1 Ná cealká Hearrá:
Mun bajidan riđu
Babylona vuostá,
vuolggahan heavaheaddji dálkki
daid vuostá geat ásset Leb-Kamajis.
2 Mun vuolggahan Babyloniai vierrásiid
ráidnet dan dego gortni ja
gurret eatnama.
Sii fallehit dan juohke guovllus,
go dan lihkuhisvuođa beaivi lea joavdan.
3 Geldos báhčči dávggis
dávgegealdi vuostá,
dan vuostá gii čoalčá soahtegárvvuinis!
Ale seastte gávpoga nuorra olbmáid,
duššat oppa dan soahteveaga!
4 Gahččan olbmot
leat kaldealaččaid eatnamis,
čukkohallan olbmát njaŋgájit miehtá gáhtaid.
5 Muhto Hearrá Ipmil, Almmiveagaid Ipmil
ii leat hilgon Israela iige Juda.
Vaikko daid eatnama dievva lea suddovealgi
Israela Basi ovddas,
dat eai leat báhcán okto dego leaskkat.
6 Báhtarehket Babylonis,
gádjos juohkehaš heakkas,
amadet duššat
go gávpot ráŋggáštuvvo.
Lea boahtán áigi go Hearrá mávssaha,
son mávssaha dasa dan daguid.
7 Babylon lei gollecearki Hearrá gieđas,
dat gárihuhtii oppa máilmmi.
Álbmogat juhke dan viinni,
danne dat bieđđaledje.
8 Fáhkkestaga Babylon gahččá ja cuovkana.
Lávlot dasa váidalanlávlaga!
Vižžet balsama dan háviide,
nago dat de buorránivččii.
9 “Mii geahččaleimmet dálkkastit Babylona,
muhto ii dat lean dálkkasteames.
Diktet orrut!
Vulgot, juohkehaš iežas eatnamii.
Babylona duopmu ollá albmái,
dat badjána gitta balvvaid rádjái.”
10 Hearrá čájeha min sivaheapmin.
Bohtet, muitalehkot Sionis
maid Hearrá, min Ipmil, lea dahkan!
11 “Čohkot njuolaid,
devdet njuollaskuohpuid!”
Hearrá lea rávkan Media gonagasaid vuoiŋŋa, dasgo son áigu duššadit Babylona. Dat lea Hearrá mávssaheapmi, son mávssaha iežas tempela.
12 Bajidehket soahteleavgga,
fallehehket Babylona muvrraid!
Fáktejehket dárkilit,
bidjet várdájeddjiid,
ráhkkanahttet vuđgŋiid!
Hearrá dahká maid lea áigon,
dan mainna lea áitán
Babylona ássiid.
13 Don gii ásat stuorra eanuid gáttiin,
geas leat valjis dávvirat,
dál du loahppa lea joavdan,
du eallima árpu botkejuvvo.
14 Hearrá, Almmiveagaid Ipmil,
lea vurdnon iežas bokte:
Mun deavddán du eatnama vašálaččaiguin.
Sii leat dego rásselohkut,
ja sii bajidit du vuostá soahtečuorvasa.
15 Hearrá sivdnidii eatnama fámuinis,
vuođđudii máilmmi viisodagainis,
lebbii almmi iežas čehppodagain.
16 Go su jietna jullá,
de almmi čázit šávvagohtet.
Son diktá balvvaid badjánit
eatnama ravddain,
bidjá álddagasaid šleađgut ja arvvi šoallat,
vuolggaha biekka vuorkágámmáriinnis.
17 Buohkat leat dáidemeahttumat,
eai sii ipmir.
Gollerávdi čádjidahttá su ipmilgova:
Govat maid son lea leiken, leat gielis,
ii dain leat vuoigŋa.
18 Dat leat árvvuheamit, bilkidan veara,
dat duššet go ráŋggáštusa áigi joavdá.
19 Daid láhkásaš ii leat Jakoba Ipmil,
dasgo son lea sivdnidan buot.
Israel lea su iežas čearda.
Hearrá, Almmiveagaid Ipmil lea su namma.
20 Don, Babylon,
leat mu veažir, mu soahtevearju.
