Gi hjerteStøtt nettbibelen
Gå til forsiden

Hosea

12

Hearrá ráŋggášta Jakoba

1 Efraim lea birastahttán mu giellásiin,

Israela álbmot behttosiin.

Muhto Juda lea ain oskkáldas Ipmilii

ja bissu čuožžumis Basi ovddas.

2 Efraim váinnuha biekka,

doarrida nuortabiekka oppa beaivvi,

son láne giellásiid ja veahkaválddi.

Sii dahket lihtu Assyriain,

ja dolvot oljju Egyptii.

3 Hearrá áššáskuhttá Juda,

son ráŋggášta Jakoba su daguid dihte

ja mávssaha sutnje

dan maid son lea dahkan.

4 Goaŧus son behtii vieljas,

olmmáivuođastis son fággádii Ipmiliin.

5 Son fággádii eŋgeliin ja biđii,

son čierui ja ánui árpmu.

Betelis Ipmil gávnnai su,

doppe son sártnui suinna.

6 Hearrá, almmiveagaid Ipmil,

Hearrá lea su namma.

7 Muhto máhca don Ipmilat lusa,

biso oskkáldassan ja vuoiggalažžan

ja bija álo doaivvu Ipmilasat.

8 Efraim lea dego kanaanlaš gávppašeaddji,

vearreviehkat gieđas.

9 Efraim cealká: “Mun lean riggon

ja háhkan opmodaga,

muhto buot rikkisvuođastan

mun in leat šaddan sivalažžan

makkárge suddui.”

10 Muhto mun lean Hearrá, du Ipmil,

gitta Egypta rájes.

Mun bijan du fas ássat gođiide dego dolin.

11 Mun sárdnon profehtaide,

mun dikten sin oaidnit ollu oainnáhusaid,

ja profehtaid bokte mun sárdnon

veardádusaiguin.

12 Jos Gilead lea vearálaš,

de dat duššaduvvo.

Jos sii oaffaruššet vuovssáid Gilgalis,

de sin áltárat šaddet geađgečopman

bealdduid jorgunluottaid báldii.

13 Jakob báhtarii Arama eatnamii,

Israel bálvalii nissona dihte,

nissona dihte son geahčai sávzzaid.

14 Hearrá buvttii Israela Egyptas,

profehta lei dan njunnošis,

profehta dan geahčai.

15 Efraim lea boktán bahča moari.

Hearrá diktá dan deaivvahaddat

iežas varradahkui,

mávssaha dasa dan hiddjádusaid.

Les vår personvernserklæring
Skjemaet er beskyttet av reCAPTCHA og Googles Privacy Policy og Terms of Service gjelder.