Girji hebrealaččaide

Jesus lea stuorit go Moses

¹ Dan dihte, bassi vieljažiiddán, dii geat lehpet ožžon almmálaš rávkojumi, gehččet Jesusii gii lea min dovddastusa apostal ja bajimusbáhppa. ² Son lei oskkáldas sutnje guhte su ásahii, nugo Moses lei oskkáldas oppa Ipmila viesus, ³ muhto son lea adnojuvvon dohkálažžan oažžut dađi stuorit gudni go huksejeaddji gudni lea stuorit go viesu gudni. ⁴ Juohke viesu lea soamis huksen, muhto Ipmil lea huksen buot. ⁵ Moses lei gal oskkáldas oppa Ipmila viesus, muhto dattetge dušše bálvaleaddji, ealli duođaštus das maid Ipmil maŋŋil sártnui. ⁶ Muhto Kristus lea Bárdni gean háldui oppa Ipmila viessu lea oskkilduvvon. Ja su viessu leat mii, go mii fal loahpa rádjái doallat gitta roahkkatvuođasteamet ja dorvvolažžan rámádallat doaivvus mii mis lea.

Eahpeosku ja jeagohisvuohta

⁷ Dan dihte, nugo Bassi Vuoigŋa cealká:

Jos dii otná beaivvi gullabehtet su jiena,

⁸ de allet buoššut váimmodet

nugo dalle go stuimmáskeiddet,

go geahččaleiddet mu meahcis.

⁹ Doppe din áhčit guorahalle mu ja geahččaledje mu –

ja šadde njealljelogi jagi vásihit maid sidjiide dahken.

¹⁰ Mun moaráhuvven sin bulvii ja celken:

Álelassii sii čádjádallet váimmusteaset.

Sii eai dáhtton vádjolit mu geainnuid,

¹¹ ja dalle mun vurdnon moaristan:

Sii eai goassege beasa boahtit mu vuoiŋŋadussii.

¹² Váruhehket, vieljažiiddán, vai ii guđesge dis leat bahás ja eahpeoskkolaš váibmu, nu ahte son hilgu ealli Ipmila. ¹³ Arvvosmahttet guhtet guimmiideattet juohke beaivvi nu guhká go daddjojuvvo odne, vai ii oktage dis fillehala suddui ja buošo. ¹⁴ Miihan leat šaddan oasálažžan Kristusii, go fal loahpa rádjái doallat nannosit gitta dan luohttámušas mii mis lei juo álggus. ¹⁵ Čállagiin celkojuvvo: Jos dii otná beaivvi gullabehtet su jiena, de allet buoššut váimmodet nugo dalle go stuimmáskeiddet. ¹⁶ Geat ledje dat geat gulle, muhto almmatge stuimmáskedje? Buohkat geaid Moses lei buktán eret Egyptas. ¹⁷ Geaidda Ipmil lei moaris njealljelogi jagi? Daidda geat suddudedje ja geaid rupmašat gáhčče meahccái. ¹⁸ Geaidda son vuortnui ahte sii eai beasa boahtit su vuoiŋŋadussii? Daidda geat eai doahttalan. ¹⁹ Mii oaidnit nappo dalle ahte eahpeoskku dihte sii eai sáhttán ollet dasa.