Job vástida Bildadii
1 De Job sártnui:
2 Gal juo leat bures veahkehan
fámohis olbmá,
doarjalan gieđainat vuoimmeheami!
3 Gal juo leat nevvon diehtemeahttuma,
oahpahan sutnje valljugasat viissisvuođa!
4 Gii attii dutnje dáid sániid,
gean vuoigŋa sárdnu du njálmmis?
5 Jámežat doarggistit,
čáziid čiekŋalas ja dat mat doppe ásset.
6 Rahppojuvvon lea jábmiidáibmu
Ipmila ovdii,
čiekŋalas lea almmá gokčasa haga.
7 Son lea lebben almmi ávdima badjel,
son lea heaŋggastan eatnama dušši vehkii.
8 Son giessá čáziid balvvaidis sisa,
eaige balvvat gaikán daid deattus.
9 Son čiehká iežas truvnnu,
son lebbe balvvaidis dan birra.
10 Son lea sáhcon áhpái rádján
almmiravdda,
dohko gos čuovggas ja seavdnjadas
deaivvadit.
11 Almmi báccit doarggistit,
dat suorganit go son čeargu.
12 Son lea stuimmáskahttán ábi
fámuinis,
son lea cuvken Rahaba viissisvuođainis.
13 Son bosui biekkainis
almmi jalahassan,
su giehta čuggii čađa fales gearbmaša.
14 Muhto dát lea dušše
olggumus ravda su barggus,
dat maid mii leat gullan,
lea dušše savkkas.
Gii dalle ipmirda
su buotveagalašvuođa bajána?