Samaria duopmu
1 Vuoi Efraima juhkkiid
goargadis kruvnnu,
vuoi čáppa čiŋa goldnan liđiid
mat hervejit viinnahuvvan
olbmáid oaivečohka!
2 Geahča, Hearrás lea muhtin
gii lea gievra ja fámolaš
dego čuorpmasoakti
dahje heavaheaddji riđđu,
nugo ráššoarvi ja dulvi.
Gieđainis son časká eatnama,
3 julggiidisguin son duolbmá
Efraima juhkkiid goargadis kruvnnu.
4 Čáppa čiŋa goldnan liđiide,
mat leat šattolaš leagi
oaivečohka kruvdnu,
geavvá dego giđđageasi fiikonii:
Dalán go soamis oaidná dan,
de son váldá dan ja njielasta.
5 Dan beaivvi Hearrá, Almmiveagaid Ipmil, šaddá iežas álbmoga bázahasa hearvás kruvdnun ja gudnegierdun. 6 Son addá vuoigatvuođa vuoiŋŋa daidda geat dubmejit ja givrodaga daidda geat ádjet vašálaččaid olggos poarttas.
Duopmosátni báhpaide ja profehtaide
7 Muhto maiddái dáppe
olbmot suibbodit viinni dihte,
ruosadit garra juhkamuša geažil.
Báhpat ja profehtat leat juhkaluvvan,
áibbas gárihuvvan viinnis.
Sii suibot garra juhkamuša dihte,
ruosadit go oidnet oainnáhusaid,
gusset go leat cealkimin duomu.
8 Buot bevddiid dievva lea vuovssanas,
ii leat ii buhtes dielkuge.
9 “Gean profehta áigu máhttáhit?
Geasa son áigu oahpahit iežas sága?
Botkehuvvon mánáidego,
daidda geat leat
aiddo váldojuvvon čiččis?
10 Báhkkon báhkkoma ala,
gáibádus gáibádusa ala,
veahá dás ja veahá duos!”
11 Duođaid, áddemeahttun suopmaniin
ja amas gillii Hearrá sárdnu dán álbmogii,
12 son gii celkkii sidjiide:
“Dá lea vuoiŋŋastanbáiki,
diktet váiban olbmo vuoiŋŋastit!
Dás lea áhpásmahttojupmi.”
Muhto sii eai dáhtton gullat.
13 Sidjiide Hearrá sátni šaddá
báhkkomin báhkkoma ala,
gáibádussan gáibádusa ala,
veahá dás ja veahá duos.
Váccedettiin sii guossalit,
gahččet gávvut ja bávččagit bahuid,
roahkkasit gillii ja giddanit.
14 Gullet dan dihte Hearrá sáni,
dii bilkideaddjit,
dán álbmoga ráđđejeaddjit
geat ássabehtet Jerusalemis!
15 Dii dadjabehtet:
“Mii leat dahkan lihtu jápmimiin,
šiehtadan soahpamuša jábmiidáimmuin.
Go dulvi boahtá šáva,
de dat ii ole min rádjái.
Mii leat dahkan behttosa iežamet suodjin
ja čiehkádan giellása duohkái.”
16 Dan dihte Hearrá Ipmil cealká ná:
Geahča, mun bijan Sionii čiehkageađggi,
geahččaluvvon geađggi,
divrras, nana čiehkageađggi.
Dat gii osku, ii muosehuva.
17 Mun dagan rievtti mihttobáddin
ja vanhurskkisvuođa loaddaárpun.
Čuorbmasat njámastit
giellása suoji,
čáhcedulvi doalvu mielddis
čiehkádanbáikki.
18 Dalle din lihttu jápmimiin
fámohuhttojuvvo,
din šiehtadus jábmiidáimmuin
gomihuvvo.
Go dulvi boahtá,
de dat njeaidá din.
19 Juohke háve go dat boahtá,
de dat rohtte din mielddis.
Dat boahtá juohke iđida,
velá beaivet ja ihkkunai.
Dat gii ipmirda sága,
šaddá doarggistit balus.
20 Seaŋga lea beare oanehaš
das fanahallat,
ja govččas ilá seaggi
giessat dan sisa iežas.
21 Hearrá čuožžila dego Perasimváris,
son moaráhuvvá nugo Gibeonleagis.
Son dahká dagus, amas dagus,
son ollašuhttá barggus, imašlaš barggus.
22 Heitet bilkideames,
vai din láhkkit eai čavgejuvvo.
Mun lean gullan ahte Hearrá Ipmil,
Almmiveagaid Ipmil,
lea mearridan duššadit oppa eatnama.
Ipmila viisodat lea stuoris
23 Jorgalehket beljiid
ja guldalehket go mun sártnun,
váldet vuhtii ja gullet mu sániid!
24 Gárvvistagoson eananjorgu
bealddu álohii gilvima várás,
rahpágo ja hárve dan álelassii?
25 Iigo son gilvve go lea jalgen bealddu?
Son gilvá čáhppeskumminiid
ja biđge máisttakumminiid,
son gilvá nisuid, hirsegortniid,
bivggiid ja spealttaid.
26 Hearrá oahpaha sutnje
rivttes vuogi,
su Ipmil máhttáha sutnje mo bargat.
27 Ii oktage ráidne
čáhppeskumminiid reagain
iige fierat jorreráhttá
máisttakumminiid badjel.
Čáhppeskumminiid galgá časkit soppiin
ja máisttakumminiidgis asttáhagain.
28 Cuvkejuvvojitgo láibegortnit?
Dat eai ráidnejuvvo heaittekeahttá,
jorreráhtis ii fierahuvvo daid badjel,
lebbejuvvon gortnit eai cuvkejuvvo.
29 Maiddái dat boahtá
Hearrás, Almmiveagaid Ipmilis.
Su ráđit leat ovddolaččat,
su viisodat stuoris.