1 Olmmoš, nissonis riegádan,
eallá oanehis áiggi
ja gallehuvvo ráfehisvuođain.
2 Son šaddá dego lieđđi ja goldná,
dat báhtara dego suoivvan
ja lea fargga jávkan.
3 Ja dakkára don anát čalmmis
ja doalvvut dubmejuvvot!
4 Sáhttágo buhtismeahttumis
šaddat buhtis?
Ii sáhte!
5 Go olbmo beaivvit leat lohkkojuvvon,
go don leat ásahan su mánuid logu,
go leat bidjan sutnje ráji
maid son ii sáhte rasttildit,
6 de geahča dasto eará guvlui
ja divtte su orrut, vai son beassá illudit
dego beaivebálkkolaš,
go bargobeaivi lea nohkan.
7 Go muorra njeidojuvvo,
de das lea ain doaivu:
Dan jalgŋás bohciidit vesát,
eaige dan oavssit ádján ihtimis.
8 Vaikko dan ruohttasat
boarásmuvvet eatnamis
ja dan mátta mieská muldii,
9 de čázi hádja oažžu fas dan šaddat
ja šaddadit vesáid
dego easkka ceggejuvvon muorra.
10 Muhto go olmmái jápmá,
de son veallá jábmin.
Go olmmoš lea addán vuoiŋŋas,
gos son lea dalle?
11 Nugo čáhci jávká mearas,
nugo eanut cohkot ja goiket,
12 nu veallána olmmoš iige šat čuožžil.
Ovdal albmi luoddana go son moriha,
ii son goassege boktojuvvo nahkáriinnis.
13 Vare don vurkešit mu
jábmiidáibmui ja čiegašit mu dohko,
dassážii go du moarri lea vássán,
vare don bijašit munnje vissis áiggi
ja de muitášit mu!
14 Go olmmái jápmá, de eallágo son fas?
Mun gierddašin buot
iežan soahtebálvalusa beivviid,
dassážii go mu čovdojupmi boađášii.
15 Don čurvvošit mu, ja mun vástidivččen,
don áibbašivččet fas dan
gean du iežat giehta lea sivdnidan.
16 Dalle don logašit mu lávkkiid
muhto it fákteše, josgo mun suddudan.
17 Mu suttuid don leat vurken,
mu suttuvealggi badjel
don leat geassán gokčasa.
18 Nugo várri mollana ja fierrá
go bákti lihkkasa,
19 nugo čáhci gohpá geđggiid
ja ráššoarvi doalvu eatnama muoldda,
nu don dagat duššin olbmo doaivvu.
20 Don vuoittát su oalát,
ja son ferte vuolgit,
don nuppástuhtát su hámi
ja bijat su mannat.
21 Su mánát vedjet oažžut gudni,
muhto ii son dan dieđe,
sii badjelgehččojuvvojit,
muhto ii son dan fuomáš.
22 Su rumaš dovdá dušše iežas bákčasa.
Son ádde dušše iežas morraša.