Duinna mun cuvken álbmogiid
ja duššadan riikkaid,
21 duinna mun cuvken
heasttaid ja riidejeddjiid,
duinna mun cuvken vovnnaid ja vuddjiid,
22 duinna mun cuvken olbmáid ja nissoniid,
duinna mun cuvken boarrásiid ja nuoraid,
duinna mun cuvken bártni ja nieidda,
23 duinna mun cuvken guođoheddjiid
ja sin ealuid,
duinna mun cuvken bealdobargiid
ja sin vuovssáid,
duinna mun cuvken oaivámuččaid
ja eatnanhearráid.
24 Din oaidnut
mun mávssahan Babylonii
ja buot Kaldea ássiide
buot dan bahá maid sii leat dahkan Sionii,
cealká Hearrá.
25 Mun boađán du lusa, don billašumi várri mii billašuhtát oppa eatnama, cealká Hearrá. Mun geigen gieđa du vuostá, fierahan du vuolás bávttiin ja dagan du buollán várrin.
26 Dus ii váldojuvvo ii čiehkageađgi
iige vuođđogeađgi.
Don šattat ávdimin agálaš áigái,
cealká Hearrá.
27 Bajidehket soahteleavgga eatnamis,
bossot dorvve álbmogiid gaskkas,
vihahehket álbmogiid
soahtat Babyloniin,
vihahehket Ararata, Minni ja Aškenasa,
bidjet soahteoaivámučča dan vuostá,
diktet heasttaid šávihit ovdan
dego hárjás rásselohkut!
28 Vihahehket álbmogiid soahtat Babyloniin, vihahehket Media gonagasaid, sin hálddašeddjiid ja eatnanhearráid ja oppa sin riikka.
29 Eanan doarggista ja rabaida,
dasgo Hearrá ollašuhttá áigumušaidis,
son duššada Babylona.
Son dahká oppa Babylona ávdin meahccin
gos ii oktage olmmoš sáhte ássat.
30 Babylona soahteolbmát
leat heaitán soahtamis,
sii čohkkájit jaska ladniineaset.
Sin fápmu lea nohkan,
sii ballet dego nissonat.
Gávpoga ássanviesut leat cahkkehuvvon,
dan smarttit leat doddjojuvvon.
31 Viehkki viehkki maŋis,
áirras áirasa maŋis
boahtá muitalit Babylona gonagassii
ahte su gávpot váldojuvvo.
32 Gálabáikkit leat oamastuvvon,
suodjerustegat boldojuvvon,
soahteolbmát suorganaddan.
33 Ná cealká Hearrá,
Almmiveagaid Ipmil, Israela Ipmil:
Nieida Babylon lea dego gordneráidnenbáiki,
čavga dulbmojuvvon.
Uhca bottoš velá,
de lea rádjanáigi.
34 Babylonia gonagas Nebukadnesar
lea borran min, loahpahan min
ja duvdán Jerusalema dego guoros lihti.
Son lea njiellan min dego mearraguovdi,
deavdán čoavjjis min njálgáiguin
ja ádján min eret.
35 Vare visot veahkaváldi,
visot duššadeapmi
maid mii leat gillán,
deaivvašii Babyloniai,
dadjet Siona ássit.
Vare ráŋggáštus das ahte
sii golggahedje mu vara,
deaivvašii kaldealaččaide,
dadjá Jerusalem.
36 Dan dihte Hearrá cealká ná:
Mun gozihan du ášši
ja mávssahan du beales.
Mun goikadan Babylonia meara
ja dahpan dan ádjagiid.
37 Babylon šaddá čievračopman,
šakálaid orrunsadjin,
ávdimin ja suorggahussan,
doppe ii oktage sáhte ássat.
38 Kaldealaččat čergot dego ledjonat,
máraidit nugo ledjončivggat.
39 Mun rievdadan sin juhkamuša mirkon
ja jugahan sin gárremiidda.
Sii ávvudit ja nohkket agálaš nahkáriidda,
eaige šat gohccá,
cealká Hearrá.
40 Mun doalvvun sin njuvvojuvvot
dego lábbáid,
nugo vierccaid ja bohkáid.
41 Vuoi, Šešak lea gahččan,
oppa máilmmi rápmi váldojuvvon!
Vuoi, mo Babylonia vuorbi
suorggaha álbmogiid!
42 Mearra lea badjánan Babylonia badjel
ja gokčan dan máraideaddji báruiguin.
43 Dan gávpogat leat šaddan meahccin,
goikeeanamin ja ávdin báikin,
eanamin gos ii oktage ása
ja man čađa ii oktage olmmoš vádjol.
