41Seammá jagi čihččet mánus bođii Ismael, Netanja bárdni, Elišama áddjut, ja logi olbmá suinna Gedalja, Ahikama bártni, lusa Mispai. Ismael gulai gonagassohkii ja lei okta gonagasa oaivámuččain. Go sii buohkat ledje boradeamen ovttas, 2 de Ismael čuožžilii oktan logiin olbmáinis. Sii časke mihkiin jámas Gedalja, Ahikama bártni, Šafana áddjuba. Sii godde dan gean Babylona gonagas lei bidjan eatnama oaivámužžan. 3 Ismael gottii maiddái buot Juda olbmáid geat ledje čoagganan Gedalja lusa Mispai, ja kaldealaš soahteolbmáid geat ledje doppe.
    4 Maŋit beaivvi, go ii oktage vel diehtán ahte Gedalja lei goddojuvvon, 5 de ledje Mispai lahkaneamen gávccilogi olbmá. Sii ledje ráhken skávžžáideaset, gaikkodan biktasiiddiset ja nájadan liikkiset. Sii ledje boahtimin Sikemis, Šilos ja Samarias ja áigo buktit borramušoaffariid ja suovvasiid Hearrá vissui. 6 Dalle Ismael, Netanja bárdni, manai Mispas čieru sin ovddal. Go son deaivvadii singuin, de son dajai: “Bohtet Gedalja, Ahikama bártni, lusa!” 7 Go sii ollejedje gávpogii, de Ismael ja su olbmát časke sin jámas ja bálkestedje rupmašiid gáivui. 8 Dušše logis sis gáddjojuvvojedje, sii oainnat dadje Ismaelii: “Ale gotte min! Mis lea duoppe čihkosis borramuš: nisut, bivgi, olju ja honnet.” Dalle Ismael divttii sin eallit iige goddán sin oktan earáiguin. 9 Gáivo masa Ismael bálkestii buot daid olbmáid rupmašiid geaid lei goddán, lei dat maid gonagas Asa lei rokkahan dalle go son soađai Bašain, Israela gonagasain. Dan Ismael devddii dál rupmašiiguin. 10 Dasto Ismael válddii fáŋgan buot daid olbmuid geat vel ledje Mispas, maiddái gonagasa nieiddaid, buohkaid geaid oaivámužžan Nebusaradan, heaggafávttaid oaivámuš, lei bidjan Gedalja, Ahikama bártni. De Ismael johttái ammonlaččaid lusa oktan buot olbmuiguin geaid lei váldán fáŋgan.
    11 Go Johanan, Kareaha bárdni, ja buot soahteveaga oaivámuččat geat ledje suinna, gulle buot dan bahá maid Ismael, Netanja bárdni, lei dahkan, 12 de sii válde buot olbmáideaset ja vulge soahtat suinna. Sii jokse su stuorra láddo guoras mii lea Gibeonis. 13 Olbmot geaid Ismael lei váldán fáŋgan Mispas, illosedje go oidne Johanana ja eará soahteveaga oaivámuččaid lahkaneamen. 14 Buot fáŋggat jorggihedje ja vulge sin ovddal ja manne Johanana lusa. 15 Muhto Ismael ja gávccis su olbmáin besse báhtarussii ja manne ammonlaččaid eatnamii.
    16 Johanan, Kareaha bárdni, ja buot soahteveaga oaivámuččat geat ledje suinna, válde mielde daid olbmuid geaid Ismael, Netanja bárdni, lei bággen mielddis Mispas das maŋŋil go lei goddán Gedalja, Ahikama bártni: olbmáid, soahteolbmáid, nissoniid, mánáid ja hoavvaolbmáid. Sin buohkaid son buvttii ruoktot Gibeonis. 17 Sii johttájedje ja orrojedje Gerut Kimhamii mii lea Betlehema lahka. Doppe sii áigo mannat Egyptii 18 báhtui kaldealaččain. Sii ledje balus, danne go Ismael lei goddán Gedalja, gean Babylona gonagas lei bidjan Juda oaivámužžan.

< Forrige kapittel

Neste kapittel >

Nå lager vi ny nettbibel

Nettbibelen blir ny høsten 2023. Vi ruller ut nye funksjoner fortløpende, og trenger din hjelp til å teste og gi tilbakemelding.

Test på beta.bibel.no

Les vår personvernserklæring

Hopp rett til

Jeremia

Nå lager vi ny nettbibel

Motta Dagens Bibelord på e-post hver dag