1 Mu eallinfápmu lea doddjon,
mu beaivvit leat čáskan,
mu ovddas lea hávdi.
2 Bilkárat birastahttet mu,
mun oainnán dušše sin vašálašvuođa.
3 Bija datte pántta, dáhkit mu!
Eará sihkkarvuohta mus ii leat.
4 Don leat dahppan sin váimmu
nu ahte sii eai ipmir,
danin don it suova sin vuoitit.
5 Jos muhtun beahttá ustibis ruđa dihte,
de su mánát šaddet gillát das
maid son lea dahkan.
6 Ipmil lea dahkan mu
buohkaid sátnevájasin,
olbmot čolget mu muođuid njeaiga.
7 Moraš lea sevnnjodahttán
mu čalmmiid,
mu rumaš lea dušše suoivvan.
8 Visot dát surgeha vuoigatlaš olbmuid,
sivaheapme suhttá ipmilmeahttuma dihte.
9 Ja dattetge vanhurskkis
vádjola stáđđásit,
dat geas leat buhtis gieđat,
oažžu ain eambbo fámu.
10 Muhto sárdnot fal, dii buohkat!
Mun in dattetge gávnna
din gaskkas ovttage viisá.
11 Mu áigi lea nohkan,
mu áigumušat cuvkejuvvon,
buot mu váimmu sávaldagat.
12 Sii lohket ija beaivin,
sii celket ahte čuovga
lea lagabus go seavdnjadas.
13 Leago mus doaivu?
Jábmiidáibmu lea mu visti,
seavdnjadassii
mun lážán alccesan oađđinsaji.
14 Mun gohčodan hávddi áhččin
ja máđuid eadnin ja oabbán.
15 Gos dalle livččii mu doaivu?
Gos mu vuorddášii lihkku?
16 Mannágo doaivuge jábmiidáibmui
oktanaga muinna?
Loaiddastago dat muinna muldii?