1 Mun lean dolkan eallimis.
Mun váidalan cakkatkeahttá,
mun sártnun sillon bahča bákčasis.
2 Ipmil, ale dubme mu sivalažžan!
Muital munnje manne don áššáskuhtát mu.
3 Mii ávkkiid dutnje lea das
ahte soarddát mu,
ahte hilggut dan gean du gieđat
leat ráhkadan,
muhto divttát iežat čuovgga
báitit ipmilmeahttumiidda?
4 Leatgo dus olbmo čalmmit,
oainnátgo don nugo olmmoš oaidná?
5 Leatgo du beaivvit
nugo olbmo beaivvit,
du jagit dego olbmá jagit,
6 go juo don ozat mus siva
ja jearahat mu suttuid,
7 vaikko dieđát ahte mun lean vigiheapme?
Ii oktage sáhte gádjut olbmo du gieđas.
8 Du gieđat leat dahkan
ja ráhkadan mu obbanaga.
Áiggutgo don dál heavahit mu?
9 Muitte ahte don hábmejit mu
dego olmmoš hábme láirrá.
Divttátgo don dál mu šaddat fas eanamin?
10 Don golggahit mu dego mielkki,
lohppehit mu dego vuosttá.
11 Don gárvvuhit munnje liikki ja oačči,
gođđet mu oktii dávttiiguin ja suonaiguin.
12 Don addet munnje eallima
ja ledjet munnje buorre,
don várjalit mu heakka.
13 Muhto don vurkejit dán váibmosat,
mun dieđán ahte dát dus lei mielas:
14 Don vávššut josgo mun suddudan,
don it dáhtoše luoitit mu suddovealggi.
15 Vuoi mu, jos mun livččen sivalaš!
Ja jos mun livččen sivaheapme,
de in mun almmatge sáhtáše bajidit oaivvi,
danin go heahpat ja vártnuhisvuohta
deaddá mu.
16 Jos mu oaivi badjána,
de don doarridat mu dego ledjon
ja ain ođđasis meannudat
muinna imašlaččat.
17 Don buvttát čađat
ođđa duođašteddjiid mu vuostá,
don moaráhuvat munnje ain eambbo
ja vuolggahat ain ođđa veagaid fallehit mu.
18 Manne don diktet mu
boahtit olggos eatniheakkas?
Vare mun livččen jápmán
iige oktage livčče oaidnán mu!
19 Vare mun in livčče goassege leamaš!
Mun livččen dolvojuvvon
eatniheakkas hávdái.
20 Hárvát leat mu eallinbeaivvit.
Heaitte juo! Divtte mu orrut,
suova munnje veaháš ilu,
21 ovdal go mun manan
seavdnjadasa eatnamii
gos in goassege šat máhca,
22 jápminsuoivana eatnamii
gos lea idja ja moivi,
dan eatnamii gos čuovganai lea
čáhppadeamos seavdnjadas.