Jeremia

Rekablaččat ovdagovvan

¹ Juda gonagasa Jojakima, Jošia bártni, áigge Jeremiai bođii dát Hearrá sátni: ² Mana rekablaččaid lusa ja siđa sin boahtit Hearrá tempelii. Doalvvo sin muhtun gámmárii ja atte sidjiide viinni juhkat. ³ De mun vižžen Jaasanja, Jeremia bártni, Habassinja áddjuba, ja su vieljaid, buot su bártniid ja buot rekablaččaid soga. ⁴ Mun dolvon sin Hearrá tempelii Ipmila olbmá Hanana, Jigdalja bártni, gámmárii. Dat lei oaivámuččaid gámmára bálddas uksafákta Maaseja, Šalluma bártni, gámmára bajábealde.

⁵ De mun bidjen rekablaččaid ovdii cerkkiid ja lihtiid maid dievva lei viidni, ja celken sidjiide: Juhket viinni! ⁶ Muhto sii vástidedje: Mii eat juga viinni, danin go min áhčči Jonadab, Rekaba bárdni, lea gieldán min ja dadjan: “Allet goassege juga viinni, allet dii ieža allosetge din mánát. ⁷ Allet hukse viesuid alletge gilvve gortni, allet ráhkat viidnegárddiid alletge eaiggáduša daid. Dii galgabehtet ássat gođiin buot beivviideattet. Dalle dii oažžubehtet eallit guhká dan eatnamis gos dál ássabehtet vierisin.” ⁸ Ja mii gulaimet áhččámet Jonadaba, Rekaba bártni, buot das maid son gohčui min dahkat. Mii eat goassege juga viinni, eat mii ieža eaige min áhkát, bártnit eaige nieiddat. ⁹ Mii eat hukse alcceseamet viesuid main ássat, eaige mis leat viidnegárddit, bealddut eaige gilvagat. ¹⁰ Mii orrut gođiin ja leat gulolaččat ja dahkat aiddo nugo min áhčči Jonadab lea gohččon min dahkat. ¹¹ Muhto go Babylona gonagas Nebukadnesar fallehii eatnama, de mii mearrideimmet vuolgit Jerusalemii, vai eat šatta kaldealaččaid ja aramealaččaid soahteveaga gihtii. Ja danin mii orrut dál Jerusalemis.

¹² Dalle Jeremiai bođii dát Hearrá sátni: ¹³ Ná cealká Hearrá, Almmiveagaid Ipmil, Israela Ipmil: Mana sárdnut Juda olbmáide ja Jerusalema ássiide ná: Ehpetgo dii juo viimmat gula mu sániid ja oahpa, jearrá Hearrá. ¹⁴ Jonadab, Rekaba bárdni, gilddii mánáidis juhkamis viinni, ja sii leat doahttalan su. Dán beaivvige sii eai juga viinni, muhto jeagadit áhčiset gohččuma. Mun lean sárdnon didjiide ain ođđasis, muhto dii ehpet leat guldalan. ¹⁵ Ain ođđasis mun lean vuolggahan din lusa bálvaleddjiidan profehtaid ja cealkán: “Jorgalehket vearregeainnuineattet, hilgot bahás daguideattet! Allet vádjol eará ipmiliid maŋis alletge bálval daid! Dalle dii oažžubehtet ássat dan eatnamis maid mun adden didjiide ja din áhčiide.” Muhto dii ehpet bivdán bealjige ehpetge gullan mu. ¹⁶ Jonadaba, Rekaba bártni, mánát gal leat doallan áhčiset gohččuma, muhto dát álbmot ii guldal mu. ¹⁷ Dan dihte Hearrá, Almmiveagaid Ipmil, Israela Ipmil, cealká ná: Mun divttán boahtit Judai ja buot Jerusalema ássiide oasehisvuođa mainna lean áitán sin. Sii eai guldalan go mun sárdnon sidjiide eaige vástidan go mun rávken sin.

¹⁸ Rekablaččaide Jeremia dajai: Ná cealká Hearrá, Almmiveagaid Ipmil, Israela Ipmil: Dii lehpet jeagadan áhčádet Jonadaba, dii lehpet doallan su gohččumiid ja dahkan buot maid son gohčui din dahkat. ¹⁹ Dan dihte Jonadaba, Rekaba bártni, mánát besset álo bálvalit mu, cealká Hearrá, Almmiveagaid Ipmil, Israela Ipmil.