Gi hjerteStøtt nettbibelen
Gå til forsiden

Job

22

Elifas sárdnu goalmmát háve

1 De temanlaš Elifas fas sárdnugođii. Son dajai:

2 Sáhttágo olmmoš leat ávkin Ipmilii,

máhttágo velá jierpmáleamosge

leat sutnje ávkin?

3 Leago du vanhurskkisvuohta

illun Buotveagalažžii,

dahje vuoitun dat

ahte vádjolat láitemeahttumit?

4 Ráŋggáštago son du

du ipmilbalolašvuođa dihte,

mannágo son duinna dan dihte

rievtti ovdii?

5 Almma du bahávuohta lea stuoris

ja du vearredagut loahppameahttumat?

6 Almmá siva haga don

váldet pántta vieljainat

ja rievidit sis velá sin maŋimuš biktasiidge.

7 It don addán váiban olbmui čázi juhkat,

nealgeolbmos don biehttalit láibbi.

8 Eananhan gulai fámolaš olbmái,

das ásai stuorra hearrá!

9 Leaskkaid don vuolggahit eret

guoros gieđaid,

cuvkejit áhčihemiid dorvvu.

10 Oavdu dál du birra leat gielat,

ja fáhkkes ballu suorggaha du.

11 Itgo don oainne seavdnjadasa

itge čáhcedulvvi mii heavaha du?


12 Almma Ipmil lea allat dego albmi?

Geahča bajimuš násttiid,

man allagasas dat leat!

13 Dattetge don jearat:

“Diehtágo Ipmil maidege?

Oaidnágo son dubmet seavdnjadasa čađa?

14 Balvvat gokčet su,

iige son oainne maidege.

Son vádjola gáidagasas

almmi gomuvuođa alde.”

15 Almma don čuovut dan boares bálgá

man mielde bahás olbmot vádjolit.

16 Dat geat rohttejuvvojit eret

ovdal áiggi,

go dulvi doidá eret sin vuođu.

17 Sii dadje Ipmilii: “Divtte min orrut!

Maid Buotveagalaš sáhttá dahkat midjiide?”

18 Son lei goitge deavdán

sin viesuid buriiguin!

Muhto sii mearridedje áigumušaideaset

eaige váldán Ipmila vuhtii.

19 Vuoigatlaččat oidnet mo

sidjiide geavvá ja illudit,

sivaheamit bilkidit sin:

20 “Gehččet mo min vuostálastit

duššaduvvojit,

ja dolla loaktá dan mii vel lea báhcán.”


21 Soabat dal suinna, Job,

de dutnje geavvá bures,

ja lihkku máhccá fas du lusa.

22 Gula su, go son oahpaha du,

ja vurke su sániid váibmosat.

23 Jos don jorgalat Buotveagalačča beallái,

de don oaččut fas dan maid leat massán.

Jos don gáidadat vearrivuođa goađistat

24 ja bálkestat golliidat muldii,

iežat Ofira golliid joga geđggiid gaskii,

25 de Buotveagalaš šaddá du gollin

ja du silbbaid eatnatvuohtan.

26 Dalle Buotveagalaš lea du illu,

ja don oaččut bajidit muođuid Ipmila guvlui.

27 Go don rohkadalat su, de son gullá du,

ja don oaččut ollašuhttit dan

maid leat lohpidan.

28 Jos don mearridat dahkat juoidá,

de dat lihkostuvvá dutnje,

ja beaivi báitá du geainnuide.

29 Ipmil vuolida daid geat čeavlástallet,

muhto vuollegaččaid son beastá.

30 Son gádju velá dange

gii ii leat vigiheapme;

jos sus leat buhtis gieđat,

de son gáddjojuvvo.

Les vår personvernserklæring
Skjemaet er beskyttet av reCAPTCHA og Googles Privacy Policy og Terms of Service gjelder.