Árpmu jahki
1 Hearrá Ipmila vuoigŋa lea mu badjelis,
danin go son lea vuoidan mu.
Son lea vuolggahan mu
gulahit illusága vártnuhemiide,
buoridit daid geaid váibmu lea cuovkanan,
almmuhit friddjavuođa fáŋggaide
ja bestojumi daidda geat leat láhkkiin,
2 gulahit Hearrá árpmu jagi,
min Ipmila mávssaheami beaivvi,
jeđđet buohkaid geat moraštit,
3 addit Siona morašteddjiide
oaivečiŋa gunaid sadjái,
ilu oljju morašgárvvuid sadjái
ja ávvulávlaga dorvvuhisvuođa sadjái.
Sii gohčoduvvojit
Vanhurskkisvuođa áikan,
Hearrá gilvvagárdin
maid son ieš lea gilván
vai beassá čájehit
iežas hearvásvuođa.
4 Sii huksejit fas boares
viessobázahasaid,
divvot dan mii áigá juo lea gahččan,
huksejit ođđasis
hearjiduvvon gávpogiid
mat leat orron ávdimin buolvvas bulvii.
5 Vierrásat guođohit din ealuid,
vierroolbmot dikšot
din bealdduid ja viidnegárddiid.
6 Dii ieža gohčoduvvobehtet
Hearrá báhppan,
dii navdojuvvobehtet
min Ipmila bálvaleaddjin.
Dii beassabehtet návddašit
álbmogiid riggodagaid,
daid dávvirat šaddet din oapmin.
7 Dii lehpet ožžon heahpada
guovttegeardásaččat,
bilkádus ja hiddjádus
lea šaddan sin oassin,
muhto dál dii oažžubehtet
guovttegeardásaš oasi
iežadet eatnamis,
dii oažžubehtet agálaš ilu.
8 Mun, Hearrá,
ráhkistan vuoigatvuođa
ja vašuhan rievideami
ja vuoigatmeahttunvuođa.
Mun lean oskkáldas
ja attán álbmogasan bálkká,
mun dagan dainna agálaš lihtu.
9 Dalle dan mánát adnojuvvojit árvvus
álbmogiid gaskkas,
sin nálli olbmuid čearddaid siste.
Buohkat geat oidnet sin,
ipmirdit ahte sii leat sohka
maid Hearrá lea buressivdnidan.
10 Mun illudan Hearrás,
mu siellu ávvuda mu Ipmilis,
danin go son lea gárvvuhan munnje
bestojumi gárvvuid
ja giessan mu birra
vanhurskkisvuođa oalgebiktasa,
nu ahte mun lean dego irgi
gii bidjá turbána oaivái,
dahje nugo moarsi gii čiŋaha iežas
čiŋaidisguin.
11 Nugo eanan bohciidahttá šattu
ja gilvvagárdi iđiha
dan mii lea gilvojuvvon,
nu Hearrá Ipmil bohciidahttá
vanhurskkisvuođa,
ja rámádus badjána
buot álbmogiid gullut.