44 Mun ráŋggáštan Bela, Babylonia ipmila,
ja geasán dan njálmmis
visot maid dat lea njiellan.
Álbmogat eai šat
mára su lusa.
Babylonia muvrratge leat gahččan.
45 Álbmogan, vuolgge doppe eret!
Gádjos juohkehaš heakkas
Hearrá buolli moari páras!
46 Ale hearddohuva, ale suorgan dain ságain mat begget eatnamis, ovtta jagi okta sáhka, nuppi jagi nubbi sáhka. Eatnamis lea vearrivuohta, ráđđejeaddji soahtá ráđđejeddjiin.
47 Beaivvit bohtet
go mun ráŋggáštan Babylonia eahpeipmiliid.
Oppa eanan šaddá heahpadii,
juohke sajis njaŋgájit gahččan olbmot.
48 Albmi ja eanan ja buot mii dain lea,
ávvudit, go duššadeaddjit
fallehit Babylonia.
Davvin dat bohtet,
cealká Hearrá.
49 Babylon ferte gahččat
Israela gottáhallan olbmuid dihte,
nugo gottáhallan olbmot miehtá eatnama
leat gahččan Babylonia dihte.
50 Dii geat lehpet beassan báhtarit miehkis,
mannet, allet bisán!
Muitet Hearrá gáiddus eatnamis,
allet vajálduhte Jerusalema!
51 Dii dadjabehtet:
“Mii leat heahppášuhttojuvvon,
mii leat hiddjiduvvon,
min muođut leat ruvssodan heahpadis,
go vierroolbmot leat bahkken
Hearrá bassi tempelii.”
52 Muhto beaivvit bohtet, cealká Hearrá,
go mun ráŋggáštan Babylonia eahpeipmiliid,
ja oppa eatnamis gullo
hávváduvvan olbmuid fuoikun.
53 Vaikko Babylon gorgŋešii albmái
ja dagašii nana ladni allagassii,
de mun dattetge vuolggahivččen
duššadeddjiid dohko,
cealká Hearrá.
54 Bárgun gullo Babylonias,
heavahus lea stuoris kaldealaččaid eatnamis.
55 Hearrá heavaha Babylonia,
loahpaha doppe buot jidnes šláma.
Bárut márret báfaideaddji jumain
dego čáziid eatnatvuohta.
56 Duššadeaddji boahtá,
dat falleha Babylonia.
Dan soahteolbmát fáŋgejuvvojit,
sin dávggit doddjojuvvojit.
Hearrá lea mávssaheami Ipmil,
son mávssaha ollásit.
57 Mun jugahan gárremiidda Babylonia stuorráid ja viisáid, dan oaivámuččaid, eatnanhearráid ja soahteolbmáid. Sii nohkket agálaš nahkáriidda eaige šat gohccá, cealká Gonagas – Hearrá, Almmiveagaid Ipmil, lea su namma.
58 Ná cealká Hearrá, Almmiveagaid Ipmil:
Babylonia assás muvrrat
gaikkoduvvojit eatnama ráje,
dan alla poarttat cahkkehuvvojit.
Álbmogiid rahčamuš manná duššás,
buot mainna dat leat váibadan iežaset,
jávká dollanjuovččan.
59 Dáinna gohččosiin profehta Jeremia rávvii Serajai, Neria bárdnái, Mahseja áddjubii, dalle go Juda gonagas Sidkia lei njealját ráđđenjagistis vuolgimin Babyloniai oktanaga Serajain; Seraja anii fuola idjasajiin. 60 Jeremia lei čállán girjái buot lihkuhisvuođaid mat galge deaividit Babylona, visot mii lei einnostuvvon dan gávpoga hárrái. 61 Jeremia dajai Serajai: Go don ollet Babylonii, de ane fuola ahte logat visot mii lea čállojuvvon dán girjái. 62 Daja dasto: “Hearrá, don leat ieš áitán duššadit dán báikki, nu ahte dáppe ii ása oktage, eai olbmot eaige oamit. Dat šaddá meahccin agibeaivái.” 63 Ja go leat geargan lohkamis dán girjji, de čana dasa geađggi ja bálkes guovdu Eufrateanu. 64 Daja dasto: “Ná vuodju Babylon iige goassege šat govddit daid lihkohisvuođaid geažil maid Hearrá diktá deaivat dasa.”
Dása nohket Jeremia sánit.