Jeremia

Cuvkejuvvon láiráruhkku

¹ Hearrá celkkii munnje: Mana oastit láiráruhku. Váldde mielddát muhtumiid álbmoga ja báhpaid vuorrasiin ² ja mana Ben-Hinnoma leahkái Ruhkkomoallopoartta buohta. Gulat doppe daid sániid maid mun dutnje attán. ³ Daja ná: Gullet Hearrá sáni, dii Juda gonagasat ja Jerusalema ássit! Ná cealká Hearrá, Almmiveagaid Ipmil, Israela Ipmil: Mun buvttán dán báikái dakkár lihkohisvuođa ahte juohkehaččas gii dan gullá, bealjit čudjet. ⁴ Mu álbmot lea hilgon mu ja dahkan dán báikki amasin. Sii leat cahkkehan oaffardola eará ipmiliidda maid eai sii, sin áhčit eaige Juda gonagasat dovdan. Sii leat deavdán dán báikki vigihis olbmuid varain. ⁵ Sii leat ráhkadan oaffarbáikkiid vai leat beassan boaldit mánáideaset boaldinoaffarin Baalii. Dan mun in leat goassege gohččon sin dahkat, iige dat leat badjánan mu millii.

⁶ Dan dihte bohtet beaivvit, cealká Hearrá, go dát báiki ii šat gohčoduvvo Tofetin iige Ben-Hinnoma leahkin, muhto Sorbmenleahkin. ⁷ Dán báikkis mun dagan duššin Juda ja Jerusalema ássiid áigumušaid. Mun divttán sin gahččat vašálaččaideaset miehkkái ja attán sin daid gihtii geat bivdet sin heakka. Sin gorudiid mun attán almmi lottiid ja eatnama spiriid biebmun. ⁸ Mun dagan dán gávpoga ávdimin ja buohkaid bilkádussan. Juohkehaš gii manná meaddel, soaigá ja bilkida buot dan givssiid. ⁹ Mun bijan sin borrat bártniideaset ja nieiddaideaset oačči, ja sii šaddet borrat maiddái nuppiideaset oačči, go vašálaččat birastahttet sin ja bivdet sin heakka.

¹⁰ Cuvke dalle ruhku daid olbmáid oaidnut geat leat boahtán duinna ¹¹ ja daja sidjiide: Ná cealká Hearrá, Almmiveagaid Ipmil: Mun cuvken dán álbmoga ja dán gávpoga dego láirálihti maid ii sáhte šat dahkat čavddisin. Jábmit hávdáduvvojit Tofetii, danne go eará sajis ii leat šat hávdesadji. ¹² Nu mun dagan dán báikái ja dan ássiide, cealká Hearrá. Mun dagan dán gávpoga Tofeta láhkásažžan. ¹³ Jerusalema viesut ja Juda gonagasaid viesut šaddet seammá buhtismeahttumin go Tofet, buot viesut maid dáhkiin sii leat cahkkehan oaffardola almmi vehkii ja golggahan juhkamušoaffariid eará ipmiliidda.

Jeremia ráŋggáštuvvo

¹⁴ Go Jeremia lei máhccan Tofetis gosa Hearrá lei vuolggahan su profehtastallat, de son čuoččastii Hearrá viesu ovdašilljui ja sártnui oppa álbmogii: ¹⁵ Ná cealká Hearrá, Almmiveagaid Ipmil, Israela Ipmil: Mun divttán boahtit dán gávpogii ja buot Juda gávpogiidda dan bahá mainna lean áitán daid. Daid ássit leat ceaggát, sii eai leat gullan mu sániid.