Jeremia sárdnu tempelis
1 Dát Hearrá sátni bođii Jeremiai: 2 Mana čuožžut Hearrá tempela portii ja gulat doppe ná:
Gullet Hearrá sáni, buot dii Juda ássit geat mannabehtet dáid poarttaid ráigge rohkadallat Hearrá! 3 Ná cealká Hearrá, Almmiveagaid Ipmil, Israela Ipmil: Hilgot vearregeainnuideattet ja dahket buriid, de mun divttán din ássat dán báikkis. 4 Allet dorvvas dákkár gielis sániide: “Dát lea Hearrá tempel, Hearrá tempel, Hearrá tempel!” 5 Muhto jos dii duođaid buoridehpet vádjolusadet ja daguideattet, jos dahkabehtet rievttuid guhtet guimmiidasadet, 6 jos ehpet soardde vierrásiid, oarbásiid ehpetge leaskkaid, ehpet golggat vigihis vara dán báikkis ehpetge vádjol eará ipmiliid maŋis alcceseattet vahágin, 7 de mun divttán din ássat dán báikkis, dán eatnamis maid mun dolin adden din áhčiide agálaš áigái. 8 Muhto dii dorvvastehpet gielis sániide mat eai leat maninge ávkin. 9 Dii suoládehpet, goddibehtet, rihkkubehtet náittosdili, vuordnubehtet vearrut, cahkkehehpet oaffardola Baalii ja vádjolehpet eará ipmiliid maŋis maid ehpet dovdda. 10 Ja de dii loaiddastehpet mu ovdii dán vissui man badjel mu namma lea celkojuvvon, ja dadjabehtet: “Mii leat bestojuvvon!” muhto dahkabehtet ain buot hirbmatlaš daguideattet. 11 Rievvárbiedjungo dii atnibehtet dán viesu man badjel mu namma lea celkojuvvon? Dakkáražžan munge lean dan gávnnahan, cealká Hearrá.
12 Mannet mu bassibáikái Šilos, gos mun ovdal dikten iežan nama ássat. Gehččet maid mun dahken dasa álbmogan Israela bahávuođa dihte! 13 Ja dál dii lehpet dahkan buot seammá daguid, cealká Hearrá. Dii ehpet gullan vaikko mun árrat ja oktilassii sárdnon didjiide, dii ehpet vástidan vaikko mun rávken din. 14 Dán vissui man badjel mu namma lea celkojuvvon ja masa dii dorvvastehpet, ja dán báikái maid mun adden didjiide ja din áhčiide, mun dagan nugo dahken Šiloi. 15 Mun suhppen din eret muođuidan ovddas, seammá láhkái go mun suhppejin eret buot din vieljaid, oppa Efraima náli.
Álbmot ii leat dáhtton gullat Hearrá
16 Ale rohkadala dán álbmoga ovddas. Ale bajit dan ovddas váidalusa dahje rohkosa, ale vuorjja mu, dasgo mun in guldal du. 17 Itgo don oainne maid sii dahket Juda gávpogiin ja Jerusalema gáhtain? 18 Mánát čogget muoraid, áhčit cahkkehit dola ja nissonat duhppejit dáiggi vai besset láibut oaffargáhkuid Almmi dronnegii. Sii golggahit juhkamušoaffariid eará ipmiliidda ja nu rihkkot mu vuostá. 19 Muhto mun, Hearrá, jearan: Mugo vuostá sii rihkkot? Eaigo sii baicce rihko iežaset vuostá? Iežaset sii heahppášuhttet! 20 Dan dihte cealká Hearrá Ipmil: Mun golggahan suhtton ja moarrán dán báikki badjelii, olbmuid ja spiriid badjelii, meahci muoraid ja eatnama šattuid badjelii, ja dat buollá iige čáskka.
21 Ná cealká Hearrá, Almmiveagaid Ipmil, Israela Ipmil: Lasihehket boaldinoaffariid iežadet njuovvanoaffariidda ja borret bierggu! 22 Go mun bukten din áhčiid Egyptas, de mun in addán sidjiide mearrádusaid boaldinoaffariid ja njuovvanoaffariid birra. 23 Muhto mun gohččon sin ná: “Gullet mu jiena, de mun lean din Ipmil ja dii lehpet mu álbmot. Vádjolehket álo dan geainnu man mun gohčun din vádjolit, vai didjiide geavvá bures.” 24 Muhto sii eai gullan mu eaige bivdán bealjige, muhto vádjoledje iežaset jurdagiid mielde, iežaset bahás ja buššon váimmu mielde. Sii jorgaledje munnje sealggi eaige muođuid. 25 Dan beaivvi rájes go sin áhčit vulge Egyptas gitta dán beaivvi rádjái, mun lean vuolggahan bálvaleddjiidan profehtaid sin lusa. 26 Muhto sii eai dáhtton guldalit mu, eai dáhtton dahkat oppa gullinge. Sii dušše buoššudedje iežaset ja dahke vearrábut go sin áhčit.
27 Ja go don, Jeremia, sártnut sidjiide buot dán, de sii eai guldal du, ja go don rávkkat sin, de sii eai vástit dutnje. 28 Cealkke dalle sidjiide: Dát lea álbmot mii ii dáhtton gullat Hearrá, Ipmilis, jiena iige váldit vuostá bagadusa. Duohtavuohta lea nohkan, dat ii gullo šat sin njálmmis.
29 Čuohpa vuovttaidat ja bálkes daid eret!
Rohttet morašlávlaga báljes alážiin!
Hearrá lea hilgon ja duvdilan eret
buolvva masa son lea moaris.
30 Juda álbmot lea dahkan dan mii lea bahá mu čalmmiin, cealká Hearrá. Sii leat ceggen fasttes ipmilgovaideaset dan vissui man badjel mu namma lea celkojuvvon, sii leat dahkan dan buhtismeahttumin. 31 Sii leat huksen Tofeta oaffarbáikki Ben-Hinnoma leahkái vai besset boaldit das bártniideaset ja nieiddaideaset. Dan mun in leat gohččon sin dahkat iige dat leat badjánan mu millii.
32 Dan dihte bohtet beaivvit, cealká Hearrá, go dan namma ii šat leat Tofet iige Ben-Himmonleahki, muhto Sorbmenleahki. Dán álbmoga rupmašat hávdáduvvojit Tofetii dassážii go ii leat šat sadji. 33 Dat šaddet almmi lottiid ja eatnama elliid biebmun, iige oktage gavdnje daid eret. 34 Mun loahpahan Juda gávpogiin ja Jerusalema gáhtain ávvučuorvasiid ja illučuorvasiid, mun divttán irggi ja moarsi jiena jaskkodit. Dasgo eanan šaddá ávdimin.