1 Vuolggahehket lábbá
eatnama ráđđejeaddjái,
meahccebávttis Sionvárrái.
2 Nugo ballán lottit
mat girdilit beasis,
nu bohtet Moaba nieiddat
Arnona gálabáikkiide.
3 “Atte neavvaga, gávnna ráđi!
Divtte beaiveguovdil iežat suoivana
šaddat ija suddjejeaddji
seavdnjada láhkásažžan.
Čiega daid geat leat áddjojuvvon eret,
ale ivtte báhtareddjiid!
4 Divtte Moaba biđgejuvvon olbmuid
gávdnat dorvvu du luhtte.
Leage sin suodji heavaheaddji vuostá.”
“Go veahkaváldi nohká
ja heavahus loahppá,
go dat gii soardá eatnama lea eret,
5 dalle ceggejuvvo truvdnu
árbmugasvuođas,
ja Ipmila oskkáldasvuođas
ráđđe duopmár Davida ladnis,
duopmár gii ohcá vuoigatlašvuođa
ja diehtá mii lea riekta.”
6 Mii leat oaidnán Moaba
goarratvuođa
– man meareheapme dat lea! –
su čeavláivuođa,
goarratvuođa ja snielisvuođa.
Heabuheapme lea su šloapma.
7 Danne moablaččat fuikot,
oppa Moab fuoiku.
Hearddohuvvan olbmot muittašit
Kir-Hareseta viidnemuorjegáhkuid.
8 Hešbona viidnegárddit
leat billašuvvan,
goldnan leat Sibma viidnemuorat,
maid buorit viidnemuorjjit njeide
álbmogiid ráđđejeddjiid.
Daid suorggit olle gitta Jasera rádjái,
fatne meahccái
ja geaiganedje meara badjel.
9 Dan dihte mun čierun Jaseriin
Sibma viidnemuoraid,
mun láktadan din gatnjaliiddánguin,
Hešbon ja Elale.
Go dii leiddet rádjamin
šaddosiiddádet ja šattuideattet,
de fallehedje bilideaddjit.
10 Illu ja ávvu lea jávkan
gilvvagárddiin,
ii oktage lávllo iige čuorvvo ilus
viidnegárddiin.
Ii oktage duolmma viidnemurjjiid
bohčingáriin,
rádjanáiggi ávvučuorvasat leat jávohuvvan.
11 Dan dihte mu váibmu váidala
lyra láhkái Moaba dihte,
mu siellu váidala Kir-Heresa geažil.
12 Go moablaččat oaffarbáikkis váibadit iežaset ja mannet bassibáikáseaset rohkadallat, de das ii leat ávki.
13 Dát lei sátni maid Hearrá ovdal sártnui Moabii. 14 Dál Hearrá cealká ná: “Golmma jagi geažes, mat leat nugo beaivebálkkolačča jagit, de Moab ja buot dan olmmošeatnatvuohta vuoliduvvo. Ii báze eará go uhca bázahasaš.”