1 Dát leat oainnáhusat Juda ja Jerusalema hárrái maid Jesaja, Amosa bárdni, oinnii dalle go Ussia, Jotam, Ahas ja Hiskia ledje Juda gonagassan.
Hearrá cuiggoda álbmogis
2 Gula, albmi, guldal, eanan!
Hearrá sárdnu:
Mánáid mun bibmen ja dikšon,
muhto sii leat jorgalan mus eret.
3 Vuoksá dovdá eaiggádis
ja ásen isidis kruppá,
muhto Israel ii dovdda,
mu álbmot ii ipmir.
4 Vuoi suttolaš álbmoga,
soga maid suddovealgi losidahttá,
bahádahkkiid bearraša,
billašuvvan mánáid!
Sii leat hilgon Hearrá,
badjelgeahččan Israela Basi
ja jorgalan sutnje sealggi.
5 Ehpetgo dii leat doarvái cábmojuvvon,
go velá nággáruššabehtet?
Oaivi lea hávváduvvan,
váibmu cuovkanan.
6 Juolgevuođus gitta oaivečohkkii
ii leat mihkkege dearvašiid,
dušše guvhllit ja árbbat ja rabas hávit.
Dat eai leat bohččojuvvon,
eai čadnojuvvon
eaige oljjuin luvvaduvvon.
7 Din eanan lea ávdin,
din gávpogat leat boldojuvvon,
dii oaidnibehtet vierroolbmuid borramin
iežadet eatnama šattuid.
Dat lea heavahus,
dego dalle go Sodoma duššaduvvui.
8 Dušše nieida Sion lea báhcán
dego viidnegárddi lastagoahti,
dego gurkábealddu fáktengoahti,
dego birastahttojuvvon gávpot.
9 Jos Hearrá, Almmiveagaid Ipmil,
ii livčče guođđán mis bázahasa,
de mii livččiimet dego Sodoma,
mii livččiimet šaddan
Gomorra láhkásažžan.
10 Gullet Hearrá sáni,
Sodoma oaivámuččat,
guldal min Ipmila sárdnuma,
Gomorra álbmot!
11 Maid mun dagan
buot din njuovvanoaffariiguin,
cealká Hearrá.
Mun lean gallánan
boaldinoaffarvierccain
ja buoiduduvvon gálbbiid buoiddis,
mus ii leat hállu vuovssáid ja lábbáid
ja bohkáid varrii.
12 Gii lea dáhtton dis dakkáriid
ja duolbmat mu ovdašiljuid,
go boahtibehtet mu muođuid ovdii?
13 Allet šat buvtte duššálaš attáldagaid,
mun fasttášan oaffarsuova.
Mánočalbmebeaivi, sabbat,
bassi čoakkalmasat –
mun in gierdda din basiid
ja din vearrivuođa.
14 Mun vašuhan din
mánočalbmebeaivvi meanuid
ja basiid.
Dat leat šaddan munnje noađđin,
mun lean váiban dan guoddimis.
15 Go dii bajidehpet gieđaid rohkadussii,
de mun čiegan čalmmiidan dis.
Vaikko dii rohkadallabehtetge ollu,
de mun in gula.
Din gieđat leat varranaga.
16 Basadehket, buhtistehket iežadet!
Jávkadehket bahás daguideattet
mu čalmmiid ovddas.
Heitet dahkamis bahá
17 ja ohppet dahkat buriid!
Ohcet dan mii lea riekta,
bealuštehket dan gii sordojuvvo,
rábidehket oarbásii vuoigatvuođa,
čuoččuhehket leaskkaid ášši.
18 Čielggadehkot áššámet,
cealká Hearrá.
Vaikko din suttut leat varraruoksadat,
de dat šaddet čeaskadin dego muohta,
vaikko dat leat purpurruoksadat,
de dat šaddet vielgadin dego ullu.
19 Jos dii lehpet miehtásat
ja gullabehtet,
de beassabehtet návddašit
eatnama buriid,
20 muhto jos lehpet nággárat
ja ceaggát,
de miehkki loaktá din.
Hearrá lea sárdnon.
Jerusalem buhtistuvvo
21 Vuoi, oskkáldas gávpot
lea šaddan fuorrán!
Dan dievva lei vuoigatlašvuohta,
vanhurskkisvuohta orui doppe –
dál doppe ásset sorbmejeaddjit.
22 Du silbbat leat šaddan skártan,
du viidni lea čáziin veahttaduvvon.
23 Du vuostehágolaš oaivámuččat
leat suollagiid guoimmit,
sii ráhkistit duolgguid
ja váinnuhit attáldagaid.
Eai sii veahket oarbásiid
oažžut vuoigatvuođa
eaige gozit leaskkaid ášši.
24 Dan dihte cealká Hearrá,
Almmiveagaid Ipmil,
Israela Veagalaš:
Vuoi sin! Mun divttán moari
deaividit vuostálastiidan
ja mávssahan vašálaččaidasan.
25 Mun bajidan gieđa du vuostá.
Mun boalddán buot
du buhtismeahttunvuođa
ja jávkadan gutnasálttiin du skártta.
26 Mun attán dutnje dakkár duopmáriid
dego ovdal,
dakkár ráđđeaddiid nugo dološ áiggiid.
Dalle don gohčoduvvot
vanhurskkisvuođa ladnin,
oskkáldas gávpogin.
27 Vuoigatvuođain Sion bestojuvvo,
vanhurskkisvuođain
dat geat ásset doppe.
28 Muhto vearredahkkit
ja suttolaččat cuvkejuvvojit,
dat geat behttet Hearrá, duššet.
29 Dalle dii heahpanehpet
terebinttaid dihte
mat ledje din hálidus,
ja beahtahallabehtet muorragárddiide
maid ráhkistehpet.
30 Dalle dii lehpet dego terebinta
mas leat goldnan lasttat,
dego muorragárdi gos ii leat čáhci.
31 Gievra šaddá nuovvin
ja su dahku čuonamin.
Ovttas dat bullet,
iige leat čáskadeaddji.