su bártnit

¹⁸ Noa bártnit, geat vulge árkkas, ledje Sem, Ham ja Jafet. Ham lei Kanaana áhčči. ¹⁹ Dát golmmas ledje Noa bártnit, ja buot máilmmi olbmot leat sin nális.

²⁰ Noa lei bealdobargi ja vuosttaš gii gilvvii viidnegárddi. ²¹ Go son jugai viinni, de son gárihuvai ja veallái goađis álás. ²² Ham, Kanaana áhčči, oinnii áhčis álásin ja manai olggos muitalit dan vieljas guktui. ²³ Dalle Sem ja Jafet válddiiga biktasa ja lebbiiga dan olggiideaskka ala, manaiga sisa selggiid ja govččaiga áhčiska álásvuođa. Soai leigga nuppos čalmmiid eabage oaidnán áhčiska álásin. ²⁴ Go Noa čielggai gárrenvuođastis ja gulai maid su nuoramus bárdni lei dahkan sutnje, ²⁵ de son dajai:

“Garuhuvvon lehkos Kanaan,

šaddos son vieljaidis šlávaid šlávvan!”

²⁶ Ja son dajai vel:

“Máidnojuvvon lehkos Hearrá,

Sema Ipmil!

Lehkos Kanaan Sema šlávva.

²⁷ Ipmil addos saji Jafetii

ja diktos su ássat Sema gođiin.

Lehkos Kanaan sudno šlávva.”

²⁸ Noa elii golbmačuođi vihttalogi jagi dulvvi maŋŋil. ²⁹ Noa oppa eallináigi lei ovccičuođi vihttalogi jagi; de son jámii.