Jerusalem váldojuvvo
1 Sidkia lei guoktelogiokta jagi boaris go šattai gonagassan, ja son ráđđii Jerusalemis oktanuppelohkái jagi. Su eadni lei libnalaš Hamutal, Jeremia nieida. 2 Son dagai dan mii lei bahá Hearrá čalmmiin, áibbas nugo Jojakim lei dahkan. 3 Hearrá moari dihte Jerusalemii ja Judai geavai nu mo geavai. Viimmat Hearrá suhppii daid muođuidis ovddas.
Sidkia stuimmáskii Babylonia gonagasa vuostá. 4 Sidkia ovccát ráđđenjagi logát mánus, mánu logát beaivvi, Babylonia gonagas Nebukadnesar fallehii oppa soahteveagainis Jerusalema. Su soahteveahka ceggii soahtesiidda gávpoga lusa ja ráhkadii fallehančomaid dan birra. 5 Gávpot birastahttojuvvui gitta gonagas Sidkia oktanuppelogát ráđđenjagi rádjái. 6 Njealját mánu ovccát beaivvi, go nealgi lei šaddan gávpogis stuorisin iige eatnama álbmogis lean láibi, 7 de vašálaš gaikkui muvrra čađa gávpogii. Ihkku gonagas ja buot soahteolbmát báhtaredje birastahttojuvvon gávpogis poartaráigge dan guovtti muvrra gaskka gonagasa šaddogárddi guoras. Sii dollejedje Jordanleagi guvlui, 8 muhto kaldealaččaid soahteveahka doarridii gonagas Sidkia ja juvssai su Jeriko duolbadasas. Dalle oppa soahteveahka guđii su ja bieđganii. 9 Gonagas dohppejuvvui ja dolvojuvvui Riblai, Hamata eatnamis. Doppe Babylonia gonagas celkkii sutnje duomu. 10 Babylonia gonagas gottii Sidkia bártniid áhčiset oaidnut, ja son gottihii maiddái buot Juda oaivámuččaid Riblas. 11 Son gohčui čalmmehuhttit Sidkia, čanahii su bronsaláhkkiiguin, doalvvui su Babyloniai ja bijai su giddagassii. Doppe Sidkia šattai orrut gitta jápminbeaivvis rádjái.
12 Viđát mánu logát beaivvi, Babylonia gonagasa Nebukadnesara ovccinuppelogát ráđđenjagi, bođii Jerusalemii okta Babylonia gonagasa lagamus olbmáin. Su namma lei Nebusaradan ja son lei heaggafávttaid oaivámuš. 13 Son bolddii Hearrá viesu ja gonagasa šloahta ja buot Jerusalema viesuid. Maiddái buot stuorráid viesuid son bolddii. 14 Kaldealaččaid soahteveahka mii lei heaggafávttaid oaivámučča mielde, gaikkui eatnamii buot muvrraid Jerusalema birra. 15 Dasto heaggafávttaid oaivámuš Nebusaradan doalvvui fáŋgavuhtii maŋimušaidge álbmogis geat ain ledje gávpogis. Son doalvvui maiddái daid geat ledje mannan Babylonia gonagasa beallái, ja daid duojáriid geat velá ledje báhcán. 16 Dušše soames geafes olbmuid son guđii bargat viidnegárddiid ja bealdduid.
17 Kaldealaččat gaiko cuovkkas bronsabácciid mat ledje Hearrá viesus, nu maiddái tempela bevddiid ja bronsameara, ja buot bronssa sii dolvo Babyloniai. 18 Sii válde báđiid, gutnagoaivvuid ja niibbiid, oaffarbolluid, gohpuid ja buot bronsalihtiid mat ledje adnojuvvon ipmilbálvalusas. 19 Heaggafávttaid oaivámuš válddii lihtiid ja dollalihtiid, oaffarbolluid ja báđiid, ginttaljulggiid, suovaslihtiid ja juhkanoaffarbolluid mat ledje duddjojuvvon gollis ja silbbas. 20 Buot dain dávviriin maid gonagas Salomo lei duddjohan Hearrá vissui, dan guovtti bronsabáccis, bronsamearas ja guoktenuppelohkái bronsavuovssás mat ledje meara vuolde, ja logi beavddis, lei bronsa nu ollu ahte dat ii lean vihkkemis. 21 Guktuid bácciid allodat lei gávccinuppelohkái állana ja birramihttu guoktenuppelohkái állana. Báccit ledje njeallje suorpma gasu ja dat ledje siskkil guovnnjil. 22 Goappáge báccis lei bronsabázzeoaivi mii lei vihtta állana alu, ja dan birra ledje gođushearvvat ja granáhtaehpelat, buot bronssas. 23 Ovccilogiguhtta granáhtaehpela ledje oidnosis; buohkanassii gođushearvvain ledje čuođi granáhtaehpela.
Juda olbmot dolvojuvvojit Babyloniai
24 Heaggafávttaid oaivámuš válddii fáŋgan Seraja, bajimušbáhpa, ja Sefanja, nubbin bajimuš báhpa, ja golbma uksafávtta. 25 Gávpogis son válddii fáŋgan dan hoavvaolbmá gii lei soahteveagaoaivámuš, gonagasa čieža lagamus bálvaleaddji geat ledje ain gávpogis, ja soahteveagaoaivámučča čálli gean bargun lei čálihit eatnamis olbmáid soahtebálvalussii, ja guhttalogi eará olbmá geat ledje gávpogis. 26 Daid buohkaid heaggafávttaid oaivámuš Nebusaradan doalvvui Babylonia gonagasa lusa Riblai. 27 Riblas, Hamata eatnamis, Babylonia gonagas gottihii sin. Nu Juda álbmot dolvojuvvui eret eatnamisttis.
28 Dát lea daid olbmuid lohku geaid Nebukadnesar doalvvui fáŋgavuhtii: Čihččet ráđđenjagistis son doalvvui golbmaduhát guoktelogigolbma Juda olbmo, 29 gávccinuppelogát ráđđenjagistis gávccičuođigolbmalogiguokte Jerusalema ássi, 30 ja Nebukadnesara guoktelogigoalmmát ráđđenjagis heaggafávttaid oaivámuš Nebusaradan doalvvui fáŋgavuhtii vel čiežačuođinjealljelogivihtta Juda olbmo, oktiibuot njealljeduhát guhttačuođi olbmo.
Gonagas Jojakin árpmihuvvo
31 Go Juda gonagas Jojakin lei leamaš fáŋgavuođas golbmalogičieža jagi, de Babylonia gonagas Evil-Merodak árpmihii su ja luittii su giddagasas. Dat dáhpáhuvai seammá jagi go Evil-Merodak lei šaddan gonagassan, dan jagi guoktenuppelogát mánus, mánu guoktelogiviđát beaivvi. 32 Babylonia gonagas sártnui suinna ustitlaččat ja attii sutnje saji boaššoleappos go eará gonagasaide geat ledje su luhtte Babylonas. 33 Jojakin beasai nuollat fáŋgabiktasiiddis, ja dasto son boradii gonagasa beavddis nu guhká go elii. 34 Son oaččui Babylonia gonagasas bissovaš ealáhusa juohke beaivvi, gitta jápminbeaivvis rádjái.