Sáhka gonagas Ahasii
1 Dan áigge go Ahas, Jotama bárdni, Ussia áddjut, lei Juda gonagassan, de Arama gonagas Resin vulggii ovttas Israela gonagasain Pekahiin, Remalja bártniin, fallehit Jerusalema, muhto soai eaba nagodan váldit gávpoga. 2 Go Davida vissui muitaluvvui ahte aramealaččat ledje luoitalan Efraimii, de doarggistii juohkehačča váibmu, sihke gonagasa ja álbmoga, dego vuovddi muorat doarggistit biekkas. 3 Dalle Hearrá celkkii Jesajai: “Mana bártniinat Šear Jašubiin deaivvadit Ahasiin. Son lea Badjeáldása kanála geažes Dállengietti luottas. 4 Daja sutnje: Ale leabohuva! Ale bala alege dorvvuhuva dán guovtti borggisteaddji ráddebihtá, Resina ja su aramealaččaid ja Remalja bártni dihte. Ale bala sin buolli vašis. 5 Aramealaččat leat gal hutkan baháid du vuostá, nu maiddái Efraim ja dan oaivi Remalja bárdni. Sii leat dadjan: 6 ‘Vulgot Judai ja suorggahehkot eatnama! Mii vuolidit dan ja dahkat Tabeala bártni dan gonagassan.’
7 Muhto Hearrá Ipmil cealká ná:
Ii dat dáhpáhuva, ii dat šatta.
8 Damaskus ráđđe Arama,
ja Resin ráđđe Damaskusa.
Velá guhttalogivihtta jagi,
ja Efraim lea duššaduvvon,
dat ii leat šat álbmot.
9 Samaria ráđđe Efraima,
ja Remalja bárdni ráđđe Samaria.
Jos dii ehpet oskko,
de ehpet ceavzze.”
Su namma lea Immanuel
10 Hearrá sártnui vel Ahasii: 11 “Bivdde mearkka Hearrás, Ipmilisttát. Bivdde dan vuollin jábmiidáimmus dahje badjin allagasas.” 12 Muhto Ahas vástidii: “In bivdde. Mun in áiggo geahččalit Hearrá.” 13 Dalle Jesaja dajai: “Gula dál, Davida sohka! Iigo das leat galle ahte dii eahpidehpet olbmuid fámu? Eahpidehpetgo dii velá mu Ipmila fámuge? 14 Dan dihte Hearrá ieš addá didjiide mearkka: Nieida šaddá áhpeheapmin ja riegádahttá bártni ja bidjá sutnje namman Immanuel. 15 Lávcca ja honnega son borrá dassá go oahppá hilgut bahá ja válljet buori. 16 Muhto ovdal go bárdni lea oahppan hilgut bahá ja válljet buori, de báhcá ávdimin dat eanan man gonagasa guoktás don balat. 17 Hearrá vuolggaha du ja du álbmogii ja áhčát sohkii dakkár beivviid mat eai leat leamaš dan rájes go Efraim earránii Judas – son vuolggaha Assyria gonagasa.”
Soađi heavahus
18 Dan beaivvi Hearrá njurge
deike čurohiid Egypta eanuin
ja mieđašeniid Assyrias.
19 Oppa moahti boahtá ja seaivu
gorssaide ja bákteskoaruide,
miehtá bastilislánjáid ja suovkkaid.
20 Dan beaivvi Hearrá ráhke
niibbiin maid lea láigohan
don bealde Eufrata
– Assyria gonagasain –
vuovttaid ja rumašguolggaid,
velá skávžžáidge niibi dis čuohppá.
21 Dan beaivvi olmmoš ealiha gusa ja moadde sávzza. 22 Dattetge son oažžu nu ollu mielkki ahte borrá lávcca. Lávcca ja honnega ožžot borrat buohkat geat leat báhcán eatnamii.
23 Dan beaivvi dan eatnamis mas dál leat duhát viidnemuora, ja mii lea duhát silbašekela veara, šaddet dievva bastilislánját ja gáskálasat. 24 Olbmot mannet dohko njuolaiguin ja dávggiin, danin go eatnamis šaddet dievva bastilislánját ja gáskálasat. 25 Daid várrevilttiid maid olbmot dál guhkket guhkiin, sii garvet bastilislánjáid ja gáskálasaid dihte. Dat šaddet gusaid guohtuneanamin ja sávzzaid duolmmahahkan.