Ipmil rávká Jesaja profehtan
1 Gonagas Ussia jápminjagi mun oidnen Hearrá: Son čohkkái alla ja aliduvvon truvnnus, ja su oalgebiktasa healmmit devde tempela. 2 Su bajábealde čužžo serafat, guhtta soaji guđesge. Guvttiin sii gokče ámadaju, guvttiin sii gokče julggiid, ja guvttiin sii girde. 3 Sii čurvo guhtet guimmiidasaset:
“Bassi, bassi, bassi lea Hearrá Sebaot,
Oppa eatnama dievva lea su hearvásvuohta.”
4 Čuorvvas bijai uvssa lasáid doarggistit, ja tempela devddii suovva. 5 Mun celken:
“Vuoi mu, mun duššan!
Mus leat buhtismeahttun baksamat,
ja mun ásan álbmoga gaskkas
mas leat buhtismeahttun baksamat,
ja dál mu čalmmit leat oaidnán Gonagasa,
Hearrá, Almmiveagaid Ipmila.”
6 Dalle okta serafain girddii mu lusa, ja su gieđas lei buolli čađđa maid son lei váldán áltáris basttaiguin. 7 Dainna son guoskkahii mu njálmmi ja celkkii: “Go dát guoská du baksamiidda, de du suddovealgi váldojuvvo eret, ja du suddu soabahuvvo.” 8 Ja mun gullen Hearrá jiena. Son celkkii: “Gean mun vuolggahan, gii vuolgá min áirrasin?” Mun vástidin: “Dás mun lean, vuolggat mu!” 9 Son celkkii:
“Mana ja cealkke dán álbmogii:
‘Dii gullabehtet, muhto ehpet ipmir,
dii oaidnibehtet, muhto ehpet ádde.’
10 Buoššut dán álbmoga váimmu,
dahpa sin beljiid, govčča sin čalmmiid,
amaset oaidnit maidege ja gullat maidege,
amaset ipmirdit maidege ja jorgalit
ja šaddat buoriduvvot.”
11 Mun jerren: “Man guhkes áigái, Hearrá?” Son vástidii:
“Dassážii go gávpogat šaddet čievračopman
iige oktage ása dain,
dassážii go viesut leat ávdimin,
ja bealdoeatnamat šaddet meahccin.”
12 Hearrá doalvu olbmuid guhkás,
ja eanan báhcá ávdimin.
13 Jos logádas báhcá,
de datge duššaduvvo,
dego dalle go olmmoš gággá bajás
terebintta dahje áikka jalgŋá.
– Dat jalŋŋis lea bassi sohka.