Ipmil dáhttu oskkáldasvuođa
1 Bohtet, máhccot Hearrá lusa!
Son gaikkodii, ja son maid dálkkoda min,
son časkkii, ja son maid čatná min háviid.
2 Son ealáskahttá min
guovtti beaivvi geažes,
goalmmát beaivvi son čuoččáldahttá min,
vai mii beassat eallit su muođuid ovddas.
3 Ohppot dovdat Hearrá, viggot dovdat su!
Son boahtá vissásit go iđitguovssu,
son boahtá min lusa dego arvi,
dego giđđaarvi mii láktada eatnama.
4 Maid mun galggan dahkat dutnje, Efraim,
maid dutnje, Juda?
Din oskkáldasvuohta lea dego iđitbalva,
dego suoldni mii jávká árrat.
5 Dan dihte mun lean vuolggahan
profehtaidan časkit sin,
lean goddán sin mu sániiguin.
Mu duopmu ihtá dego čuovga.
6 Váibmoláđisvuođa mun dáhtun,
inge njuovvanoaffara,
Ipmila dovdamuša eambbo go
boaldinoaffariid.
7 Sii rihkko lihtu Adamis,
doppe sii ledje munnje
oskkáldasmeahttumat.
8 Gilead lea vearredahkkiid gávpot,
dan dievva leat varraluottat.
9 Báhpat vuđgŋet dego rievvárat,
sii goddet olbmuid Sikema geainnus.
Sin dagut leat heahpatlaččat.
10 Israela álbmoga siste
mun lean oaidnán surgatlaš áššiid.
Doppe Efraim furroša,
Israel dahká iežas buhtismeahttumin,
11 ja nu maiddái Juda.
Áigi boahtá go don láddjejuvvot.
Go mun jorgalahtán álbmogan vuorbbi,