1 Dán mun lean sárdnon didjiide amadet jorralit. 2 Sii ádjet din olggos synagogas. Áigi boahtá go dat gii goddá din, jáhkká ahte son dan bokte bálvala Ipmila. 3 Ná sii dahket danne go eai dovdda Áhči eaige mu. 4 Mun lean cealkán didjiide dán, vai dii, go dat áigi boahtá, muitibehtet ahte mun celken dan.
Bealušteaddji
Mun in sárdnon didjiide dán álggus, danne go lean ieš leamaš dinguin. 5 Muhto dál mun manan su lusa gii lea vuolggahan mu. Ii oktage dis jeara gosa mun manan, 6 muhto din váibmu lea morrašis dan geažil maid mun dadjen didjiide. 7 Muhto mun cealkkán didjiide duohtavuođa: Didjiide lea ávkin ahte mun manan eret. Jos mun in mana, de Bealušteaddji ii sáhte boahtit din lusa. Muhto go mun lean mannan, de mun vuolggahan su din lusa, 8 ja son boahtá ja čájeha máilbmái mii lea suddu, mii vanhurskkisvuohta ja mii duopmu. 9 Suddu lea das ahte olbmot eai oskko munnje, 10 vanhurskkisvuohta boahtá albmosii das ahte mun manan Áhči lusa ehpetge dii oainne šat mu, 11 ja duopmu lea das ahte dán máilmmi ráđđejeaddji lea dubmejuvvon.
12 Mus lea ain ollu sárdnumuš didjiide, muhto dii ehpet sáhte váldit dan vuostá. 13 Muhto go Duohtavuođa Vuoigŋa boahtá, de son oahpista din dovdat olles duohtavuođa. Son ii sártno iešalddis, muhto sárdnu dan maid gullá, ja son almmuha didjiide boahttevaš dáhpáhusaid. 14 Son hearvásmahttá mu, danne go son oažžu mus dan maid son almmuha didjiide. 15 Buot mii lea Áhči, lea maiddái mu. Danne mun celken ahte son oažžu mus dan maid son almmuha didjiide.
Moraš šaddá illun
16 Oanehis bottoža geažes dii ehpet oainne mu, ja fas oanehis bottoža geažes dii oaidnibehtet mu.” 17 Dalle muhtumat su máhttájeddjiin jerre guhtet guoimmisteaset: “Maid son oaivvilda go dadjá: ‘Oanehis bottoža geažes dii ehpet oainne mu, ja fas oanehis bottoža geažes dii oaidnibehtet mu’? Ja maid son oaivvilda go dadjá ahte son manná Áhči lusa? 18 Maid son oaivvilda oanehis bottožiin? Mii eat ádde maid son sárdnu.” 19 Jesus oinnii ahte sii áigo jearrat sus, ja son celkkii: “Dango dii imaštallabehtet ahte mun celken: ‘Oanehis bottoža geažes dii ehpet oainne mu, ja fas oanehis bottoža geažes dii oaidnibehtet mu’? 20 Duođaid, duođaid, mun cealkkán didjiide: Dii šaddabehtet čierrut ja luoibmat, muhto máilbmi illuda. Dii šaddabehtet morrašii, muhto din moraš šaddá illun. 21 Go nisson riegádahttá, de son lea balus go su boddu lea boahtán. Muhto go mánná lea riegádan, de eadni ii muitte šat bákčasiiddis muhto lea ilus go olmmoš lea riegádan máilbmái. 22 Disge lea dál moraš, muhto mun oainnán din fastain, ja dalle dii lehpet ilus, iige oktage sáhte váldit din ilu dis eret. 23 Dan beaivvi dii ehpet jeara mus maidege. Duođaid, duođaid, mun cealkkán didjiide: Maid ihkinassii dii átnubehtet Áhčis mu nammii, dan son addá didjiide. 24 Dássážii dii ehpet leat átnon maidege mu nammii. Átnot, de oažžubehtet, vai din illu šaddá ollisin.
25 Dán mun lean sárdnon didjiide veardádusaiguin. Boahtá áigi go mun in sártno didjiide šat veardádusaiguin, muhto čielga sániiguin sártnun Áhči birra. 26 Dan beaivvi dii átnubehtet mu nammii. Mun in cealkke ahte rohkadalan Áhči din ovddas, 27 dasgo Áhčči ieš ráhkista din, danne go dii lehpet ráhkistan mu ja oskon ahte mun lean boahtán Ipmila luhtte. 28 Áhči luhtte mun lean vuolgán ja boahtán dán máilbmái, ja dál mun guođán máilmmi ja manan ruoktot Áhči lusa.”
29 Máhttájeaddjit dadje: “Dál don sártnut čielga sániiguin itge veardádusaiguin. 30 Dál mii ipmirdit ahte don dieđát buot itge dárbbaš vuordit ahte guhtege dus jearrá. Danne mii oskut ahte don leat boahtán Ipmila luhtte.”
31 Jesus vástidii: “Dál dii oskubehtet. 32 Áigi boahtá, ja lea juo boahtán, go dii bieđganehpet, iešguhtege guvlosis, ja guođđibehtet mu okto. In mun dattetge leat okto, dainna go Áhčči lea muinna. 33 Mun lean sárdnon didjiide dán, vai dis livččii ráfi mu siste. Máilmmis dis lea áŧestus, muhto lehket dorvvolaččat: Mun lean vuoitán máilmmi.”