Hearrá lonista Israela
1 Dál cealká Hearrá,
son guhte sivdnidii du, Jakob,
son guhte hábmii du, Israel:
Ale bala, mun lean lonistan du,
mun lean addán dutnje du nama,
don leat mu.
2 Go don manat čáziid čađa,
de mun lean duinna,
rávnnjit eai heavat du.
Go don manat dola čađa,
de dat ii guorbat du
iige dollanjuovčča boaldde du.
3 Mun lean Hearrá, du Ipmil.
Mun, Israela Bassi, beasttán du.
Mun attán Egypta lonisin du ovddas,
Kuša ja Seba du sadjái.
4 Don leat munnje mávssolaš,
mun gudnejahtán ja ráhkistan du.
Dan dihte mun attán olbmuid du sadjái,
álbmogiid máksun du heakka ovddas.
5 Ale bala, munhan lean duinna.
Mun vieččan du náli nuortan,
mun čohkken din buohkaid oarjin.
6 Davvái mun cealkkán: “Atte sin munnje!”
ja lullái: “Luoitte sin vuolgit!”
Buktet mu bártniid guhkkin,
mu nieiddaid eatnama ravddain,
7 buohkaid geat namahuvvojit mu namain,
buohkaid geaid mun lean sivdnidan,
dahkan ja hábmen iežan gudnin.
Aivve fal Hearrá sáhttá beastit
8 Rávkka ovdan álbmoga
mii lea čalmmeheapme
vaikko das leat čalmmit,
mii lea bealjeheapme,
vaikko das leat bealjit.
9 Buot álbmogat čoahkkanit,
olbmuid čearddat bohtet čoahkkái.
Guhtemuš dain sáhtii gulahit dákkáriid
ja muitalit midjiide dan
mii dáhpáhuvai ovdal?
Buktoset sii ovdan duođašteddjiideaset,
čájehehkoset ahte leat vuoigadis,
nu ahte earát gulašedje ja dajašedje:
“Duohta gal lea.”
10 Muhto mu duođašteaddjit,
cealká Hearrá, lehpet dii
– Israel, don gean mun lean válljen
iežan bálvaleaddjin –
ja dii galgabehtet dovdat mu
ja oskut munnje,
ipmirdit ahte mun lean Ipmil.
Mu ovdal ii leat leamaš ipmil,
iige boađe mu maŋŋil.
11 Mun, mun lean Hearrá,
earret mu ii leat beasti.
12 Mun lean sárdnon,
mun lean beastán,
mun lean almmuhan didjiide
iežan dáhtu,
mun ieš, ii oktage amas ipmil.
Dii lehpet mu duođašteaddjit,
cealká Hearrá.
Mun lean Ipmil,
13 ja maiddái boahtteáiggis
mun lean seammá.
Ii oktage sáhte gaikkihit maidege
mu gieđas.
Gii sáhttá dahkat duššin mu daguid?
Hearrá ođđa oavdudagut
14 Ná cealká Hearrá, din lonisteaddji,
Israela Bassi:
Maid mun dagan Babylonii,
dan mun dagan din dihte.
Mun cuvken buot dan poarttaid smarttiid,
ja luoimmasin rivdet
kaldealaččaid illučuorvasat.
15 Mun lean Hearrá, din Bassi Ipmil,
Israela sivdnideaddji, din gonagas!
16 Ná cealká Hearrá,
son gii dagai geainnu áhpái,
bálgá veagalaš čáziid čađa,
17 son gii divttii heasttaid ja vovnnaid
ja gievrras soahteolbmáid lihkkasit mátkái
– čiekŋalasas sii dál njaŋgájit
eaige šat čuožžil,
dego lámppá jáddi dollanjuovčča
sii jávke –
ná son cealká:
18 Allet jurddaš dološ dáhpáhusaid,
allet smiehta vássán áiggiid!
19 Dál mun dagan juoidá ođđasiid.
Dat lea juo bohciideamen ovdan,
ehpetgo dii fuomáš?
Mun dagan geainnu meahccái,
eanuid ávdin eatnamii.
20 Meahcieallitge gudnejahttet mu,
šakálat ja struhcat,
danne go mun lean buktán čázi
čázehis meahccái,
jogaid jakŋa eatnamii,
vai mu álbmot maid mun lean válljen,
beassá juhkat.
21 Álbmot maid mun lean
ráhkadan alccesan,
lávlu mu rámádusa.
Israela suddu, Hearrá árbmu
22 Don it čurvon mu, Jakob,
don it rahčan mu dihte, Israel.
23 It don leat buktán munnje
sávzzaid boaldinoaffarin
itge gudnejahttán mu njuovvanoaffariiguin.
Mun in váivvidan du borramušoaffariin
inge váibadan du suovvasiin.
24 It don leat oastán munnje kalmusa,
it gallehan mu
njuovvanoaffariiddát buiddiin.
Don baicce leat givssidan mu suttuidatguin,
váivvidan mu vearredaguidatguin.
25 Muhto mun, mun sihkun
du vearredaguid iežan dihte
inge šat muitte du suttuid.
26 Váidde mu, lágasteahkku!
Bija áššát ovdan, vai oaččut vuoigatvuođa!
27 Juo du máddu suddudii,
du njunušolbmát hilgo mu.
28 Dan dihte mun vuolidin
du bassi oaivámuččaid,
vihahin Jakoba duššadeapmái,
dikten Israela hiddjiduvvot.