Jeremia

Jeremia várre álbmoga mannamis Egyptii

¹ De buot soahteveaga oaivámuččat ja Johanan, Kareaha bárdni, Asarja, Hošaja bárdni, ja oppa álbmot, sihke smávvát ja stuorrát, bohte Jeremia ságaide. ² Oaivámuččat dadje Jeremiai: “Mii átnut du rohkadallat Hearrá, du Ipmila, min ovddas geat leat vel báhcán. Mii leimmet oktii eatnagat, muhto nugo don dás oainnát, dušše hárvát mis leat báhcán. ³ Rohkadala Hearrá, du Ipmila, muitalit midjiide gosa mii galgat vádjolit ja maid mii galgat dahkat.” ⁴ Profehta Jeremia vástidii sidjiide: “Mun dagan nu. Mun rohkadalan Hearrá, din Ipmila, nugo dii bivdibehtet. Mun almmuhan didjiide visot maid Hearrá vástida. Mun in čiega dis maidege.” ⁵ Sii dadje Jeremiai: “Hearrá lea duohta ja oskkáldas duođašteaddji. Mii lohpidit dahkat visot maid Hearrá, du Ipmil, gohčču du dadjat midjiide. ⁶ Lehkos dat buorre dahje bahá, de mii jeagadit Hearrá, min Ipmila, gean lusa mii vuolggahit du jearrat sus ráđi, vai midjiide geavašii bures. Mii áigut jeagadit Hearrá, min Ipmila.”

⁷ Logi beaivvi geažes Jeremiai bođii Hearrá sátni. ⁸ Jeremia rávkkai Johanana, Kareaha bártni, ja buot soahteveaga oaivámuččaid geat ledje suinna, ja oppa álbmoga, sihke smávváid ja stuorráid. ⁹ Jeremia dajai sidjiide: Dii bivddiidet mu rohkadallat Hearrá, Israela Ipmila, ja doalvut din njuoras rohkadusa su ovdii. Son vástida ná: ¹⁰ Jos dii bissubehtet dán eatnamis, de mun huksen din inge gaikkot, mun gilvván din inge rohtte eret. Mun gáđan dan bahá maid dahken didjiide. ¹¹ Dii ballabehtet dál Babylona gonagasas. Muhto mun, Hearrá, cealkkán didjiide: Allet bala sus, allet gáfestuva! Dasgo mun lean dinguin, mun gájun din ja beasttán din su gieđas. ¹² Mun lean didjiide váibmoláđis, vai son árpmiha din ja diktá din máhccat din iežadet eatnamii. ¹³ Muhto jus dii ehpet jeagat Hearrá, din Ipmila, muhto dadjabehtet: “Mii eat biso dán eatnamis. ¹⁴ Mii mannat Egyptii gos mii eat dárbbaš oaidnit soađi, gullat dorvviid jiena eatge nealgut. Dohko mii áigut ássat.” ¹⁵ Gullet dalle Hearrá sáni, dii geat lehpet vel báhcán Judas! Ná cealká Hearrá, Almmiveagaid Ipmil, Israela Ipmil: Jos dii jorgalehpet Egypta guvlui ja mannabehtet ássat dohko, ¹⁶ de miehkki mas dii ballabehtet, joksá din Egypta eatnamis, ja nealgi mas dii ballabehtet, doarrida din Egyptas, ja dohko dii jápmibehtet. ¹⁷ Buohkat geat mannet Egyptii ja ásset dohko, jápmet miehkkái, nealgái dahje rohttudávdii. Ii oktage vealtta dan oasehisvuođas maid mun divttán deaivat didjiide. ¹⁸ Ná cealká Hearrá, Almmiveagaid Ipmil, Israela Ipmil: Nugo mu moarri ja mu vašši golggahuvvui Jerusalema ássiid badjelii, nu mu moarri golgá din badjelii, jos dii mannabehtet Egyptii. Doppe dii hiddjiduvvobehtet ja bilkiduvvobehtet, dii šaddabehtet garuhussan ja duššaduvvobehtet, ehpetge dii šat goassege beasa oaidnit dán báikki. ¹⁹ Hearrá lea cealkán didjiide geat vel lehpet báhcán Judas: Allet mana Egyptii!

Muitet ahte mun lean várren din odne. ²⁰ Dii čádjidehpet, ja dat gártá didjiide sorbmin. Dii ánuidet mu jorgalit Hearrá, din Ipmila, beallái ja jearrat sus neavvaga. Dii dajaidet: “Rohkadala min ovddas Hearrá, Ipmileamet, ja muital midjiide buot maid son cealká. Mii dahkat visot maid son gohčču.” ²¹ Muhto go mun odne lean almmuhan didjiide dan maid Hearrá, din Ipmil, lea cealkán, de dii ehpet áiggoge jeagadit su. ²² Dihtet dalle: Dii jápmibehtet miehkkái, nealgái ja rohttudávdii dan báikái gosa dis lea hállu mannat ássat.