Jeremia

Guokte fiikongore

¹ Hearrá oainnihii munnje oainnáhusa: Guokte fiikongore ledje biddjojuvvon Hearrá tempela ovdii. Dat dáhpáhuvai maŋŋil go Nebukadnesar, Babylona gonagas, lei dolvon fáŋgavuhtii Jekonja, Juda gonagasa, Jojakima bártni. Oktan suinna son lei dolvon Jerusalemis Babylonii Juda oaivámuččaid, duojáriid ja rávdiid. ² Nuppi gores ledje hui buorit fiikonat, seamma buorit go árrafiikonat. Nuppi goresgis ledje hui heajos fiikonat, nu heajut ahte dat eai borahan. ³ Hearrá jearai mus: “Maid don oainnát, Jeremia?” Mun vástidin: “Fiikoniid. Buorit fiikonat leat hui buorit, muhto heajos fiikonat leat hui heajut, nu heajut ahte dat eai borat.” ⁴ Dalle munnje bođii dát Hearrá sátni: ⁵ Ná cealká Hearrá, Israela Ipmil: Nugo mun geahčan dáidda buriide fiikoniidda, nu mun geahčan buorrevuođain Judas eret dolvojuvvon olbmuide, daidda geaid mun vuolggahin dáppe kaldealaččaid eatnamii. ⁶ Mun geahčan sin beallái ja buvttán sin fas dán eatnamii. Mun huksen sin inge gaikkot, mun gilvván sin inge rohtte eret. ⁷ Mun attán sidjiide váimmu dovdat mu ja ipmirdit ahte mun lean Hearrá. Sii jorgalit mu beallái olles váimmusteaset. Sii leat mu álbmot, ja mun lean sin Ipmil. ⁸ Muhto nugo dahkkojuvvo heajos fiikoniidda mat eai borat, cealká Hearrá, nu mun dagan Sidkiai, Juda gonagassii, su oaivámuččaide ja Jerusalema bázahassii, daidda geat vel leat báhcán dán eatnamii dahje leat ássan Egyptii. ⁹ Mun dagan sin suorggahussan buot máilmmi álbmogiidda, bilkolávllan ja garuhussan buot báikkiin gosa mun áján sin. ¹⁰ Mun vuolggahan sin gaskii miehki, nealggi ja rohttudávdda, dassážii go sii leat duššaduvvon dan eatnamis maid mun adden sidjiide ja sin áhčiide.