Jeremia

Profehta oktonasvuohta

¹ Munnje bođii dát Hearrá sátni: ² Ale váldde alccesat áhká, alloset dutnje šaddo bártnit ja nieiddat dán báikkis. ³ Danin go ná cealká Hearrá daid bártniid ja nieiddaid birra geat riegádit dán eatnamis, sin etniid birra geat riegádahttet sin ja sin áhčiid birra geat sahkanahttet sin: ⁴ Sii jápmet bávččaslaš dávddaide, sii eai čirrojuvvo eaige hávdáduvvo, muhto sii šaddet eatnama duktan. Sii duššet miehkkái ja nealgái, ja sin rupmašat šaddet almmi lottiid ja meahcispiriid biebmun.

⁵ Ná cealká Hearrá: Ale mana morašvissui, ale váidalusaide, ale árpmoštala sin, danne go mun lean váldán iežan ráfi dán álbmogis, ja maiddái iežan ráhkisvuođa ja árpmu. Dát álbmot ii oaččo šat muosáhit mu oskkáldasvuođa ja váibmoláđisvuođa, cealká Hearrá. ⁶ Dán eatnamis jápmet sihke stuorrát ja smávvát. Sii eai hávdáduvvo, sidjiide eai dollojuvvo váidalusat, olbmot eai nája oaččis eaige ráhke vuovttaid sin dihte. ⁷ Ii oktage doadjal láibbi jeđđehussan dasa gii morašta jábmi, iige oktage atte jeđđehusa geara dasa gii čierru áhčis dahje eatnis. ⁸ Ale mana headjavissui, ale čohkán singuin juhkat ja borrat. ⁹ Gula maid mun, Hearrá, Almmiveagaid Ipmil, Israela Ipmil, cealkkán: Din čalmmiid ovddas, din beivviid, mun jávohuhtán dán eatnamis illučuorvasiid ja ávvučuorvasiid, irggi jiena ja moarsi jiena.

¹⁰ Go don gulahat álbmogii buot dáid sániid, de sii jerret: “Manne Hearrá áitá min dáinna stuorra oasehisvuođain? Mii lea min rihkkun, mii lea min suddu maid mii leat dahkan Hearrá, Ipmileamet, vuostá?” ¹¹ Daja dalle sidjiide: “Juo din áhčit hilgo mu, cealká Hearrá. Sii vádjoledje eará ipmiliid maŋis ja bálvaledje ja gopmirdedje daid. Mu sii hilgo eaige doallan mu lága. ¹² Muhto dii lehpet meannudan vel bahábut go din áhčit! Dii vádjolehpet juohkehaš iežas bahás váimmu gážžárvuođas ehpetge guldal mu. ¹³ Dan dihte mun bálkestan din eret dán eatnamis dakkár eatnamii maid dii ehpet dovdda ja maid eai din áhčitge dovdan. Doppe dii bálvalehpet eará ipmiliid ijatbeaivái, muhto mun in árpmit din.”

Lohpádusat ja várrehusat

¹⁴ Dan dihte beaivvit bohtet, Hearrá cealká, go ii šat daddjojuvvo: “Nu duohta go Hearrá eallá, son guhte buvttii israellaččaid Egyptas,” ¹⁵ muhto: “Nu duohta go Hearrá eallá, son guhte buvttii israellaččaid davvieatnamis ja buot eatnamiin gosa son lei sin ádján.” Mun buvttán sin ruoktot sin iežaset eatnamii, dan eatnamii maid mun adden sin áhčiide.

¹⁶ Hearrá cealká: Mun rávkkan ollu guolásteddjiid, ja dat bivdet sin. Das maŋŋil mun rávkkan ollu meahcásteddjiid bivdet sin váriin ja juohke dievás ja buot bákteskurččuin. ¹⁷ Mun dárkon mo sii ellet; sii eai sáhte čiehkádit, nu ahte mun in oainnáše sin, ja sin rihkkosiid mun fuobmán. ¹⁸ Mun mávssahan vuos guovttegeardásaččat sin suttuid ja rihkkosiid. Dasgo sii leat dahkan mu eatnama eahpebassin gáfatlaš jápma ipmiliiddisetguin ja deavdán mu opmodaga fastivuođaideasetguin.

¹⁹ Hearrá, don leat mu gievravuohta ja nana suodji,

mu báhtaransadji heahtebeaivvi!

Eatnama ravddain álbmogat

bohtet du lusa ja dadjet:

“Min áhčit árbejedje dušše giellása,

guttahis ipmiliid main ii leat gávdni.

²⁰ Sáhttágo olmmoš

duddjot alccesis ipmiliid?

Eai dat leat mahkkege ipmiliid!”

²¹ Dan dihte mun divttán sin dovdat,

dovdat dán háve,

iežan givrodaga ja iežan fámu.

Sii šaddet diehtit ahte mu namma lea Hearrá.