Jeremia einnosta čiežalogi jagi fáŋgavuođa
1 Dát lea sátni mii bođii Jeremiai oppa Juda álbmoga birra, dalle go Jošia bárdni Jojakim lei njealját jagi Juda gonagassan, ja Nebukadnesar lei vuosttas jagi Babylona gonagassan. 2 Dan sáni Jeremia sártnui oppa Juda álbmogii ja buot Jerusalema ássiide:
3 Juda gonagasa Jošia, Amona bártni, golbmanuppelogát ráđđenjagi rájes gitta dán beaivvi rádjái, olles guoktelogigolbma jagi, Hearrá sátni lea boahtán munnje. Mun lean ain ođđasis sárdnon didjiide, muhto dii ehpet leat guldalan. 4 Ain ođđasis Hearrá lea vuolggahan din lusa bálvaleddjiidis profehtaid, muhto dii ehpet leat guldalan sin. Dii ehpet dahkan oppa gullinge, go sii sárdno: 5 Jorgalehket buohkat bahás geainnuineattet ja daguineattet, de dii beassabehtet álo ássat dan eatnamis maid mun adden didjiide ja din áhčiide agálaš áiggiide. 6 Allet vádjol eará ipmiliid maŋis, allet bálval alletge rohkadala daid! Allet moaráhuhte mu ipmiliiguin maid lehpet duddjon, de mun in daga didjiide maidege baháid. 7 Muhto dii ehpet dáhtton guldalit mu, cealká Hearrá, muhto moaráhuhtiidet mu eahpeipmilgovaideattetguin, alcceseattet vahágin.
8 Dan dihte cealká Hearrá, Almmiveagaid Ipmil: Go dii ehpet leat guldalan mu sániid, 9 de mun bijan sáni ja vieččahan deike davvin buot álbmogiid ja bálvaleaddján Nebukadnesara, Babylona gonagasa. Mun gohčun sin fallehit dán eatnama ja dan ássiid ja buot dan birasálbmogiid. Mun divttán din duššat ollásit, dagan din eatnama ávdimin, agálaš čievračopman, ja buohkat hiddjidit din. 10 Mun loahpahan din ávvučuorvasiid ja illučuorvasiid, irggi jiena ja moarsi jiena, millu jiena ja lámppá čuovgga. 11 Oppa dát eanan šaddá geađgebázahassan, ávdin báikin, ja dát álbmogat bálvalit Babylona gonagasa čiežalogi jagi.
12 Muhto go čiežalogi jagi leat dievvan, de mun ráŋggáštan Babylona gonagasa ja su álbmoga sin vearredaguid dihte, cealká Hearrá. Maiddái sin eatnama mun ráŋggáštan, mun dagan dan agálaš meahccin. 13 Mun divttán ollašuvvat dan eatnamis buot sániidan maid lean sárdnon dan vuostá, buot dan mii lea čállojuvvon dán girjái ja maid Jeremia lea profehtastallan álbmogiid vuostá. 14 Boahtá áigi go babylonialaččatgis šaddet bálvalit eará álbmogiid ja stuorra gonagasaid. Mun mávssahan sidjiide sin vádjolusa ja sin daguid.
Hearrá moari gearra
15 Hearrá, Israela Ipmil, celkkii munnje: Váldde mu gieđas dán geara ja jugat mu moari viinni buot álbmogiidda maid lusa mun vuolggahan du. 16 Dat juhket ja suibot ja bieđáskit miehki geažil maid mun vuolggahan sin gaskii. 17 Nu mun válden geara Hearrá gieđas ja jugahin moari viinni buot álbmogiidda maid lusa Hearrá vuolggahii mu: 18 Jerusalemii ja buot Juda gávpogiidda, Juda gonagasaide ja oaivámuččaide, vai gávpogat šattašedje muvrralátnan ja ávdimin, bilkun ja garuhussan, nugo lea otná beaivvige; 19 faraoi, Egypta gonagassii, su bálvaleddjiide ja oaivámuččaide ja oppa su álbmogii, 20 buot seahkeálbmogiidda, buot Usa eatnama gonagasaide, buot Filistea gonagasaide ja Aškelona, Gaza ja Ekrona álbmogiidda ja daidda geat leat báhcán Ašdodii; 21 Edomii, Moabii ja ammonlaččaide, 22 buot Tyrosa ja Sidona gonagasaide ja riddoeatnamiid gonagasaide nuppe bealde ábi, 23 Dedana, Tema ja Busa álbmogiidda ja buohkaide geain leat birrajevdejuvvon vuovttat; 24 buot Arabia gonagasaide geat ásset ávdin guovlluin; 25 buot Simri, Elama ja Media gonagasaide, 26 buot davviguovllu gonagasaide lahka ja guhkkin, juohkehažžii su vuorus, buot riikkaide mat leat miehtá eatnama. Maŋimuš dan juhká maiddái Šešaka gonagas.
27 Cealkke sidjiide: Ná cealká Hearrá, Almmiveagaid Ipmil, Israela Ipmil: Juhket, gárihuvvet ja vuovssadehket! Gahččet miehkkái maid mun vuolggahan din gaskii, alletge šat čuožžil. 28 Muhto jos sii biehttalit váldimis geara du gieđas ja juhkamis, de daja sidjiide: Ná cealká Hearrá, Almmiveagaid Ipmil: Dii fertebehtet juhkat! 29 Go mun divttán oasehisvuođa deaividit vuos dan gávpoga man badjel mu namma lea celkojuvvon, de diigo dalle beasašeiddet ráŋggáškeahttá! Ehpet eisege! Mun gohčun miehki fallehit buot eatnama ássiid, cealká Hearrá, Almmiveagaid Ipmil. 30 Muhto don, Jeremia, sártno buot dáid sániid! Cealkke sidjiide:
Hearrá čeargu allagasas,
son skájaha jienas bassi ássanbáikkistis,
čeargu alla jienain
iežas guohtuneatnama badjel.
Nugo čurvot dat geat dulbmet
viidnebohčingári,
nu čuorvu Hearrá buot eatnama ássiide,
31 su jiena márra gullo
gitta eatnama ravddaid rádjái.
Hearrás lea ášši álbmogiiguin,
son lágasta buot oččiin,
son goddá mihkiin ipmilmeahttumiid.
32 Ná cealká Hearrá, Almmiveagaid Ipmil:
Riđđu badjána eatnama
olggumuš guovlluin,
oasehisvuohta leavvá álbmogis álbmogii.
33 Dan beaivvi juohke sajis, eatnama ravddas nubbái, njaŋgájit olbmot geaid Hearrá lea goddán. Sidjiide eai dollojuvvo váidalusat, sii eai čohkkejuvvo eaige hávdáduvvo, muhto sin rupmašat šaddet eatnama duktan.
34 Váidalehket ja bárgot, dii báimmanat,
fieradehket gunaid siste,
dii ealu bajimuččat!
Dasgo áigi lea boahtán
go dii njuvvojuvvobehtet.
Dii biđgejuvvobehtet,
cuovkanehpet moallun
dego mávssolaš lihtti.
35 Jávkan lea báimmaniid
báhtaransadji,
gáddjojupmi ealu oaivámuččain.
36 Gullet mo báimmanat luibmet,
ealu oaivámuččat vuobaidit!
Hearrá duššada sin guohtumiid,
37 oadjebas guohtuneatnamat
šaddet ávdimin,
go Hearrá moarri áhcagastá.
38 Dego ledjon
Hearrá lea vuolgán čiehkádansajistis.
Buolli moriinis ja goddi mihkiinis
son dahká sin eatnama ávdimin.