Jeremia

Jeremia dolvojuvvo Egyptii

¹ Go Jeremia lei geargan sárdnumis álbmogii buot maid Hearrá, sin Ipmil, lei vuolggahan su sárdnut, ² de Asarja, Hošaja bárdni, Johanan, Kareaha bárdni, ja buot eará jolges olbmát dadje Jeremiai: “Don sártnut giellásiid! Ii Hearrá, min Ipmil, leat vuolggahan du almmuhit ahte mii eat oaččo mannat Egyptii ja ássat dohko. ³ Baruk, Neria bárdni, giktá du min vuostá! Son dáhttu min šaddat kaldealaččaid gihtii, vai sii gottášedje min dahje dolvvošedje min Babylonii.” ⁴ Johanan, eará soahteveaga oaivámuččat ja álbmot eai jeagadan, vaikko Hearrá lei gohččon sin bissut Judas. ⁵ Johanan ja eará soahteveaga oaivámuččat merre vuolgit ja válde fárrui buot daid geat ledje báhcán Judas, daid geat ledje máhccan buot álbmogiid gaskkas gosa ledje dolvojuvvon, ja ássan Judai. ⁶ Das ledje olbmát, nissonat ja mánát, maiddái gonagasa nieiddat ja buohkat geaid Nebusaradan, heaggafávttaid oaivámuš, lei guođđán Gedalja, Ahikama bártni, Šafana áddjuba háldui. Maiddái profehta Jeremia ja Baruk, Neria bárdni, bággehalle fárrui. ⁷ Nu álbmot dollii Egyptii, danin go sii eai dáhtton jeagadit Hearrá. Nu sii jovde Tahpanhesii.

Jeremia profehtastallá Egypta vuostá

⁸ Tahpanhesis bođii Jeremiai dát Hearrá sátni: ⁹ Váldde stuorra geđggiid ja govčča daid muhtun Juda olbmáid oaidnut láirrá sisa guolbái farao gárdima uvssa ovdii. ¹⁰ Daja sidjiide: Ná cealká Hearrá, Almmiveagaid Ipmil, Israela Ipmil: Mun vuolggahan viežžat bálvaleaddján Babylona gonagas Nebukadnesara, ja bijan su truvnnu dáid geđggiid ala maid don leat dása čiehkan, ja son lebbe hearvaránu daid badjel. ¹¹ Son boahtá ja váldá Egypta.

Gean vuorbi rohttu, dat rohttui,

gean fáŋgavuohta, dat fáŋgavuhtii,

gean miehkki, dat miehkkái.

¹² Son cahkkeha Egypta ipmiliid tempeliid, boaldá daid ja doalvu ipmilgovaid sálašin. Nugo guođoheaddji boaibmu dihkiid gárvvuinis, nu Nebukadnesar buhtista Egypta ipmilgovain, ja de son vuolgá doppe ráfis. ¹³ Son cuvke Bet-Šemeša bácciid ja boaldá Egypta tempeliid.