Johannesa evangelium

Jesus ja máhttájeaddjit Tiberiasjávrri gáttis

¹ Das maŋŋil Jesus almmustuvai fas máhttájeddjiidasas Tiberiasjávrri gáttis. Dat dáhpáhuvai ná: ² Simon Peter, Tomas gii gohčoduvvui Jumežin, Natanael gii lei eret Kanas Galileas, Sebedeusa bártni guovttos ja guokte eará máhttájeaddji ledje doppe čoahkis. ³ Simon Peter dajai earáide: “Mun vuolggán bivdit guliid.” Sii dadje: “Mii vuolgit duinna.” Sii manne fatnasii ja vulge bivdit, muhto dan ija sii eai fidnen maidege.

⁴ Go šattai iđit, de Jesus čuoččui jávregáttis, muhto máhttájeaddjit eai dovdan su. ⁵ Jesus jearai: “Mánážiiddán, leago dis mihkkege borramuššan?” Sii vástidedje: “Ii leat.” ⁶ Jesus celkkii sidjiide: “Suhppejehket fierpmi fatnasa olgeš beallái, de fidnebehtet guoli.” Sii suhppejedje fierpmi, muhto dál sii eai nagodan oppa geassitge fierpmi, nu ollu ledjen fidnen guliid. ⁷ De dat máhttájeaddji gean Jesus ráhkistii, dajai Peterii: “Dat lea Hearrá!” Go Simon Peter gulai ahte dat lei Hearrá, de son giesai iežas birra biktasa maid lei nuollan, ja njuikii jávrái. ⁸ Eará máhttájeaddjit bohte fatnasiin ja gesse fierpmi man dievva ledje guolit; sii eai lean guhkkin eret gáttis, dušše sullii guoktečuođi állana.

⁹ Go sii ledje boahtán gáddái, de sii oidne das guoli bassomin hilladola alde ja láibbi. ¹⁰ Jesus celkkii sidjiide: “Buktet veahá dain guliin maid fidniidet.” ¹¹ Simon Peter manai fatnasii ja gesii fierpmi gáddái. Dan dievva ledje stuorra guolit, muhto vaikko guolit ledje ollu – oktiibuot čuođivihttalogigolbma – de fierbmi ii gaikánan. ¹² Jesus celkkii sidjiide: “Bohtet boradit.” Ii oktage máhttájeddjiin arvan jearrat sus: “Gii don leat?” danin go sii dihte ahte dat lei Hearrá. ¹³ Jesus bođii, válddii láibbi ja attii sidjiide, ja son attii maiddái guoli.

¹⁴ Dát lei goalmmát geardi go Jesus almmustuvai máhttájeddjiidasas maŋŋil go lei čuožžilan jábmiid luhtte.

Jesus ja Peter

¹⁵ Go sii ledje boradan, de Jesus celkkii Simon Peterii: “Simon, Johannesa bárdni, ráhkistatgo don mu eambbo go dát earát?” “De ráhkistan, Hearrá”, Peter vástidii, “don dieđát ahte leat munnje ráhkis.” Jesus celkkii sutnje: “Biepma mu lábbáid.” ¹⁶ De son jearai sus nuppádassii: “Simon, Johannesa bárdni, ráhkistatgo don mu?” “De ráhkistan, Hearrá”, Peter vástidii, “don dieđát ahte leat munnje ráhkis.” Jesus celkkii: “Geahča mu sávzzaid.” ¹⁷ Vel goalmmát geardde Jesus jearai: “Simon, Johannesa bárdni, leango mun dutnje ráhkis?” Peter šlunddui go Jesus goalmmát geardde jearai sus: “Leango mun dutnje ráhkis?” ja son vástidii: “Hearrá, don dieđát buot; don dieđát ahte leat munnje ráhkis.” Jesus celkkii: “Biepma mu sávzzaid. ¹⁸ Duođaid, duođaid, mun cealkkán dutnje: Go don ledjet nuorra, de don ieš boahkánastet iežat ja mannet gosa dáhttot. Muhto go boarásmuvat, de don geiget gieđa ja muhtun eará boahkánastá du ja doalvu du dohko gosa it dáhto.” ¹⁹ Ná Jesus dieđihii makkár jápmimiin Peter hearvásmahttá Ipmila.

Dasto son celkkii Peterii: “Čuovo mu!” ²⁰ Peter jorggihii ja oinnii dan máhttájeaddji čuovvumin gean Jesus ráhkistii, dan gii eahkedismállásiin lei mieigan su ratti vuostá ja jearran: “Hearrá, gii beahttá du?” ²¹ Go Peter oinnii su, de son jearai Jesusis: “Naba son, Hearrá?” ²² Jesus vástidii: “Mii das guoská dutnje, jos mun dáhtun ahte son báhcá deike dassážii go mun boađán? Čuovo don mu.” ²³ Dás šattai vieljaid gaskii jáhkku ahte dat máhttájeaddji ii jáme. Muhto ii Jesus lean cealkán Peterii ahte dat máhttájeaddji ii jáme, muhto son celkkii: “Mii das guoská dutnje jos mun dáhtun ahte son báhcá deike dassážii go mun boađán?”

²⁴ Aiddo dat máhttájeaddji duođašta visot dáid dáhpáhusaid. Son lea dán čállán, ja mii diehtit ahte su duođaštus lea duohta. ²⁵ Jesus dagai maiddái ollu eará daguid. Jos daid čálášii, juohke diŋgga sierra, de jáhkán ahte ii oppa máilbmige geasáše daid girjjiid mat dalle fertešedje čállojuvvot.