1 Dál mu boagustit
dat geat leat nuorabut go mun,
olbmát geaid áhčiid mun
in livčče atnán dohkálažžan
sávzabeatnagiiddán gaskii!
2 Sin návccat eai lean
munnje veahkkin,
sis ii lean olmmáivuođa fápmu.
3 Heahti ja nealgi
lea vuoimmehuhttán sin,
sii gáskkildit goikeguolbaniid,
mat ovddežis juo ledje guorba meahcit.
4 Miesttaguorain sii čogget spiinnelasttaid,
gyvelmiestaga ruohttasat sis leat biebmun.
5 Sii áddjojuvvojit eret olbmuid searvvis,
olbmot huiket sin maŋŋái
dego suollagiid maŋŋái.
6 Hirpmus skoaruin sii orrot,
eananbiejuin ja bákteráiggiin.
7 Doppe miestagiid gaskkas
sii bárgot ja čoagganit gáskálasaid vuollái,
8 duot jallat ja gudneheamit
mat ledje áddjojuvvon eatnamis eret.
9 Dál mun lean šaddan sin bilkolávllan,
lean gártan sidjiide sátnevájasin.
10 Sii fasttášit mu ja doalahit gaskka,
sii čolget mu muođuid njeaiga.
11 Ipmil lea ložžen mu dávgesuona
ja vuolidan mu,
danne sin ii cakka mihkkege
go sii oidnet mu.
12 Sin čivggat fallehit mu
ja norddastit julggiid mu vuolde,
sii ráhkadit munnje geainnu oasehisvuhtii.
13 Sii boltot mu bálgá vai mun jorralivččen,
iige oktage hehtte sin.
14 Sii bohtet
dego govda muvraluoddaneamis,
čievračomaid gaskka sii márret ovdan,
15 ja balddáhusat šávvet mu ala.
Sii sihkastit mu gudni eret dego biegga,
mu doaivu jávká balvva láhkái.
16 Mun dohppehalan morrašii,
vártnuhisvuohta lea deaividan mu.
17 Go idja boahtá, de mus luoddu dávttiid,
eaige mu bákčasat noga.
18 Stuorra fámuin Ipmil lea dohppen
mu biktasii,
son lea váldán mu čeabehii
19 ja bálkestan mu ráhpái.
Mun lean dego muolda ja gunat.
20 Mun čuorvvun du, muhto don it vástit,
mun čuoččun dás,
muhto don it geahča mu beallái.
21 Don leat nuppástuvvan
munnje goaves vašálažžan,
don fallehat mu olles fámuinat.
22 Don bálkestat mu biggii
ja cuvket mu juma siste.
23 Gal mun dieđán
ahte don leat doalvumin mu jápmimii,
dan báikái gosa
buot heakkalaččat čoagganit.
24 Dattetge, iigo olmmoš geigeše gieđa,
go buot gahččá čievračopman?
Iigo son čurvvoše veahki lihkuhisvuođastis?
25 Munhan lean čirron daid oasi
geain leat leamaš lossa beaivvit,
mun lean moraštan váivvášiid vuorbbi.
26 Muhto go mun doivon lihku,
de bođii lihkuhisvuohta,
go mun vurden čuovgga,
de bođii seavdnjadas.
27 Mu siskkildas duoldá iige lotkkot,
bahás beaivvit leat deaividan mu.
28 Mun váccán moraštemiin
inge oainne beaivváža,
čoakkalmasas mun čuožžilan
ja čuorvvun veahki.
29 Mun lean šaddan šakálaid vielljan,
struhccalottit leat mu guoimmit.
30 Mu liiki čáhpoda ja latnjá,
mu gorut buollá báhkkadávddas.
31 Mu lyra šuokŋa lea rievdan
váidalussan,
mu njurgganasa čuodjan
gullo čierrunjietnan.