Job vástida Sofarii
1 De Job sártnui:
2 Duođaid, dii lehpet viisát,
oktan dinguin jápmá viisodat!
3 Muhto mus lea jierbmi nugo disge,
in mun leat heajut go dii.
Mii dis lea mii earáin ii leat?
4 Mun lean šaddan olbmuid bogostahkan,
mun gii čurvon Ipmila ja ožžon vástádusa,
vuoiggalaš ja láitemeahttun olmmoš
– bogostahkan!
5 Oasehis olbmui lea muttát
badjelgehččojupmi,
nu jurddaša oadjebas,
olbmo iežas sivva lea go son guossala.
6 Muhto rievvárat besset orrut ráfis
gođiineaset,
dat geat hárdet Ipmila ellet oadjebassan,
vaikko sii leat Ipmila fámu vuolde.
7 Jearamat spiriin, de dat oahpahit du,
almmi lottit vástidit dutnje.
8 Gaža eatnama sivdnádusain,
de dat bagadit du,
ábi guolit muitalit dutnje.
9 Mii dáin ii dieđáše ahte Hearrá giehta
lea dahkan visot?
10 Su gieđas lea buot heakkalaččaid eallin,
juohke olbmo vuoigŋa.
11 Iigo beallji geahččalatta sániid
nugo guopmi máistá borramuša?
12 Vuorrasiin lea viisodat,
guhkes eallin addá jierpmi.
13 Ipmilis lea viisodat ja váldi,
sus lea ráđđi ja jierbmi.
14 Go son gaikkoda, de ii oktage šat hukse,
go son váldá fáŋgan,
de ii oktage luoitte friddjan.
15 Go son buođđu čáziid,
de šaddá goikkádat,
go son daid fas luoitá,
de dat heavahit eatnama.
16 Su lea gievravuohta a viissisvuohta,
son ráđđe dan gii čádjida
ja dan gii čádjidahttá.
17 Son doalvu ráđđeaddiid eret
rabas julggiid,
son dahká duopmáriid jallan.
18 Son nuollá gonagasain gorges gárvvuid,
son čatná gonagasaide liinni alimiid birra.
19 Son doalvu báhpaid eret rabas julggiid,
son njeaidá fámolaš olbmáid.
20 Son jávkada sániid
luohtehahtti olbmuid baksamiin
ja váldá eret vuorrasiid jierpmi.
21 Son golggaha heahpada
oaivámuččaid badjelii,
son čoavdá gievrraid boahkána.
22 Son almmustahttá
seavdnjadasa čiegusvuođaid,
jápminsuoivana son buktá čuovgasii.
23 Son diktá álbmogiid stuorrut
ja duššada daid,
son láide álbmogiid ja biđge daid.
24 Son váldá eret jierpmi
álbmoga oaivámuččain,
son čádjidahttá sin
bálggiskeahtes meahccái.
25 Son guođđá sin rávjut
čuovggahis seavdnjadassii,
son diktá sin ruossat dego gárrenolbmuid.