Viidnegárdelávlla
1 Mun dáhtun lávlut ráhkis ustiban lávlaga,
mu ustiba ja su viidnegárddi lávlaga.
Mu ustibis lei viidnegárdi
šattolaš dievás.
2 Son guohkai dan,
rájai das geđggiid
ja gilvvii dasa buriid viidnemuoraid.
Son huksii dasa fáktentoartna
ja čuolai báktái bohčingári.
Son doaivvui oažžut njálgga viidnemurjjiid,
muhto viidnegárdi šaddadii
sutnje rihča viidnemurjjiid.
3 Ja dál, Jerusalema ássit ja
Juda olbmát, dubmejehket
mu ja mu viidnegárddi gaskka!
4 Maid mun livččen sáhttán
vel dahkat viidnegárdásan
maid in juo lean dahkan?
Mun doivon oažžut njálgga viidnemurjjiid,
manne dat de šaddadiige rihččagiid?
5 Dál mun muitalan didjiide
maid áiggun dahkat viidnegárdásan.
Mun gaikkun dan birra áiddi
nu ahte dat guorbá,
mun njeaiddán dan muvrra
nu ahte dat duolbmašuvvá.
6 Mun guođán dan goarránit.
Dat ii šat čuhppojuvvo, ii guhkkojuvvo,
dat šaddada bastilislánjáid ja gáskálasaid.
Mun gielddán balvvaid arvimis dasa.
7 Hearrá, Almmiveagaid Ipmila,
viidnegárdi lea Israel,
Juda čearda su ráhkis šaddogárdi.
Son doaivvui vuoigatvuođa,
muhto bođii veahkaváldi,
son sávai vuoigatlašvuođa,
muhto šattai vuoigatmeahttunvuohta.
Vuoi din!
8 Vuoi din geat laktibehtet viesu vissui
ja bealddu beldui,
dassážii go ii báze šat sadji,
ja dii okto eaiggáduššabehtet eatnama!
9 Hearrá, Almmiveagaid Ipmil,
lea almmustahttán munnje dán:
Duođaid, eatnat viesut báhcet ávdimin,
stuorra ja čáppa viesut
almmá ássiid haga.
10 Logi plovenviidodaga gárdi
addá dušše ovtta fárpala viinni,
logi mihtu gilvagat
dušše ovtta mihtu gortniid.
11 Vuoi daid geat lihkket iđđesárrat
ohcat garra juhkamuša,
daid geat bánžžagit viinnis
gitta maŋŋiteahkedii!
12 Sin illun leat lyrat ja hárppat,
rumbbut ja njurgganasat,
ja viidni golgá sin jugalmasain.
Muhto Hearrá dujiid sii eai oainne,
su gieđaid daguid sii eai áicca.
13 Dan dihte mu álbmot
dolvojuvvo eatnamisttis
ovdal go sii oppa árviditge.
Dan stuorrát jápmet nealgái,
dan šlámaideaddji joavku goiká jámas.
14 Danin jábmiidáibmu lea galjidan njielus
ja rahpan njálmmis caggasii.
Dohko njidjet gávpoga stuorrát,
dohko šlámaideaddji joavku
oktan ávvudemiinis.
15 Olmmoš šaddá vuollánit,
olmmái ferte čippostit,
ja čeavlás čalmmit gehččet eatnamii.
16 Muhto Hearrá, Almmiveagaid Ipmil,
lea stuoris go son dubme,
Bassi Ipmila bassivuohta
lea oaidnimis su vuoigatlaš duomuin.
17 Doppe lábbát ohcet guohtuma
dego láidomis,
gihcit guhtot rikkis olbmuid
viessobázahasain.
18 Vuoi daid geat gesset suttu
gielisvuođa báttiin,
sivalašvuođa dego fievrrut vovnnaid,
19 daid geat dadjet:
“Vare son doamašii,
vare son dagašii fargga daguidis,
vai mii beassat oaidnit dan.
Vare ollašuvašii
dat maid Israela Bassi lea mearridan,
vai oažžut vásihit dan.”
20 Vuoi daid geat gohččot bahá buorrin
ja buori bahán,
geat dahket seavdnjadasa čuovgan
ja čuovgga seavdnjadassan,
rihččaga njálggisin ja njálgá rihčan!
21 Vuoi daid geat atnet iežaset viissisin
ja leat iežaset mielas hui jierpmálaččat!
22 Vuoi daid geat leat sáŋgárat
viidneruhku guoras,
gievrrat seaguhit garra juhkamuša!
23 Sii áššehuhttet sivalačča
go ožžot duolgguid.
Dain geat leat sivaheamit,
sii biehtadit vuoigatvuođa.
24 Dan dihte: Nugo dolla loaktá oalggaid
ja suoinnit jávket dollii,
nu misket sin ruohttasat
ja sin lieđit bosastuvvojit gavjan.
Sii leat hilgon Hearrá,
Almmiveagaid Ipmila, lága,
sii leat badjelgeahččan Israela Basi sáni.
25 Dan dihte Hearrá moaráhuvvá
iežas álbmogii,
son bajida gieđa ja časká.
Dalle várit doarggistit,
ja gáhtain njaŋgájit rupmašat dego durdi.
Dattetge su moarri ii leat sožžon,
su giehta lea ain bajiduvvon.
Vašálaš boahtá gáidosis
26 Hearrá lokte soahteleavgga
gáiddus álbmogii,
rávká dan soahteolbmáid eatnama ravddain.
Johtilit dat bohtet,
27 ii oktage váibba, ii oktage guossal,
ii oktage adjágastte, ii oktage oađestuva.
Ii ovttage boagán loačča,
ii ovttage gámagarca boatkan.
28 Sin njuolat leat basttálmahttojuvvon,
buot dávggit leat gealdagasas.
Heasttagaccat leat garrasat dego didnu,
vovnnaid juvllat dego jorribiegga.
29 Sin čeargun lea dego ledjona čeargun,
sin jietna dego nuorra ledjona jietna.
Hara sii dohppejit sállašii
ja gesset dan eret,
iige oktage sáhte dan gádjut.
30 Dan beaivvi dat gáiddus álbmot
boahtá dán eatnamii mára,
dat máraida dego mearra.
Gosa olmmoš ain geahčasta,
de lea dušše seavdnjadas ja áŧestus.
Seavdnjadas lea jávkadan čuovgasa.