1 Job sártnui ain ja celkkii:
2 Vare mu dilli livččii dego ovdal,
nugo daid beivviid go Ipmil ain várjalii mu,
3 go son divttii lámppás čuovgat munnje,
ja mun vádjolin seavdnjadasa čađa
su čuovggas,
4 go mun ledjen fámolaš,
ja Ipmil várjalii mu goađi,
5 go Buotveagalaš lei muinna,
ja mu bártnit ledje ain mu birra!
6 Dalle mun gállen lávccas,
ja oljojogažat golge mu bohčingáris.
7 Go mun mannen gávpotportii
ja čohkánin dohko iežan sadjái,
8 de nuorat geassádedje go oidne mu,
ja vuorrasat čuožžiledje.
9 Oaivámuččat heite sárdnumis
ja bidje gieđa njálmmi ovdii,
10 ja ráđđejeaddjit jávohuvve
dego njuovčča livččii darvánan guopmái.
11 Guhte mu gulai, máinnui mu lihkolažžan,
gii mu oinnii, rámidii mu.
12 Dasgo mun gádjon vártnuheami
gii čuorvvui veahki,
ja áhčiheami gean ii oktage veahkehan.
13 Vártnuheapme buressivdnidii mu,
ja mun illudahtten leaskka váimmu.
14 Mun gárvodin vanhurskkisvuođa,
dat lei mu bivttas,
vuoiggalašvuohta lei mu oalgebivttas
ja mu turbána.
15 Mun ledjen čalmmeheami čalbmi,
mun ledjen lámes olbmo juolgi.
16 Mun ledjen váivvášiid áhčči,
mun veahkehin amas olbmo
oažžut vuoigatvuođa.
17 Mun cuvkejin behtolačča olloliid
ja gaikkihin sállaša su bániid gaskkas.
18 Mun jurddašin:
Mun jámán iežan beassái,
mu beaivvit šaddet eatnagin
dego sáttočalmmit.
19 Mu ruohttasat ollet čáhcái,
suoldni idjada mu ovssiin.
20 Mu gudni ođasmuvvá álelassii,
mu juoksa bissu dávggasin gieđas.
21 Olbmot guldaledje mu vuordevažžan,
sii orro jávohaga go mun rávvejin sin.
22 Go mun ledjen geargan sárdnumis,
de ii oktage dadjan maidege,
ja mu sánit goiko sin ala.
23 Sii vurde daid dego arvvi,
sii goikaluvve daidda nugo giđđaarvái.
24 Go sii doaivvuhuvve,
de mun moddjájin sidjiide,
go mu muođut čuvge, de sii movttiidedje.
25 Mun válljejin sidjiide geainnu,
ledjen sin oaivámuš,
mun ledjen dego gonagas
iežas soahteveaga njunnošis,
nugo dakkár gii jeđđe morašteddjiid.