Israel lea vajáldahttán sivdnideaddjis
1 Bajit dorvve baksamiiddásat!
Vašálaš falleha Hearrá viesu dego goaskin,
dasgo sii leat duolbman mu lihtu
ja rihkkon mu lága.
2 Dat čuorvu munnje: “Ipmilan!
Mii dovdat du, mii leat Israel!”
3 Israel lea hilgon buori,
vašálaš doarrida dan.
4 Sii válljejit alccesis gonagasaid
mu dáhtu vuostái
ja oaivámuččaid geaid mun in dovdda.
Iežaset silbbas ja gollis sii leat duddjon
alcceseaset eahpeipmiliid iežaset heavvun.
5 Bálkes eret bálvvosgálbbát, Samaria!
Mu moarri buollá du vuostá.
Man guhká don bisut
buhtismeahttunvuođastat?
6 Mii dahkamušaid Israelis lea
duoinna gálbbiin?
Čeahppi dan lea duddjon, ii dat leat Ipmil.
Moallun šaddá Samaria gálbi!
7 Sii gilvet biekka ja láddjejit riđu.
Gortnit eai diehpa,
dat mii šaddá, ii atte jáffuid,
ja jos addá, de vierroolbmot borret daid.
8 Israel lea njillojuvvon,
álbmogat atnet dan árvvohis lihttin.
9 Israel manai Assyriai
dego oktonas meahcceásen.
Efraim oastá alccesis ráhkisvuođa.
10 Vaikko efraimlaččat
ostet ustibiid álbmogiin,
de mun áján sin dál čoahkkái.
Sii šaddet fargga gillát
go Assyria gonagas
ja oaivámuččat sordet sin.
11 Efraima eatnat buhtistanáltárat
leat šaddan buhtismeahttunvuođa áltárin.
12 Vaikko mun čálášin sidjiide
duháhiid lágaid,
de sii eai ane daid maninge.
13 Sii oaffaruššet bierggu
maid sii dasto borret,
muhto Hearrá ii beroš sin oaffariin.
Dál son muitá sin vearredaguid
ja ráŋggášta sin suttuid:
Sii fertejit máhccat Egyptii.
14 Israel lea vajáldahttán sivdnideaddjis
ja ráhkadan šloahtaid,
Juda lea huksen ladniid máŋgga gávpogii.
Muhto mun vuolggahan dola
dan gávpogiid vuostá,
dat duššada dan ladniid.