Hopp rett til
Kirkeårets teksterDagens bibelord
Tegnforklaringer
Bibelleseplaner
Kjøp Bibelen
Bibelsøk
Søk
 |
 |
 |
| Hvor finner jeg... |
.
Jeremia
1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50 51 52| < Forrige kapittel | Neste kapittel > |
| 6Benjaminlaččat, báhtarehket Jerusalemis! Bossot dorvve Tekoas, cahkkehehket mearkadola Bet-Hakkeremii! Davil áitá lihkuhisvuohta ja stuorra heavahus. 2 Mun duššadan nieida Siona, fávrros ja jiellahallon nieidda. 3 Su vuostá bohtet báimmanat ealuideasetguin. Sii ceggejit gođiid dan birra, ja iešguhtege váldá iežas guohtoneananbihtá. 4 Gulahehket bassi soađi Siona vuostá! Bohtet, fallehehkot guovdelaš beaivvi! Ilá maŋŋit! Beaivi juo veaigána, ja eahkedissuoivanat guhkkot. 5 Bohtet, fallehehkot dalle ihkku ja duššadehkot su ladniid! 6 Ná cealká Hearrá, Almmiveagaid Ipmil: Njeidet muoraid ja huksejehket fallehangorgŋehaga Jerusalema vuostá! Vuoi dán giellásiid gávpoga! Dan dievva lea soardin. 7 Nugo čázit golget gáivvos, nu dát gávpot diktá iežas bahávuođa golgat. Veahkaválddi ja stajideami jienat gullojit das, hávit ja časkkástagat leat álo mu ovddas. 8 Jerusalem, váldde vára bagadusas, aman jorgalit dutnje sealggi ja dahkat du ávdin guovlun, eanamin gos ii oktage ása. 9 Ná cealká Hearrá, Almmiveagaid Ipmil: Israela bázahas čoggojuvvo dego viidnemuoras čoaggináigge maŋŋá! Geige vel oktii gieđa viidnemuora guvlui dego viidnemuorječoaggi! 10 “Geasa mun sártnošin, gii gulašii go mun várren? Sii leat dahppan beljiideaset, sii eai dáhto gullat du jiena. Hearrá sáni sii atnet bilkun, eai sii beroš das. 11 Muhto mu dievva lea Hearrá moarri, mun in veaje dan caggat.” Golggat dan mánáid badjelii geat vázzet gáhtas, nuoraid badjelii geat leat boahtán čoahkkái! Olbmát ja nissonat váldojuvvojit gitta, velá boarrásat ja vuorasmuvvan olbmotge. 12 Viesut ja bealddut gártet earrásiidda, vašálaš váldá olbmáin áhkáid. Mun geigen gieđa dán eatnama ássiid vuostá, cealká Hearrá. 13 Sii buohkat, smávvát ja stuorrát, bivdet vearrivuoittu. Profehtat ja báhpat meannudit behtolaččat. 14 Geahppadit sii dálkkastit mu álbmoga vigi. Sii celket: “Ráfi, ráfi!” vaikko ráfi ii leat. 15 Sii leat dahkan heahpatlaš ja fasttes daguid, muhto sii eai dovdda heabu, eai oppa máhtege heahpanaddat. Dan dihte sii gahččet gahččan olbmuid gaskii. Sii guossalit go mun ozahalan sin, cealká Hearrá. 16 Ná cealká Hearrá: Orustehket ja gehččet gosa lehpet mannamin, váldet vára boares bálgáin! Jerret mii lea buorre geaidnu ja vádjolehket dan, de dii gávdnabehtet vuoiŋŋadusa. Muhto dii vástideiddet: “Eat vádjol!” 17 Mun bidjen didjiide várdájeddjiid ja celken: “Guldalehket dorvve jiena!” Muhto dii vástideiddet: “Eat guldal!” 18 Gullet dál, álbmogat! Dii buohkat geat lehpet čoagganan, fuomášehket mii dál dáhpáhuvvá. 19 Gula, eanan! Mun buvttán lihkuhisvuođa dán álbmogii, dat lea dan bahás áigumušaid šaddu. Dat ii leat jeagadan mu sániid, mu lága dat lea hilgon. 20 Maid mun Saba suovvasiiguin, gáiddus eatnama buoremus kalmusiin? Din boaldinoaffarat eai dohkke munnje, din njuovvanoaffarat eai leat mu miela mielde. 21 Dan dihte Hearrá cealká: Geahča, mun bijan dán álbmoga ovdii jorralusgeađggi! Dasa guossalit sihke áhčit ja bártnit, ja siidaguoibmi duššá oktan siidaguimmiinis. 22 Ná cealká Hearrá: Davvieatnamis boahtá álbmot, veagalaš álbmot čuožžila eatnama doppimuš ravddas. 23 Sis lea gieđas dávgi ja soahteákšu, sii leat goavvásat eaige árpmit ovttage. Sin jietna lea dego máraideaddji mearra, sii riidejit heasttaiguin gergosat fallehit du, nieida Sion. 24 “Go mii gulaimet sága dan birra, de min gieđat njurre. Áŧestus dohppii min dego ávttat riegádahtti nissona. 25 Allet mana gieddái, allet vádjol bálgáid, dasgo doppe lea vašálačča miehkki! Suorggahus lea juohke báikkis!” 26 Mu vártnuhis álbmot, gárvot horstta, fierat gunaid siste! Moraš ja čiero bahččagit, dego olmmoš morašta áidna bártni. “Fáhkkestaga duššadeaddji falleha min!” Profehta geahččala álbmoga 27 Mun lean bidjan du geahččalit iežan álbmoga nugo silba geahččaluvvo. Don galggat guorahallat dan, geahččalit dan vádjolusa. 28 Sii leat buohkat gážžáris verrošeaddjit, sii golget sárdnumin sealggebealde, duođaid, sii leat buohkat gealbboheamit, dušše veaiki ja ruovdi. 29 Vuossu bossu, muhto dolas golgá dušše ladju. Dušši dihte lea suddaduvvon, skárta ii leat sirrejuvvon. 30 Hilggohassilban sii gohčoduvvojit, dasgo Hearrá lea hilgon sin. |
| < Forrige kapittel | Neste kapittel > |
Lukk X
Her kan registrerte brukere snart lagre egne kommentarer på det valgte verset.
Nå lager vi ny nettbibel
Nettbibelen blir ny høsten 2023. Vi ruller ut nye funksjoner fortløpende, og trenger din hjelp til å teste og gi tilbakemelding.
Test på beta.bibel.no