Jupmele veartenem sjugnede
1 Aalkovistie Jupmele elmiem jïh eatnemem sjugniedi.
2 Eatneme aevries jïh gåaroes. Mearoen vaevlien bijjelen jemhkelde, jïh Jupmelen voejkene tjaetsiej bijjelen sååjteladti. 3 Jupmele jeehti: «Sjïdth tjoevke!» Jïh tjoevke sjïdti. 4 Jupmele vööjni tjoevke hijven, jïh tjoevkem jemhkielistie juekieji. 5 Jupmele tjoevkem biejjine gåhtjoeji jïh jemhkelem jïjjine. Iehkede sjïdti, jïh aerede sjïdti. Voestes biejjie dïhte.
6 Jupmele jeehti: «Gåpmahtasse galka tjaetsien jarngese sjïdtedh jïh desnie tjaetsie galka tjaetseste juakanidh!» 7 Jupmele gåpmahtassem darjoeji jïh tjaetsiem gåpmahtassen nuelesne juekieji tjaetseste mij gåpmahtassen bijjelen. Jïh nemhtie sjïdti. 8 Jupmele gåpmahtassem elmine gåhtjoeji. Iehkede sjïdti, jïh aerede mubpien biejjien sjïdti.
9 Jupmele jeehti: «Tjaetsie elmien nuelesne galka akten sijjesne årrodh guktie eatneme jæjhta». Jïh nemhtie sjïdti. 10 Jupmele gejhkie laantem eatnaminie gåhtjoeji, jïh tjaetsiem mearojne gåhtjoeji. Jupmele vööjni dïhte hijven.
11 Jupmele jeehti: «Eatneme galka kråånedidh, sjædtoeh vetsmiejgujmie sjïdtedh jïh ovmessie moerh muerjiejgujmie.» Jïh nemhtie sjïdti. 12 Eatneme sjædtoeh guedtieji, ovmessie sjædtoeh vetsmiejgujmie jïh ovmessie moerh muerjiejgujmie. Jïh Jupmele vööjni dïhte hijven. 13 Iehkede sjïdti jïh aerede gåalmeden biejjien.
14 Jupmele jeehti: «Tjoevkesh galka gåapmahtassese sjïdtedh mah biejjiem jïjjeste juekieh. Jïh dellie sjïere biejjieh jïh jaepieh sjidtieh! 15 Dah tjoevkesh gelkieh gåapmahtasseste eatnamasse tjoevkedh.» Jïh nemhtie sjïdti. 16 Jupmele dejtie göökte stoere tjoevkide sjugniedi. Stööremes tjoevkese galka biejjege jïh unnemes jïjjege reeredh. Jïh naestide aaj sjugniedi. 17 Jupmele dejtie elmien gåpmahtassese dibrehti eatnamasse tjoevkedh jïh 18 jïjjh biejjieh reeredh. Nemhtie tjoevkem jemhkielistie juekieji. Jïh Jupmele vööjni dïhte hijven. 19 Iehkede sjïdti jïh aerede njealjeden biejjien.
20 Jupmele jeehti: «Ovmessie jielijh gelkieh tjaetsesne sjïdtedh, jïh ledtieh gelkieh gåpmahtassen nuelesne haeliehtidh.» 21 Jupmele stoere faalide, ovmessie guelide jïh jeatjah jielijidie mah tjaetsesne verkiestieh, jïh ovmessie ledtide sjugniedi. Jïh Jupmele vööjni dïhte hijven. 22 Jupmele gaajhkem bueriesjugniedi jïh jeehti: «Jeananidie gaajhkine jaevrine jïh abpe mearosne. Jïh ledtieh eatnamisnie edtjieh jeananidh.» 23 Iehkede sjïdti jïh aerede vïjhteden biejjien.
24 Jupmele jeehti: «Eatneme galka ovmessie jielijh guedtedh: kluhterh, ovmessie smaave jielijh jïh vijrh.» Jïh nemhtie sjïdti. 25 Jupmele ovmessie vijrh, kluhterh jïh smaave jielijh sjugniedi. Jïh Jupmele vööjni dïhte hijven.
26 Jupmele jeehti: «Almetjidie mijjen guelmesne sjugniedibie guktie dah goh mijjieh sjidtieh. Almetjh mearoen gueliej, elmien ledtiej, kluhteri jïh gaajhki vijri jïh eatnemen gaajhki smaave jieliji åvtehkinie leah.» 27 Jïh Jupmele almetjem jïjtse guelmesne sjugniedi, Jupmelen guelmesne gaarmanæjjine jïh nyjsenæjjine sjugniedi. 28 Jupmele bueriesjugniedi jïh jeehti: «Jeananidie eatnamasse. Åvtehkinie lidie jïh mearoen guelide, elmien ledtide jïh eatnemen gaajhkide kluhteridie edtjede reeredh.»
29 Jïh Jupmele jeehti: «Vuartasjidie, dijjese eatnemen gaajhkide sjædtojde vadtam jïh gaajhkide moeride mah muerjieh guedtieh. Daah dijjen beapmoeh. 30 Kruana sjædtoeh eatnemen vijride, elmien ledtide, gaajhkide mah svihtjieh jïh gaajhkide jieliemidie, vadtam.» Jïh nemhtie sjïdti. 31 Jupmele vööjni gaajhkh mejtie sjugniedamme, joekoen hijven. Iehkede sjïdti jïh aerede govhteden biejjien.