1 Manin dušše Buotveagalaš diehtá
duomu áiggiid,
manne dat leat suollemasat
daidda geat dovdet su?
2 Ipmilmeahttumat sirdet rádjegeđggiid,
rievidit ealuid ja dolvot daid guohtut.
3 Sii dolvot oarbása ásena,
sii váldet pántan leaskka vuovssá.
4 Sii hoigadit váivvášiid luottas,
ja eatnama lojes olbmot fertejit čiehkádit.
5 Dego meahcceásenat
sii johtet ávdin guovlluin.
Sii mannet meahccái,
doppe sii rahčet ja ohcet maid borrat,
biepmu mánáidasaset.
6 Sii čogget gordneoivviid
skealmmaid bealdduin
ja boibmot dan mii lea báhcán
ipmilmeahttuma viidnegárdái.
7 Álásin, almmá biktasiid haga,
sii idjadit olgun,
almmá gokčasa haga galbmasis.
8 Váriid ráššoarvi njuoskada sin,
sii náđđot bávtti állái vai ožžot suoji.
9 Oarbbes mánná rohttejuvvo
eret eatnis čiččis,
váivváša njuoratmánná váldojuvvo pántan.
10 Sii vázzet álásin, almmá biktasiid haga,
nealggis sii fertejit guoddit gordnegihpuid.
11 Muvrraid gaskkas sii vuožuhit oljju,
dulbmet viidnebohčingári ja goiket.
12 Gávpogis gullo jámadeddjiid luoibman,
hávvádahtton olbmot bárgot heađis.
Dattetge Ipmil ii gula sin rohkadusa.
13 Muhtumat leat čuovgasa vašálaččat.
Eai sii dovdda čuovgasa geainnuid,
eai sii vádjol dan bálgáid.
14 Go lea sevnnjodan,
de sorbmejeaddji čuožžila
ja časká jámas váivváša ja vártnuheami.
Ihkku son johtá suollaga láhkái.
15 Fuorás olmmái vuordá eahkedisveaiggi.
Son jurddaša: “Ii oktage oaččo oaidnit mu,”
ja gokčá ámadajus.
16 Seavdnjadin sii gaikot viesuide,
beaivet sii leat čihkosis.
Eai sii dáhto oaidnit čuovgga.
17 Sidjiide buohkaide
seavdnjadas lea dego iđit,
siihan dovdet
buot seavdnjadasa balddáhusaid.
18 Sii jávket dego bárožat čáhcegierragis.
Sin árbeoassi eatnamis lea garuhuvvon,
ii oktage mana sin viidnegárddiide.
19 Goikkádat ja báhkka
njielasta muohtačázi,
jábmiidáibmu dan gii lea suddudan.
20 Su iežas eadni vajáldahttá su,
su borret máđut.
Ii oktage šat muitte su,
ja bahávuohta doddjojuvvo dego muorra.
21 Son speajai mánáhis nissona,
leaskka son ii veahkehan.
22 Fámuinis Ipmil rohtte eret
veagalaččaidge.
Go son čuožžila,
de buohkat balahit heakkaset.
23 Son diktá sin dovdat iežaset
oadjebassan ja dorvvolažžan,
muhto su čalmmit gozihit sin vádjolusa.
24 Sii čevllohallet muhtun áiggi,
muhto de sii leat jávkan.
Sii sojahuvvojit ja veallánit nugo skáhčirat,
sii čuhppojuvvojit dego gordneoaivvit.
25 Duođaid, nu dat lea.
Gii dahká mu gielisin ja mu sániid duššin?