Job vástida Elifasii
1 De Job sártnui:
2 Vel oktii mun váidalan bahččagit.
Su giehta lea lossat, ja mun šuohkán.
3 Vare mun dieđášin gos su sáhttá gávdnat!
Mun manašin su duopmostuolu ovdii,
4 ovddidivččen áššán sutnje
ja buvttášin ovdan iežan ákkaid.
5 Mun beasašin gullat maid son vástida,
oččošin diehtit maid son dáhttu
sárdnut munnje.
6 Livččiigo son munnje goavvi?
Ii eisege, son baicce guldalivččii mu.
7 Das digaštalašii suinna
vuoigatlaš olmmái,
ja mun celkojuvvošin sivaheapmin
agálaččat.
8 Muhto jos mun manan nuorttas,
de ii son leat doppe,
jos jorggihan oarjjás,
de in mun áicca su.
9 Jos mun ozan davvin,
de in mun oainne su,
jos jorggihan lulás,
de in mun gávnna su.
10 Son dovdá geainnu
man mun vádjolan,
ja jos son geahččala mu,
de mun lean buhtis dego golli.
11 Mun lean vádjolan oskkáldasat
su luottaid,
mun lean váldán vuhtii su geainnu
inge leat spiehkastan das.
12 Mun in leat rihkkon báhkkomiid
maid son lea addán,
mun lean vurken su sániid
iežan siskkildassii.
13 Go son lea mearridan juoidá,
gii dalle sáhttá hehttet su?
Maid son dáhttu, dan son dahká.
14 Son ollašuhttá
dan maid lea mearridan mu várás
– ollu dakkáraččat leat vuordimis.
15 Danne mun balan go oainnán su,
go mun jurddašan su, de mun doarggistan.
16 Ipmil lea dahkan mu váimmu árgin,
Buotveagalaš lea mu balddihan.
17 Muhto seavdnjadas ii jávohuhte mu,
mun in jávohuva su ovddas
gean seavdnjadas gokčá.